Għala ma Tkunx Magħhom?

NDJAUKUA ULIMBA għandu 73 sena, u s-​sena l-​oħra għamel vjaġġ taʼ xi 450 kilometru. Il-​vjaġġ għamlu kollu bil-​mixi, u dan ħadlu 16-il ġurnata.

Dan ir-​raġel imdaħħal fiż-​żmien għamel dan il-​vjaġġ twil biex jattendi waħda mill-​konvenzjonijiet annwali tax-​Xhieda taʼ Jehovah. Wara l-​konvenzjoni, ferħan se jtir u msaħħaħ spiritwalment, reġaʼ mexa lura lejn id-​dar​—16-il ġurnata oħra. Kien dan l-​isforz vallapena? Daż-żgur li kien! Ndjaukua Ulimba għamel dan il-​vjaġġ annwali għal diversi snin.

Dan ir-​raġel Afrikan kien wieħed minn iktar minn 15-il miljun minn iktar minn 230 pajjiż, li attendew għall-​konvenzjonijiet tax-​Xhieda taʼ Jehovah s-​sena l-​oħra. Il-​biċċa l-​kbira, m’għandniex xi ngħidu, ma kellhomx għalfejn jimxu għal ġranet sħaħ biex jaslu fil-​lok tal-​konvenzjoni. Il-​maġġuranza waslu bil-​karozza, b’tal-linja, bit-​trejn, jew bl-​ajruplan. Kont int wieħed minnhom?

Fl-1998, se jerġgħu jsiru konvenzjonijiet madwar id-​dinja, il-​biċċa l-​kbira fix-​xhur tas-​sajf (jew fl-​istaġun bla xita). Jekk saħħtu tippermettilu, Ndjaukua Ulimba probabbilment se jerġaʼ jagħmel l-​istess mixja twila sabiex ikun jistaʼ jattendi. Hu u miljuni t’oħrajn se jisimgħu programm prattiku, li jqawwi l-​fidi, u li jsaħħaħ. Għal kulmin se jattendi, il-​konvenzjoni se tkun waħda mill-​iktar ġrajjiet taʼ interess speċjali tas-​sena. Int ukoll mistieden kordjalment biex tattendi. Ix-​Xhieda taʼ Jehovah fil-​lokalità tiegħek żgur li se jieħdu pjaċir jgħidulek fejn se ssir il-​konvenzjoni li tkun l-​eqreb għalik.