“Ersqu Lejn Alla, U Hu Jersaq Lejkom”

Qabel u Wara​—Kif il-​Bibbja Biddlet lil Dan ir-​Raġel

GĦAL Rolf-Michael il-​mużika kienet ħajtu. Kien ossessjonat fuq id-​drogi. Bħala żagħżugħ fil-​Ġermanja, hu kkonsma kwantitajiet kbar t’alkoħol u spiss uża l-​LSD, il-​kokaina, il-​ħaxixa, u sustanzi oħra li jeffettwaw il-​moħħ.

Waqt li kien qed jipprova jdaħħal id-​drogi f’pajjiż Afrikan, Rolf-Michael kien arrestat u qattaʼ 13-il xahar il-​ħabs. Iż-​żmien li għamel il-​ħabs tah ċans jaħseb dwar l-​iskop veru tal-​ħajja.

Rolf-Michael u l-​mara tiegħu, Ursula, fittxew bil-​ħerqa għall-​iskop tal-​ħajja u l-​verità. Minkejja d-​diżappunti li kellhom mill-​hekk imsejħa knejjes Kristjani, huma kellhom xewqa qawwija li jsiru jafu lil Alla. Imma huma kellhom mistoqsijiet u ma rċivewx tweġibiet sodisfaċenti minn diversi gruppi reliġjużi. Barra minn hekk, dawn ir-​reliġjonijiet ma tawhomx motivazzjoni qawwija biżżejjed biex iġġagħalhom ibiddlu ħajjithom.

Rolf-Michael u Ursula eventwalment iltaqgħu max-​Xhieda taʼ Jehovah. Wara li beda jistudja l-​Bibbja, Rolf-Michael kien imqanqal profondament mit-​twissija: “Ersqu lejn Alla, u hu jersaq lejkom.” (Ġakbu 4:8) Hu kien determinat li ‘jinżaʼ l-​personalità qadima li taqbel maʼ kif kien iġib ruħu qabel u jilbes il-​personalità ġdida li kienet maħluqa skond ir-​rieda t’Alla fil-​ġustizzja u l-​lealtà vera.’​—Efesin 4:​22-​24, NW.

Rolf-Michael kif setaʼ jilbes il-​personalità ġdida? Hu ġie muri mill-​Bibbja li “permezz taʼ l-​għarfien eżatt” il-​personalità taʼ individwu tistaʼ “tiġġedded skond ix-​xbiha tal-​Wieħed li ħalaqha,” jiġifieri taʼ Jehovah.—Kolossin 3:​9-​11, NW.

Hekk kif beda jikseb l-​għarfien eżatt, Rolf-Michael beda jfittex li jġib ħajtu fi qbil mal-​prinċipji tal-​Kelma t’Alla. (Ġwanni 17:3) Kien diffiċli li jieqaf jieħu d-​drogi, imma Rolf-Michael irrikonoxxa l-​valur taʼ li navviċinaw lil Jehovah bit-​talb u li nesperjenzaw l-​għajnuna tiegħu. (1 Ġwanni 5:​14, 15) Hu rċieva iktar għajnuna meta ssieħeb mill-​qrib maʼ dawk li kienu diġà Xhieda taʼ Jehovah, li jaħdmu tant iebes biex jagħmlu r-​rieda t’Alla.

L-għarfien dwar li d-​dinja qed tgħaddi u li dawk li jagħmlu r-​rieda t’Alla se jgħixu għal dejjem ukoll kien t’għajnuna għal Rolf-Michael. Għenu jagħżel, mhux l-​imħabba temporanja għad-​dinja, imma l-​barka dejjiema li tiġi minn relazzjoni mill-​qrib maʼ l-​Alla kollu mħabba, Jehovah. (1 Ġwanni 2:​15-​17) Rolf-Michael kien imqanqal profondament bil-​kliem taʼ Proverbji 27:11: “Kun għaref, ibni, u ferraħli qalbi, biex inkun nistaʼ nwieġeb lil min jgħajjarni.” Hu jgħid b’apprezzament: “Dan il-​vers juri kemm hi profonda l-​imħabba li għandu Jehovah, ladarba jagħti lill-​bnedmin l-​opportunità li jferrħulu qalbu.”

Bħal Rolf-Michael, il-​mara tiegħu, u t-​tlett itfal tagħhom, mijiet t’eluf taʼ nies ibbenefikaw meta segwew il-​prinċipji tal-​Bibbja. Individwi bħal dawn jistgħu jinstabu fil-​kongregazzjonijiet tax-​Xhieda taʼ Jehovah madwar id-​dinja kollha. B’dispjaċir però, f’xi pajjiżi x-​Xhieda huma akkużati b’mod falz li huma setta perikoluża li tkisser il-​familji. L-​esperjenza taʼ Rolf-Michael tagħti prova li dan mhux minnu.​—Lhud 4:​12.

Rolf-Michael jgħid li Mattew 6:​33, li jħeġġiġna biex nagħtu prijorità lil miri spiritwali, hu l-​“boxxla” tal-​familja tiegħu li tiggwidahom lejn id-​direzzjoni t-​tajba. Hu u l-​familja tiegħu huma verament grati lejn Jehovah għall-​ħajja ferħana tal-​familja li jgawdu bħala Kristjani. Huma jħossuhom bħalma ħassu s-​salmista li kanta: “Xi nrodd lill-​Mulej għall-​ġid kollu li għamel miegħi?”​—Salm 116:12.

[Kumment f’paġna 9]

Alla jagħti lill-​bnedmin l-​opportunità li jferrħulu qalbu

[Kaxxa f’paġna 9]

Il-​Prinċipji tal-​Bibbja Jagħmlu Xogħolhom

Fost il-​prinċipji Bibliċi li qanqlu lil ħafna biex jabbandunaw vizzji qerrieda huma dawn li ġejjin:

“O intom li tħobbu l-​Mulej, obogħdu l-​ħażen!” (Salm 97:​10, Karm Żammit) Wara li individwu jikkonvinċi ruħu dwar kemm huma ħżiena dawn il-​prattiċi li jistgħu joqtlu u kif ukoll jiżviluppa mibegħda ġenwina għalihom, hu jsibha iktar faċli biex jagħmel dak li jogħġob lil Alla.

“Min jagħmilha maʼ l-​għaref, isir għaref, min imur mal-​boloh, jaqaʼ fl-​hemm.” (Proverbji 13:20) Sabiex jgħid le għad-​drogi u għal sustanzi oħra, dak li jkun irid jagħżel tajjeb il-​kumpanija tiegħu. Jekk jikkultiva ħbiberiji maʼ Kristjani li jappoġġaw id-​deċiżjoni tiegħu dawn se jkunu t’għajnuna kbira.

“Tħabbtu raskom b’xejn. Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” (Filippin 4:​6, 7) Paċi tal-​qalb u tal-​moħħ bħal din ma tistaʼ titqabbel m’ebda ħaġa oħra. U fiduċja bħal din f’Alla permezz tat-​talb tgħin lil dak li jkun biex jittratta l-​problemi tal-​ħajja mingħajr ma jirrikorri għad-​drogi.