X’Inhu Verament taʼ Valur?

Xi ħaġa li verament għandha valur tistaʼ tagħmel lil dak li jkun ferħan u eċċitat ħafna. Din x’tistaʼ tkun? Xi kemxa flus ġmielha? Ġojjelli rari jew li jiswew ħafna flus? Fama u prominenza? Għal ħafna minna dawn huma affarijiet taʼ valur kbir. Il-​fatt li jkollna dawn l-​affarijiet jistaʼ jipprovdilna l-​mezz taʼ l-​għajxien tagħna, jagħtina skop f’ħajjitna, jew iġagħalna nħossuna sodisfatti u li rnexxejna fil-​ħajja. Qegħdin aħna nistinkaw biex nakkwistaw dawn l-​affarijiet, bit-​tama li jistgħu jgħinuna nwettqu l-​miri u l-​ambizzjonijiet tagħna għall-​futur?

NORMALMENT, xi ħaġa titqies jekk hijiex taʼ valur jew le fuq kemm din tissodisfa l-​bżonnijiet u x-​xewqat persunali tagħna stess. Ċerti affarijiet ngħożżuhom għax iġagħluna nħossuna tajbin u joffrulna prospett taʼ futur mimli sigurtà, filwaqt li ċerti affarijiet ikunu għal qalbna għax iġibulna serħan u faraġ fil-​pront, jew iġagħluna nħossuna apprezzati. Iżda, li nibbażaw il-​valur taʼ xi ħaġa fuq ix-​xewqat jew l-​interessi tagħna li dejjem jinbidlu hu superfiċjali. Fir-​realtà, il-​valur veru taʼ xi ħaġa hu determinat minn kemm aħna nqisuha bżonnjuża.

X’inhi l-​iktar ħaġa li għandna bżonn? Xejn m’għandu valur mingħajr dan l-​ingredjent prinċipali—il-​ħajja. Mingħajr ħajja ma nistgħux neżistu. Is-​Sultan Salamun taʼ Iżrael tal-​qedem kiteb: “Il-​mejtin ma jafu xejn . . . Ma jkunx hemm ħidma jew ħsieb, xjenza jew għerf, f’Art l-​Imwiet [Xeol jew il-​qabar] fejn inti sejjer.” (Koħèlet 9:​5, 10) Jekk il-​mewt tiġi fuqna, irridu u ma rridux, ikollna nħallu kollox warajna. Mela, l-​iktar ħaġa li għandna bżonn hi li niksbu dak li se jgħinna nibqgħu ħajjin. Dan x’inhu?

X’Se Jgħinna Nibqgħu Ħajjin?

“Fihom kenn il-​flus,” stqarr is-​Sultan Salamun. (Koħèlet 7:12) Jekk ikollna biżżejjed flus nistgħu nixtru l-​ikel u xi dar komda. Bil-​flus nistgħu ngawdu xi safra lejn xi pajjiż ’il bogħod. Jistgħu jipprovdulna l-​bżonnijiet meta ma nkunux nistgħu nkomplu naħdmu minħabba l-​età jew il-​mard. Il-​vantaġġi taʼ li jkollok il-​flus huma ħafna. Madankollu, il-​flus ma jistgħux jgħinuna nibqgħu ħajjin. L-​appostlu Pawlu wissa lil Timotju: “Lil dawk li huma għonja bil-​ġid taʼ din l-​art widdibhom biex ma jitkabbrux u ma jqegħdux it-​tama tagħhom f’għana li ma tistax torbot fuqu, imma li għandhom jittamaw f’Alla.” (1 Timotju 6:17) Il-​flus kollha tad-​dinja ma jistgħux jixtrulna l-​ħajja.

Ikkunsidra din l-​esperjenza taʼ raġel jismu Hitoshi. Peress li trabba fil-​faqar, Hitoshi kellu xewqa kbira li jsir sinjur. Tant kien jemmen li bil-​flus tistaʼ saħansitra tagħmel triq fil-​baħar, li kien jaħseb li kien kapaċi jixtri anki lin-​nies. Darba minnhom, wieħed raġel mar iħabbat il-​bieb taʼ Hitoshi u staqsieh jekk kienx jaf li Ġesù Kristu kien miet għalih. Din il-​mistoqsija qajmitlu l-​kurżità lil Hitoshi għaliex kien jaħseb li ħadd ma kien se jmut għal xi ħadd bħalu. Hu mar jismaʼ taħdita pubblika minn fuq il-​Bibbja u baqaʼ mistagħġeb meta semaʼ t-​twissija biex inżommu għajnejna sempliċi. Il-​kelliemi spjega li għajn sempliċi tara fil-​bogħod u tiffoka fuq affarijiet spiritwali. (Luqa 11:34) Minflok ma beda jitħabat għall-​flus, Hitoshi beda jpoġġi l-​valuri spiritwali l-​ewwel f’ħajtu.

L-affarijiet materjali jistgħu jġibulna wkoll ammont taʼ stabbilità u sigurtà. Jekk inkunu tat-​tajjeb ma nkunux ansjużi dwar il-​ħobża taʼ kuljum. Dar komda fi nħawi mill-​isbaħ tistaʼ ġġagħalna nħossu ċertu sens taʼ sodisfazzjon fil-​ħajja. Ħwejjeġ tal-​moda u karozza sabiħa jġagħlu lil kulħadd jammirana.

Hija barka li ‘nduqu mill-​frott taʼ xogħolna.’ (Koħèlet 3:13) U l-​fatt li jkollna iktar milli għandna bżonn jistaʼ jgħin lill-​maħbubin tagħna biex ‘jistrieħu, jieklu, jixorbu, u jixxalaw.’ Madankollu, il-​valur taʼ l-​affarijiet materjali malajr jispiċċa. Biex iwissi kontra x-​xenqa, Ġesù Kristu qal: “Għax imqar jekk wieħed ikollu bir-​radam, ħajtu ma tiddependix mill-​ġid li jkollu.” (Luqa 12:​15-21) La l-​abbundanza u lanqas il-​valur taʼ l-​affarijiet materjali ma jistgħu jiggarantulna l-​ħajja.

Per eżempju, Liz kienet miżżewġa lil wieħed li kien tat-​tajjeb finanzjarjament. Hi tirrakkonta: “Kellna dar sabiħa u żewġ karozzi, u s-​sitwazzjoni finanzjarja tagħna kienet tant tajba li setaʼ jkollna kulma tixtieq qalbna . . . Forsi tidher stramba, imma xorta kont ninkwieta fuq il-​flus.” Hi tispjega: “Kellna ħafna x’nitilfu. Jidher li iktar ma jkollok inqas tħossok fis-​sigurtà.”

Anki l-​fama u l-​prominenza għandhom valur kbir f’għajnejn ħafna nies għaliex dawn għandhom mnejn iġibulhom tifħir u unur. Fid-​dinja taʼ llum, karriera taʼ suċċess hija xi ħaġa taʼ sodisfazzjon kbir u li kulħadd jixtieq li jkollu. Il-​fatt li niżviluppaw xi talent jew sengħa mhux komuni għandu mnejn jgħinna nsiru popolari. Forsi n-​nies ifaħħruna, jistmaw ħafna l-​opinjonijiet tagħna, u jagħmlu minn kollox biex ikollhom l-​approvazzjoni tagħna. Dan kollu jistaʼ jkun eċċitanti ferm u sodisfaċenti. Imma, fl-​aħħar mill-​aħħar, xejn m’hu etern. Salamun kellu l-​glorja u s-​setgħa kollha li setaʼ jkollu sultan, imma lmenta: “La taʼ l-​għaref u lanqas taʼ l-​iblah, ma ssaddad it-​tifkira . . . it-​tnejn ikunu ntesew.” (Koħèlet 2:16) Il-​fama u l-​prominenza ma jagħtuniex il-​ħajja.

Ċertu skultur jismu Celo beda japprezza xi ħaġa ferm iktar prezzjuża mill-​fama. Peress li kellu talent kbir, hu kkwalifika għal kors li kien se jtejjiblu l-​abbiltajiet tiegħu. Ma damx ma qalaʼ tifħir mill-​gazzetti u l-​kritiċi taʼ l-​arti. Ħafna mill-​iskulturi tiegħu ġew esebiti fil-​bliet ewlenin taʼ l-​Ewropa. Celo jirrakkonta: “Ikolli nammetti li għal xi żmien l-​arti kienet l-​iktar ħaġa importanti f’ħajti. Madankollu, bdejt nirrealizza li jekk inkompli nistinka fil-​karriera tiegħi nkun qisni qed nipprova naqdi żewġ sidien. (Mattew 6:24) Ħassejtni konvint li l-​iktar ħaġa importanti li stajt nagħmel kienet li nippriedka l-​aħbar tajba tas-​Saltna t’Alla. Għalhekk, ħadt deċiżjoni persunali biex nitlaq ix-​xogħol tiegħi bħala skultur.”

X’Inhu Verament taʼ Valur?

Ladarba xejn ma jagħmel sens jew ma hu taʼ valur mingħajr il-​ħajja, liema ħaġa nistgħu niksbu li tistaʼ tagħtina garanzija li se nibqgħu ħajjin? Alla Jehovah hu l-​għajn taʼ kull ħajja. (Salm 36:10 [36:​9, NW]) Tabilħaqq, “bih għandna l-​ħajja u niċċaqalqu u neżistu.” (Atti 17:​28, NW) Hu jagħti d-​don taʼ ħajja taʼ dejjem lil dawk li jħobb. (Rumani 6:23) X’irridu nagħmlu biex niksbu dan id-​don?

Jekk nirċivux jew le dan id-​don taʼ ħajja taʼ dejjem jiddependi milli jkollna relazzjoni mill-​qrib maʼ Jehovah. Għalhekk, l-​approvazzjoni tiegħu għandha valur akbar minn kwalunkwe ħaġ’oħra li jistaʼ jkollna. Meta jkollna l-​approvazzjoni taʼ Jehovah, ikollna l-​prospett taʼ ferħ ġenwin u dejjiemi. Imma mingħajr l-​approvazzjoni t’Alla, niffaċċjaw qerda taʼ dejjem. Mela, jidher ċar li kwalunkwe ħaġa li tistaʼ tgħinna niksbu relazzjoni tajba maʼ Jehovah għandha valur imprezzabbli.

Dak li Rridu Nagħmlu

Is-​suċċess tagħna jiddependi milli niksbu l-​għarfien. L-​għajn taʼ l-​għarfien eżatt hi l-​Kelma taʼ Jehovah, il-​Bibbja. Hi biss tgħidilna dak li rridu nagħmlu biex nogħġbu lil Alla. Għalhekk jeħtieġ li nistudjaw l-​Iskrittura bir-​reqqa. Sforz ħabrieki biex nitgħallmu kulma nistgħu dwar Alla Jehovah u Ġesù Kristu jirriżulta f’‘għarfien li jfisser il-​ħajja taʼ dejjem.’ (Ġwann 17:3) Kemm għandna għalfejn ngħożżuh dan it-​teżor!—Proverbji 2:​1-5.

L-għarfien li niksbu mill-​Kelma t’Alla jarmana biex nieħdu l-​pass li jmiss—li neżerċitaw fidi f’Ġesù Kristu. Jehovah kkmanda lil dawk kollha li jridu jiġu għandu biex dan jagħmluh permezz taʼ Ġesù. (Ġwann 14:6) Fil-​fatt, “f’ħadd ħliefu ma hemm salvazzjoni.” (Atti 4:12) Is-​salvazzjoni aħħarija tagħna ma tiddependix ‘mill-​fidda jew id-​deheb . . . , imma mid-​demm għażiż taʼ Kristu.’ (1 Pietru 1:​18, 19) Il-​fidi tagħna rridu nuruha billi nemmnu t-​tagħlim taʼ Ġesù u nimxu fuq l-​eżempju tiegħu. (Lhud 12:​1-3; 1 Pietru 2:21) U kemm hu prezzjuż is-​sagrifiċċju tiegħu! Il-​fatt li jiġu applikati l-​benefiċċji taʼ dan is-​sagrifiċċju jiddetermina l-​futur etern taʼ l-​umanità kollha. Meta jiġi applikat bis-​sħiħ għan-​nom tagħna, se ningħataw id-​don verament imprezzabbli tal-​ħajja taʼ dejjem.—Ġwann 3:16.

Ġesù qal: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.” (Mattew 22:37) Li nħobbu lil Jehovah jfisser li “nżommu l-​kmandamenti tiegħu.” (1 Ġwann 5:3) Il-​kmandamenti tiegħu jirrikjedu li nżommu separati mid-​dinja, ikollna dejjem kondotta nadifa, u nappoġġaw is-​Saltna tiegħu lealment. Dan hu l-​mod li aħna nkunu qed ‘nagħżlu l-​ħajja’ minflok il-​mewt. (Dewteronomju 30:19) Jekk ‘nersqu lejn Alla, hu jersaq lejna.’—Ġakbu 4:8.

Li nkunu żgurati mill-​approvazzjoni t’Alla jiswa bil-​wisq iktar milli jkollna t-​teżori kollha tad-​dinja. Dawk li għandhom din l-​approvazzjoni huma l-​iktar nies sinjuri fuq l-​art! Mela, jalla nistinkaw biex nakkwistaw it-​teżor li għandu valur veru—l-​approvazzjoni taʼ Jehovah. Għalhekk, ejja ndaħħlu f’qalbna t-​twissija taʼ Pawlu: “Fittex li jkollok il-​ġustizzja, it-​tjieba, il-​fidi, l-​imħabba, is-​sabar, il-​ħlewwa. Tqabad it-​taqbida t-​tajba tal-​fidi; qis li tirbaħ il-​ħajja taʼ dejjem.”—1 Timotju 6:​11, 12.

[Stampi f’paġna 21]

X’inhu l-​iktar taʼ valur għalik? Il-​flus, l-​affarijiet materjali, il-​fama, jew xi ħaġ’oħra?

[Stampa f’paġna 23]

Jeħtiġilna nistudjaw l-​Iskrittura bir-​reqqa