“Intom Tagħmlu Dak li Alla Jistenna Minna”

BILLI jikkooperaw maʼ l-​awtoritajiet sekulari “għall-​imħabba tal-​Mulej,” il-​Kristjani jistgħu jistennew li jirċievu ‘tifħir [bħala] dawk li jagħmlu t-​tajjeb.’ (1 Pietru 2:13-15) Ftit taż-​żmien ilu, ix-​Xhieda taʼ Jehovah fl-​Afrika t’ Isfel dan esperjenzawh f’konvenzjoni distrettwali li nżammet f’sala tal-​campus taʼ kulleġġ.

Fl-ewwel jum tal-​konvenzjoni, il-​pulizija tas-​sigurtà tal-​kulleġġ lestew ruħhom għan-​numru tas-​soltu taʼ delegati rrabjati u li ma jikkooperawx, bħal dawk li kienu esperjenzaw f’konvenzjonijiet differenti oħrajn. Madankollu, peress li qatt ma kellhom x’jaqsmu max-​Xhieda taʼ Jehovah, huma kienu se jesperjenzaw sorpriża pjaċevoli!

Bħala parti mill-​għassa regulari minħabba sigurtà fil-​kanċelli, il-​pulizija tas-​sigurtà fittxew f’kull karozza li kienet dieħla u ħierġa fil-​propjetà. Kienu mistagħġbin meta ġew milqugħin bi ħbiberija, paċenzja, u rispett, avolja lid-​delegati dan it-​tiftix kien qed jiħdilhom il-​ħin. Ma kienx hemm ir-​reżistenza, l-​argumenti, u l-​kliem abbużiv tas-​soltu. “Kuntrarju għall-​viżitaturi l-​oħrajn,” irrimarka fizzjal tas-​sigurtà, “intom turu spirtu umli u manjieri trankwilli li huma ovvji għalina lkoll.”

Hekk kif l-​uffiċjal ewlieni tas-​sigurtà induna bil-​kondotta kooperattiva tax-​Xhieda taʼ Jehovah, iddeċieda li ma kienx hemm għalfejn ifittxilhom fil-​karozzi “għaliex,” hu qal, “intom tassew iddixxiplinati.” Minħabba f’hekk, il-​karozzi li kellhom “JW” miktubin fuqhom bdew jitħallew jidħlu mingħajr ma jfittxulhom.

Fi tmiem il-​konvenzjoni, l-​uffiċjal ewlieni tas-​sigurtà qal li kien jittama li ma jdumx ma jerġaʼ jara lix-​Xhieda hemmhekk. “Qatt ma rajna nies b’imġiba tajba daqskom,” hu stqarr. “Intom tagħmlu dak li Alla jistenna minna.” Tifħir bħal dan huwa inċentiv ieħor għall-​Kristjani veri sabiex ‘iġibu ruħhom sewwa,’ biex b’hekk in-​nies ‘isebbħu [“jfaħħru,” Saydon] ’l Alla minħabba l-​għemil tajjeb tagħhom.’—1 Pietru 2:12.