“Karattru Sod Imnebbaħ mill-​Fidi”

FIS-​SENA 1998 ġie pubblikat ktieb ġdid bil-​Franċiż, li kellu kritika tassew pożittiva, u dan kien intitolat Les Témoins de Jéhovah face à Hitler (Ix-Xhieda taʼ Jehovah Wiċċ Imbwiċċ maʼ Hitler), miktub minn Guy Canonici. Fl-​introduzzjoni tal-​ktieb, l-​istorjografu Franċiż ferm rispettat François Bédarida kiteb: “Dan il-​ktieb tassew intlaqaʼ tajjeb. Mhux sempliċement għaliex jimla xi vojt, imma għaliex ħareġ f’waqtu. . . . Minbarra l-​ispeċjalisti, min iżjed jaf dwar dak li għaddew minnu x-​Xhieda taʼ Jehovah taħt it-​Tielet Reich? Madankollu, matul ir-​reġim li dam sejjer għal 12-il sena, dawn għaddew minn persekuzzjoni qalila u vjolenti li ma qatgħet xejn. Huma wkoll esperjenzaw l-​orrur tal-​kampijiet tal-​konċentrament. Huma wkoll ħallsu prezz għoli għall-​fidi u l-​konvinzjonijiet tagħhom. L-​istorja għala nsiethom lil dawn il-​Kristjani? . . .

“Għala kien hemm din il-​persekuzzjoni brutali u sistematika fuq din is-​setta żgħira, imxerrda mal-​pajjiż, li m’għamlet ebda ħsara lil ħadd? Din hi l-​qalba tal-​paradoss. Ix-​Xhieda fil-​Ġermanja mhux biss kienu jirrappreżentaw minoranza żgħira ħafna tal-​popolazzjoni​—l-​istatistika turi li hemm madwar 20,000 f’total taʼ iktar minn 60 miljun abitant—​imma talli lkoll kemm huma kienu ċittadini paċifiċi li rrispettaw il-​liġi u ma kienu taʼ theddida għal ħadd, li riedu biss jaħdmu u jrabbu lil uliedhom kif jixraq. . . .

“Din il-​persekuzzjoni ħaditha mar-​reżistenza spiritwali soda u rebbieħa taʼ kredenti li l-​forza interna tal-​fidi tagħhom f’Ġesù Kristu kienet kapaċi tħabbatha mal-​forza esterna tal-​pressjonijiet, ibda mill-​vjolenza fiżika taʼ l-​Istat tal-​pulizija—​sal-punt taʼ eroiżmu u martirju.”

L-istorja tax-​Xhieda taʼ Jehovah, li sofrew il-​martirju għall-​fidi Kristjana tagħhom waqt li ffaċċjaw intolleranza reliġjuża, għandha effett qawwi. Fir-​reviżjoni tagħha taʼ dan il-​ktieb, il-​gazzetta popolari Kattolika Franċiża, La Croix, żiedet b’mod impressjonanti: “Mill-​istorja tagħhom li ftit li xejn nafu dwarha, Guy Canonici ġabar flimkien partita evidenzi li jħallu lil dak li jkun b’ħalqu miftuħ x’ħin jara x’karattru sod imnebbaħ mill-​fidi li kienet espressa bl-​iktar kliem sempliċi, fidi li baqgħet soda sa l-​aħħar saħansitra fost it-​tfal. Din it-​tifkira għandha tipprovdi sfond għad-​dibattitu kurrenti dwar in-​natura Kristjana tax-​Xhieda taʼ Jehovah.”