Int Titkellem maʼ Dawk li Tħobb?

“L-​ABBILTÀ biex nikkomunikaw mal-​maħbubin tagħna qed tonqos bil-​kbir,” jirrapporta Polityka, il-​ġurnal Pollakk li joħroġ kull ġimgħa. Fl-​Istati Uniti, ġie kalkulat li l-​miżżewġin iqattgħu biss sitt minuti kuljum f’konversazzjoni taʼ kwalità bejniethom. Xi awtoritajiet jaħsbu li nofs is-​separazzjonijiet u d-​divorzji kollha li hawn huma riżultat taʼ din l-​abbiltà li dejjem qed tonqos.

Xi ngħidu għal konversazzjoni bejn il-​ġenituri u l-​ulied? F’ħafna każi, “jispiċċa jkun hemm, mhux konversazzjoni, imma interrogazzjoni: Kif mort l-​iskola? Kif inhuma sħabek?” josserva r-​rapport li ssemma qabel. Ikompli jistaqsi: “Kif jistgħu wliedna jitgħallmu jiżviluppaw rabtiet emozzjonali?”

Kif nistgħu aħna ntejbu l-​abbiltà tagħna li nitkellmu ladarba s-​sengħa għal komunikazzjoni tajba ma tiġix awtomatikament? Id-​dixxiplu Kristjan Ġakbu tana parir importanti: “Kull bniedem irid ikun ħafif biex jismaʼ, tqil biex jitkellem, tqil biex jinkorla.” (Ġakbu 1:19) Iva, biex ikollna konversazzjoni li tibni, irridu nisimgħu b’attenzjoni mhux naqbżu fin-​nofs bla paċenzja jew naslu għall-​konklużjonijiet. Evita li tikkritika għaliex dan faċilment jistaʼ jwaqqaf il-​konversazzjoni. Iktar minn hekk, Ġesù kien jagħmel mistoqsijiet bit-​tattika, mhux biex jisforza lis-​semmiegħa tiegħu ħalli jagħtuh xi informazzjoni, imma biex joħroġ x’kien hemm f’qalbhom u biex isaħħaħ ir-​rabta taʼ bejniethom.​—Proverbji 20:5; Mattew 16:​13-​17; 17:​24-​27.

Il-fatt li tapplika l-​prinċipji mill-​aqwa misjubin fil-​Bibbja se jgħinek tieħu l-​inizjattiva biex titkellem u tikkomunika maʼ dawk li huma għeżież għalik. Dan jistaʼ jirriżulta f’relazzjoni kollha mħabba li tibqaʼ għażiża għal ħafna snin—saħansitra għal dejjem.