X’tip taʼ Isem Għandek?

FIL-​BIBBJA, xi drabi l-​kelma “isem” tirreferi għar-​reputazzjoni taʼ dak li jkun. Per eżempju, l-​għaref Sultan Salamun kiteb: “Aħjar fama tajba miż-​żejt prezzjuż, aħjar jum il-​mewt minn jum it-​twelid.” (Koħèlet 7:1; qabbel Proverbji 22:1.) Skond il-​kliem taʼ Salamun, persuna ma titwelidx b’isem tajjeb. Pjuttost, huwa matul il-​korsa taʼ ħajtu li wieħed jibni reputazzjoni li tfisser xi ħaġa. Ismu jidentifikah skond il-​kwalitajiet persunali tiegħu, jekk hux ġeneruż jew egoist, ħanin jew biered, umli jew kburi, saħansitra twajjeb jew mill-​agħar.

Ikkunsidra lil David. Matul ir-​renju tiegħu, hu ta prova li kien qawwi u sod. Fl-​istess ħin, bl-​umiltà David irrikonoxxa l-​iżbalji tiegħu u nidem mid-​dnubiet ħoxnin tiegħu. B’raġuni valida, il-​profeta taʼ Jehovah indika li David kien ‘bniedem għal qalbu [t’Alla].’ (1 Samwel 13:14) Iż-​żagħżugħ David diġà kellu isem tajjeb m’Alla.

B’kuntrast, is-​Sultan Ġudean Ġeħoram għamel isem ħażin għalih innifsu. Hu dawwar lis-​sudditi tiegħu ’l bogħod mill-​qima taʼ Jehovah u saħansitra ġiegħel li jinqatlu s-​sitt ħutu u xi wħud mill-​prinċpijiet taʼ Ġuda. Eventwalment, Jehovah laqat lil Ġeħoram b’marda kollha wġigħ li wasslitu għall-​mewt. Il-​Bibbja tgħid li Ġeħoram “mar bla ma tħassruh,” jew kif tpoġġiha t-​Today’s English Version, “ħadd ma ddispjaċieh meta miet.”—2 Kronaki 21:20.

Il-korsa tal-​ħajja taʼ David u Ġeħoram turi l-​verità tal-​proverbju Bibliku: “It-​tifkira tal-​ġust titbierek, imma isem il-​ħżiena jitħassar.” (Proverbji 10:7) Għalhekk, kull wieħed u waħda minna għandu jikkunsidra bil-​għaqal il-​mistoqsija, ‘X’tip taʼ isem qed nagħmel m’Alla u maʼ bnedmin sħabi?’