Int Bħas-​Siġra Lagani Auna?

F’RAĦAL mat-​truf taʼ Port Moresby, f’Papwa Ginea l-​Ġdida, żewġ evanġelizzaturi kienu sejrin lura d-​dar mix-​xogħol tagħhom taʼ l-​ippridkar. Huma u mexjin raw siġra mill-​isbaħ. “Ara, lagani auna!” qal l-​akbar wieħed minnhom. Dar fuq sieħbu iżgħar minnu u kompla jgħidlu: “Dan l-​isem ifisser ‘siġra taʼ kull sena.’ Kuntrarju għal ħafna mis-​siġar oħra tat-​tropiċi, din is-​siġra kull sena titlef il-​weraq u tidher li hi mejta. Madankollu, hekk kif tiġi x-​xita, tieħu r-​ruħ, toħroġ il-​fjuri, u terġaʼ turi s-​sbuħija tagħha.”

Hemm lezzjoni x’nitgħallmu mil-​lagani auna, jew bħalma hi magħrufa l-​iktar, il-​ponċjana rjali. Skond xi esperti, hi kunsidrata bħala waħda mill-​isbaħ ħames siġriet li jagħmlu l-​fjuri fid-​dinja. Għalkemm fl-​istaġun tan-​nixfa twaqqaʼ l-​fjuri u l-​weraq, is-​siġra taħżen provvista taʼ ilma. Is-​sistema taʼ l-​għeruq tagħha hi b’saħħitha u l-​għeruq kapaċi jikbru madwar blat li jkun fil-​fond taħt l-​art. B’hekk, bħal ankra jkollha qabda soda kontra rwiefen qawwijin. Fil-​qosor, din tiffjorixxi billi tagħmel l-​aħjar li tistaʼ f’ċirkustanzi diffiċli.

Aħna nistgħu nsibu lilna nfusna f’ċirkustanzi li jġarrbu l-​kwalità tal-​fidi tagħna. X’se jgħinna nissaportu? Bħal-​lagani auna, aħna nistgħu ndaħħlu ġo fina u naħżnu l-​ilma li jagħti l-​ħajja tal-​Kelma t’Alla. Għandna wkoll naqbdu qabda soda mal-​“blata” tagħna, Ġeħova, kif ukoll maʼ l-​organizzazzjoni tiegħu. (2 Samwel 22:2 [22:​3, NW]) Verament, il-​lagani auna hija tfakkira mill-​isbaħ li anki f’ambjent aħrax nistgħu nżommu s-​saħħa u s-​sbuħija spiritwali tagħna jekk nieħdu vantaġġ mill-​provvedimenti li Ġeħova jagħmel disponibbli. B’dan il-​mod, aħna se ‘nirtu l-​wegħdi’ li hu għamel, inkluż il-​wegħda taʼ ħajja taʼ dejjem.​—Ebrej 6:​12; Rivelazzjoni 21:4.