Imħabba Aqwa Minn taʼ Omm

FI STAZZJONIJIET taʼ l-​underground, f’latrini pubbliċi, jew f’toroq miżgħudin bin-​nies, xi ommijiet qed jabbandunaw lit-​trabi tat-​twelid tagħhom. Xi drabi, dawk li jiġbru ż-​żibel sabu trabi żgħar mifnijin bil-​biki għal ommhom saħansitra fil-​bramel taʼ l-​iskart. Skond il-​gazzetta O Estado de S. Paulo, “il-​każi taʼ trabi abbandunati fit-​toroq qed jiżdiedu.” M’għandniex xi ngħidu, l-​omm żagħżugħa għandha mnejn li iktar tard jiddispjaċiha li tkun ħadet dik id-​deċiżjoni. Madankollu, hi tabbandunaha, avolja lit-​tarbija dan jistaʼ jiswielha ħajjitha.

Int tistaʼ tberren, ‘Kif qatt omm tistaʼ biss taħsibha li tabbanduna lit-​tarbija tagħha għal futur hekk inċert?’ Il-​Bibbja tuża sitwazzjoni taʼ niket bħal din bħala metafora biex tipprovdi kuntrast qawwi rigward is-​sentimenti tal-​Ħallieq tagħna lejn dawk li huma tiegħu: “Tistaʼ mara tinsa t-​tarbija tagħha, u ma tħennx għal bin ġufha? Mqar jekk din tinsa, jien ma ninsiek qatt!”—Isaija 49:15.

Tassew, iktar minn kull omm umana, Alla għandu mħabba profonda għalina u juri sensittività għall-​bżonnijiet tagħna. Kemm jekk int żagħżugħ u kemm jekk int adult, tkun xi tkun il-​problema li tistaʼ tiffaċċja, m’intix waħdek. Il-​Ħallieq tiegħek irid jgħinek u jixtieqlek il-​ġid. Fi kliem is-​salmista, “għalkemm telquni missieri u ommi, il-​Mulej jilqagħni għandu.”—Salm 27:10.

Ir-rivisti t-​Torri taʼ l-​Għassa u Stenbaħ! qed jiġu ppubblikati mad-​dinja kollha biex jipprovdu għarfien dwar ‘Alla waħdu veru,’ Jehovah, u dwar Ibnu, Ġesù Kristu. Dan l-​għarfien jistaʼ jfisser ħajja taʼ dejjem għal dawk li jaċċettawh b’apprezzament.—Ġwann 17:3.