Kif Alla Jħares Lejn il-​Mejtin

IL-​MEWT taʼ xi ħadd għażiż hija verament taʼ niket. Il-​vojt li tħoss, is-​solitudni, u s-​sens taʼ telfa tant huma kbar li ma tistax tispjegahom. It-​telfa taʼ xi ħadd maħbub tistaʼ ġġiegħel individwu jħossu bla saħħa, għax minkejja l-​għana, is-​setgħa, jew l-​influwenza li individwu jistaʼ jkollu, ħadd fid-​dinja ma jistaʼ jerġaʼ jagħti l-​ħajja lil xi ħadd li jkun miet.

Madankollu, il-​Ħallieq tagħna jara l-​affarijiet b’mod differenti. Ladarba fforma l-​ewwel bniedem mit-​trab taʼ l-​art, hu jistaʼ jerġaʼ joħloq lill-​individwu li jkun miet. Għalhekk, Alla jistaʼ jqis lil dawk li jkunu mietu bħala li għadhom ħajjin. Rigward qaddejja leali tal-​qedem li mietu, Ġesù qal: “Għalih [għal Alla] kulħadd jgħix.”—Luqa 20:38.

Waqt li kien fuq l-​art, Ġesù ngħata l-​qawwa li jqajjem lill-​mejtin. (Ġwanni 5:21) Għalhekk, hu jqis lil dawk li mietu lealment bl-​istess mod kif iqishom Jehovah. Per eżempju, meta miet il-​ħabib tiegħu Lazzru, Ġesù qal lid-​dixxipli tiegħu: “Ħa mmur u nqajjmu.” (Ġwanni 11:11) Mill-​ħarsa tal-​bniedem, Lazzru kien mejjet, imma għal Jehovah u Ġesù, Lazzru kien rieqed.

Taħt il-​ħakma tas-​Saltna taʼ Ġesù, “kemm it-​tajbin u kemm il-​ħżiena għad iqumu minn bejn l-​imwiet.” (Atti 24:15) Maż-​żmien, dawk li jkunu ġew irxoxtati se jirċievu edukazzjoni divina u jkollhom il-​prospett li jgħixu għal dejjem fuq l-​art.—Ġwanni 5:​28, 29.

Iva, il-​mewt taʼ xi ħadd maħbub tistaʼ tikkaġuna ħafna niket u għali, u dawn għandhom mnejn jibqgħu jinħassu għal snin twal. Minkejja dan, jekk inqisu lill-​mejtin bl-​istess mod kif jarahom Jehovah jistaʼ jkollna faraġ kbir u nimtlew bit-​tama.—2 Korintin 1:​3, 4.