Agħżel il-​Ħajja Eterna

FIL-​PASSAT, ħafna nies ma kellhomx daqstant għażliet bħalma għandna llum. Per eżempju, l-​ilbies li nilbsu, l-​ikel li nieklu, u fejn naħdmu u ngħixu huma spiss xi ħaġa li nagħżluha aħna. F’ħafna partijiet tad-​dinja, issa anki li tagħżel lil xi ħadd biex tiżżewweġ saret id-​drawwa tas-​soltu. Madankollu, il-​Bibbja tippreżenta għażla li hija ħafna iktar importanti minn kwalunkwe għażla oħra—waħda li l-​bnedmin kollha jistgħu jagħmlu.

Il-Bibbja tgħid: “Min iżomm mas-​sewwa jkollu l-​ħajja, imma min jimxi bil-​ħażen jimxi lejn il-​mewt.” (Proverbji 11:19) U Ġesù qal: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.”—Ġwann 17:3.

Iva, il-​Ħallieq tagħna fetħilna l-​opportunità biex nagħżlu t-​triq li twassalna għall-​ħajja taʼ dejjem! Xi rridu nagħmlu biex niksbu l-​ħajja eterna?

Skond il-​Bibbja, “triq is-​sewwa twassal għall-​ħajja.” (Proverbji 12:28) Aħna nistgħu nkunu fost dawk il-​ġusti li jinsabu fit-​triq li tagħti għall-​ħajja taʼ dejjem. Kif? Billi nkunu ċerti li ħajjitna tkun fi qbil mar-​rieda u l-​kmandamenti t’Alla. (Mattew 7:​13, 14) B’hekk, jalla nieħdu d-​deċiżjoni t-​tajba u nirċievu r-​rigal taʼ ħajja taʼ dejjem mingħand Alla.—Rumani 6:23.