Tixtieq li Jkollok Ħbieb Ġenwini?

IL-​MAĠĠURANZA min-​nies jixtiequ li jkollhom ħbieb ġenwini. Il-​fatt li tkun tistaʼ taqsam l-​esperjenzi tiegħek maʼ ħbieb tal-​qalb jagħmel il-​ħajja iktar pjaċevoli. Imma kif tistaʼ ssib ħbiberija ġenwina? Kważi 2,000 sena ilu, Ġesù wera li ċ-​ċavetta għas-​suċċess fir-​relazzjonijiet kollha tal-​bnedmin hija l-​imħabba mhix egoistika. Hu għallem: “Bħalma tridu li l-​bnedmin jagħmlulkom, agħmlu l-​istess lilhom.” (Luqa 6:​31) Din l-​istqarrija, spiss imsejħa r-​Regola tad-​Deheb, turi li trid tkun persuna ġeneruża u mhux egoista biex ikollok il-​ħbieb. Bażikament, biex ikollok ħabib trid tkun ħabib. Kif?

Ħbiberija mill-​qalb u siewja ma tinbitx mil-​lejl għan-​nhar. Wara kollox, il-​ħbieb huma ħafna iktar minn sempliċi nies li nafuhom. Huma individwi li tintrabat magħhom emozzjonalment. Jeħtieġ sforz biex tiżviluppa u żżomm rabtiet mill-​qrib. Il-​ħbiberija spiss teħtieġ li tpoġġi l-​bżonnijiet taʼ sieħbek qabel il-​konvenjenza tiegħek. Il-​ħbieb jaqsmu mhux biss il-​ferħ imma wkoll id-​diżappunti.

Ħbiberija vera tintwera partikolarment meta jingħata appoġġ emozzjonali u prattiku lil persuna li tkun fil-​bżonn. Proverbji 17:17 jistqarr: “Il-​ħabib iħobbok kull ħin, bħal ħuk imwieled għal żmien l-​hemm.” Infatti, ir-​rabtiet taʼ ħbiberija jistgħu saħansitra jkunu iktar b’saħħithom mir-​rabtiet tal-​familja. Proverbji 18:24 jinnota: “Hemm ħbieb taʼ l-​isem biss; ħabib tassew jintrabat miegħek aktar minn ħuk.” Tixtieq issir taf iktar kif tistaʼ tikkultiva ħbiberiji ġenwini bħal dawn? Tixtieq issir parti minn grupp taʼ nies li huma magħrufin għall-​imħabba li għandhom bejniethom? (Ġwanni 13:35) Jekk iva, ix-​Xhieda taʼ Ġeħova fil-​komunità tiegħek se jieħdu pjaċir juruk kif tistaʼ ssib ħbieb veri.