“Ibqgħu Għassa”

FI ŻMIEN l-​antik, kien hemm uħud li kienu joqogħdu għassa mal-​bibien tal-​belt u d-​dħul tat-​tempju u, xi drabi, mal-​bibien taʼ djar privati. Barra li kienu jagħmlu ċert li l-​bibien ikunu magħluqin bil-​lejl, dawn l-​irġiel riedu wkoll joqogħdu għassa. Dan l-​inkarigu kien iġorr responsabbiltà kbira miegħu, għax is-​sigurtà tal-​belt kienet tiddependi mill-​għajta tagħhom biex iwissu dwar il-​periklu li jkun ġej.

Ġesù Kristu wkoll kien familjari max-​xogħol taʼ l-​għassiesa tal-​bibien. F’okkażjoni minnhom, hu xebbah lid-​dixxipli tiegħu mal-​qaddejja li jkunu mal-​bibien u inkuraġġiehom sabiex jibqgħu għassa għat-​tmiem tas-​sistema Lhudija. Hu qal: “Ibqgħu għassu, ibqgħu mqajmin, għax ma tafux meta hu ż-​żmien stabbilit. Hu bħal raġel li siefer u ħalla daru u . . . ordna lil tal-​bieb jibqaʼ għassa. Għalhekk, ibqgħu għassa, għax ma tafux meta ġej sid id-​dar.”—Marku 13:​33-35.

Bl-istess mod, għal iktar minn 125 sena, dan il-​ġurnal, It-​Torri taʼ l-​Għassa, wassal il-​kliem inkuraġġanti taʼ Ġesù sabiex ‘nibqgħu għassa.’ Kif? Bħalma hemm imniżżel f’paġna 2 taʼ din ir-​rivista, “It-​Torri taʼ l-​Għassa joqgħod attent għall-​ġrajjiet tad-​dinja hekk kif dawn iwettqu l-​profezija tal-​Bibbja. Ifarraġ lill-​popli kollha bl-​aħbar tajba li s-​Saltna t’Alla dalwaqt se teqred lil dawk li jgħakksu lil bnedmin sħabhom u li din se tbiddel l-​art f’ġenna.” It-​Torri taʼ l-​Għassa, li d-​distribuzzjoni tiegħu madwar id-​dinja hija taʼ 26,000,000 kopja b’150 lingwa, huwa l-​iktar rivista reliġjuża mqassma fid-​dinja. Permezz t’hekk, ix-​Xhieda taʼ Ġeħova, bħall-​għassiesa tal-​bibien fiż-​żminijiet tal-​qedem, qed iħeġġu lin-​nies kullimkien sabiex ‘jibqgħu għassa’ spiritwalment għax is-​Sid, Ġesù Kristu, dalwaqt jerġaʼ jiġi u jesegwixxi ġudizzju fuq din is-​sistema.—Marku 13:​26, 37.