“Ma Għamlux Kompromess”

ĠESÙ KRISTU qal lid-​dixxipli tiegħu: “Henjin intom meta n-​nies iżebilħukom u jippersegwitawkom u bil-​gideb jgħidu kull xorta taʼ ħażen kontrikom minħabba fija.” (Mattew 5:​11) Ix-​Xhieda taʼ Ġeħova llum huma ferħanin għaliex, fi qbil mat-​tagħlim u l-​eżempju taʼ Kristu, huma jibqgħu separati “mid-​dinja” u jżommu newtralità stretta fil-​politika u l-​integrità lejn Alla f’kull xorta taʼ ċirkustanza.​—Ġwanni 17:14; Mattew 4:​8-​10.

Rigward il-​waqfa bla kompromess li ħadu x-​Xhieda taʼ Ġeħova f’dik li qabel kienet l-​Unjoni Sovjetika, inkluż dawk fl-​Estonja, Toomas Paul, teologu Luteran u traduttur tal-​Bibbja, kiteb fil-​ktieb tiegħu Kirik keset küla (Il-Knisja f’Nofs ir-​Raħal): “Ftit nies semgħu dwar dak li ġara kmieni fil-​għodu nhar l-​1 t’April, 1951. Kien hemm pjan biex ix-​Xhieda taʼ Ġeħova u dawk li jappoġġawhom jiġu deportati​—b’kollox 279 persuna nqabdu u ntbagħtu s-​Siberja . . . Huma ngħataw opportunità biex jiffirmaw formola ġenerali li fiha kienu jiċħdu l-​fidi tagħhom, u b’hekk jevitaw li jiġu deportati u mitfugħin il-​ħabs. . . . Flimkien maʼ dawk li diġà kienu ġew arrestati, kien hemm 353 fil-​ħabs, inkluż minn taʼ l-​inqas 171 individwu li kienu biss qed jassoċjaw mal-​kongregazzjonijiet tagħhom. Ma għamlux kompromess​—anki fis-​Siberja. . . . Ma tantx kien hemm membri tal-​Knisja [Luterana fl-​Estonja] li kellhom fidi bħal tax-​Xhieda taʼ Ġeħova.”

Ix-Xhieda taʼ Ġeħova madwar id-​dinja jafdaw f’Alla biex jgħinhom jibqgħu leali u ubbidjenti lejh minkejja l-​persekuzzjoni. Huma jifirħu għax jafu li l-​premju għal-​lealtà tagħhom hu kbir.​—Mattew 5:​12.