“Stajt Inħoss l-​Atmosfera Paċifika”

RAĠEL li jitkellem il-​Ġermaniż mar f’konvenzjoni organizzata mix-​Xhieda taʼ Jehovah ħalli jkun jistaʼ “jitkixxef” fuq ix-​Xhieda. Għala? L-​għan tiegħu kien li “jesponi lil din is-​setta u jsalva lil ħbiebu biex ma jintilfux.” Wara li attenda l-​konvenzjoni, hu kiteb lil ħbiebu l-​ittra li ġejja:

“Meta rsaqt lejn il-​post fejn kienet qed issir il-​konvenzjoni, bdejt inberren jekk dan kienx il-​post korrett. Lanqas persuna waħda ma kienet tidher, u fl-​art ma kienx hemm skart jew bottijiet tal-​birra. Hekk kif ersaqt iktar viċin, rajt żewġt irġiel fil-​bieb taʼ l-​istejdjum. Tawni merħba u ħallewni nidħol.

“Jien stennejt li se nismaʼ l-​istorbju taʼ l-​eluf li kellhom ikunu hemmhekk, iżda kien hemm skiet perfett. ‘Sewwa,’ għedt bejni u bejn ruħi, ‘wisq probabbli kull m’hemm xi ftit nies imxerrdin mal-​post kollu.’

“Malli dħalt, l-​attenzjoni kollha tiegħi waqgħet mill-​ewwel fuq drama li kienet qed tiġi mtellaʼ fuq il-​pletform. Kien iktar tard li rrealizzajt li l-​istejdjum kien mimli daqs bajda b’eluf taʼ semmiegħa attenti. Stajt inħoss l-​atmosfera paċifika. Dak li smajt, rajt, u ħassejt waqt il-​kumplament tal-​konvenzjoni impressjonani profondament.

“Waqt li tħallatt max-​Xhieda, innotajt il-​wiċċ ferħan u l-​espressjonijiet taʼ mħabba li lkoll kellhom. F’daqqa waħda, ma stajtx inżomm milli naħseb, ‘Dawn tassew huma n-​nies t’Alla!’”

Minflok ma ‘salva lil ħbiebu biex ma jintilfux,’ dan iż-​żagħżugħ talabhom jibdew jistudjaw il-​Bibbja miegħu. Ir-​riżultat? Illum hu anzjan Kristjan. Hu u familtu huma attivi fil-​kongregazzjonijiet taʼ Zug, l-​Isvizzera.