Dawn “Kellhom il-​Biżaʼ t’Alla”

WAQT li l-​Iżraeliti kienu fil-​jasar fl-​Eġittu, il-​qwiebel Ebrej Sifra u Pugħa sabu ruħhom f’qagħda inkwetanti. Biex jipprova jikkontrolla l-​popolazzjoni barranija li dejjem kienet qed tikber b’rata mgħaġġla ħafna, il-​Fargħun ikkmanda lil dawn in-​nisa: “Meta twelldu lin-​nisa Għebrej, . . . jekk ikun tifel oqtluh.”—Eżodu 1:15, 16.

Sifra u Pugħa “beżgħu minn Alla [“kellhom il-​biżaʼ t’Alla,” KŻ],” u għalhekk kienu kuraġġużi u “ma għamlux kif qalilhom is-​sultan taʼ l-​Eġittu.” Minflok, huma ppreservaw ħajjin lit-​trabi subien, għalkemm din il-​waqfa qalbiena setgħet switilhom ħajjithom. Jehovah “għamel il-​ġid mal-​qwiebel,” u ppremjahom għall-​azzjonijiet tagħhom li salvaw il-​ħajjiet.—Eżodu 1:17-21.

Dan ir-​rakkont jenfasizza l-​apprezzament li Jehovah għandu għal dawk li jaqduh. Hu setaʼ qies dak li għamlu Sifra u Pugħa, għalkemm dan kien jirrifletti kuraġġ, bħala sempliċi att umanitarju. Wara kollox, ebda mara f’sensiha ma tasal biex toqtol it-​trabi! Xorta waħda, Jehovah bla dubju kkunsidra l-​fatt li xi bnedmin, minħabba l-​biżaʼ mill-​bniedem, ikkommettew atti tassew mistkerrha. Kien jaf li dawn il-​qwiebel ma kinux imqanqlin biss mill-​qalb tajba lejn il-​bnedmin sħabhom imma wkoll mill-​biżaʼ minnu u d-​devozzjoni tagħhom lejh.

Kemm għandna għalxiex inkunu grati li dak Alla li lilu naqdu hu Alla li jagħti kas taʼ l-​atti tagħna taʼ fedeltà! Veru, forsi ħadd minna qatt ma ffaċċja l-​prova taʼ fidi li kellhom jiffaċċjaw Sifra u Pugħa. Madankollu, meta nieħdu waqfa soda għal dak li hu tajjeb​—sew jekk inkunu l-​iskola, fuq il-​post tax-​xogħol, jew fi kwalunkwe sitwazzjoni oħra—​Jehovah ma jissottovalutax l-​imħabba leali tagħna lejh. Għall-​kuntrarju, hu “jagħti l-​ħlas xieraq lil dawk li jfittxuh.” (Lhud 11:6) Iva, “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.”—Lhud 6:10.