‘Sir Għaref fil-​Futur Tiegħek’

“Il-​biċċa l-​kbira mill-​umanità tuża l-​ewwel snin taʼ ħajjitha biex tagħmel l-​aħħar snin tagħha miżerabbli.” Hekk qal Jean de La Bruyère, kittieb Franċiż taʼ komponimenti letterarji li kien jgħix fis-​seklu 17. Tabilħaqq, żagħżugħ indeċiż jistaʼ joqgħod itellaʼ u jniżżel, u b’hekk jesperjenza dwejjaq u dispjaċir. Min-​naħa l-​oħra, żagħżugħ stinat jistaʼ jinsisti li jibqaʼ fi triq mhix għaqlija, li iktar tard f’ħajtu tisraqlu l-​ferħ. Bi kwalunkwe mod, id-​dnubiet t’azzjonijiet li nagħmlu u oħrajn li nonqsu li nagħmlu jistgħu jwasslu għall-​miżerja.

Kif nistgħu nevitaw li jiġri dan? Waqt li twissi liż-​żgħażagħ biex ma jkunux indeċiżi, il-​Bibbja tagħti dan il-​parir: “Ftakar f’min ħalqek f’jiem żgħożitek qabel ma jaslu jiem in-​niket, u joqorbu s-​snin li tgħid għalihom: ‘Xejn ma jogħġbuni.’” (Koħèlet 12:1) Jekk int għadek żagħżugħ, ħu passi pożittivi biex titgħallem dwar “min ħalqek” waqt li għadek żgħir.

Mela, il-​Bibbja kif tgħinhom liż-​żgħażagħ biex jevitaw imġiba taʼ bluha fiż-​żgħożija? Din tgħid: “Agħti widen għall-​pariri u aċċetta d-​dixxiplina, sabiex int tistaʼ ssir għaref fil-​futur tiegħek.” (Proverbji 19:​20, NW) Barra minn hekk, il-​Bibbja turi biċ-​ċar li meta l-​għerf divin jitwarrab minħabba traskuraġni jew ribelljoni fiż-​żgħożija, jew fi kwalunkwe età oħra, dan iġib konsegwenzi taʼ wġigħ il-​qalb. (Proverbji 13:18) Min-​naħa l-​oħra, meta nagħtu kas id-​direttivi divini, dan jirriżulta f’“għomor twil u ħafna snin, u riżq tajjeb,” ħajja sodisfaċenti u taʼ ferħ.—Proverbji 3:2.