Il-​Ktieb taʼ Danjel Spjegat!

DAWK li attendew għall-​konvenzjoni kienu ħerqanin biex jiksbu l-​kopja tagħhom tal-​ktieb il-​ġdid li ħareġ taʼ 320 paġna, Oqgħod Attent għall-​Profezija taʼ Danjel! Kif ħassewhom dwar il-​ktieb? Ikkunsidra x’qalu xi wħud minnhom.

“Bħall-​biċċa l-​kbira taʼ l-​adolexxenti, jien ma tantx nieħu pjaċir nistudja dwar l-​istorja antika. Għalhekk, meta rċivejt il-​kopja persunali tiegħi tal-​ktieb il-​ġdid, Oqgħod Attent għall-​Profezija taʼ Danjel!, ma kontx eċċitata daqshekk biex naqrah, imma pprovajt. Kemm kont sejra żmerċ! Dan hu wieħed mill-​aqwa kotba li qatt ġie f’idejja. Huwa tassew ktieb li ma tneħħihx minn idejk! M’għadnix inħossni li qed naqra dwar xi rakkont li ġara eluf taʼ snin ilu. Għall-​ewwel darba, inħossni li nistaʼ npoġġi lili nnifsi minflok Danjel. Nistaʼ tassew nimmaġina xi tħoss meta tiġi mifrud mill-​familja tiegħek, tintbagħat lejn art barranija, u l-​integrità tiegħek tiġi provata darba wara l-​oħra. Grazzi ħafna għal dan il-​ktieb.”—Anya.

“L-​iktar ħaġa li tgħinni hi l-​messaġġ ċar li Jehovah għandu kontroll assolut tal-​kwistjonijiet li jeffettwaw lill-​poplu tiegħu. Permezz tal-​viżjonijiet u l-​ħolm taʼ Danjel u dawk li hu interpreta għal oħrajn, jidher ċar li Alla tagħna dejjem se jġiegħel li l-​ġrajjiet iseħħu skond l-​iskop tiegħu. Dan isaħħaħ it-​tama li għandna fid-​deskrizzjonijiet profetiċi misjubin fil-​Bibbja dwar id-​dinja ġdida li se jagħmel.”—Chester.

“Għoġobni l-​mod kif tajtu l-​ħajja lil Danjel. Ħassejtni li sirt nafu aħjar bil-​mod kif enfasizzajtu l-​affarijiet li kienu tant għal qalbu u li kien jimpurtah minnhom. Nistaʼ nifhem aħjar għala Jehovah kien jikkunsidrah bħala wieħed għażiż. Matul il-​provi u l-​persekuzzjonijiet kollha tiegħu, hu ma kienx jitħasseb dwar x’kien se jsir minnu. It-​tħassib prinċipali tiegħu kien għal Jehovah u għall-​isem meraviljuż Tiegħu. Grazzi talli enfasizzajtu dawn il-​punti.”—Joy.

“Dan hu dak li konna qed nistennew! Qatt qabel ma kien ġie muri kemm il-​ktieb taʼ Danjel attwalment japplika għal kull wieħed u waħda minna. Wara li qrajt il-​biċċa l-​kbira tal-​ktieb il-​ġdid dik il-​lejla stess li rċivejtu, kelli bilfors nieqaf u nirringrazzja lil Jehovah fit-​talb.”—Mark.

“Dak li ma konniex qed nistennew kien l-​impatt li kien se jkollu fuq uliedna. L-​età tagħhom hi ħames snin u tliet snin. . . . L-​istejjer taʼ Danjel, Ħananija, Misaèl, u Għażarija dejjem kienu fost il-​favoriti tagħhom mill-​Ktieb Tiegħi taʼ Stejjer mill-​Bibbja, imma l-​preżentazzjoni fil-​ktieb tal-​Profezija taʼ Danjel! effettwathom b’mod li ma konniex qed nistennewh. Avolja għadhom daqshekk żgħar, jidhru li huma kapaċi jassoċjaw ruħhom maʼ dawn iż-​żgħażagħ twajbin. X’eżempji meraviljużi għal uliedna biex jimitawhom! X’għodda straordinarja tajtuna! Grazzi, grazzi ħafna!”—Bethel.

“Ħassejtni li kont proprju hemm maż-​żgħażagħ Ebrej hekk kif ġarrbu provi tal-​fidi tagħhom; u dan inkuraġġieni biex neżamina l-​fidi tiegħi stess. Il-​kaxxa tar-​reviżjoni intitolata “X’Innotajt?” iġġiegħel il-​kontenut tal-​kapitlu jidħol fil-​qalb. Nerġaʼ ngħidilkom grazzi għal kapulavur ieħor.”—Lydia.