“Kemm Inħobbha l-Liġi Tiegħek!”
SALM 119 hija għanja li tesprimi s-sentimenti tal-kompożitur għall-messaġġ, jew għall-kelma, ispirat t’Alla. Is-salmista għanna: “Jien żammejt kelmtek f’qalbi.” “Bil-kmandamenti tiegħek irrid nitgħaxxaq.” “Tinfena qalbi l-ħin kollu bix-xewqa tad-digrieti tiegħek.” “[“It-tfakkiriet,” NW] tiegħek huma l-għaxqa tiegħi.” “Ara kif jiena mxennaq [“għall-ordnijiet,” NW] tiegħek.” “Nitgħaxxaq bil-kmandamenti tiegħek, li jiena ħabbejt.” “Naħseb fuq [“ir-regolamenti,” NW] tiegħek. “Kemm inħobbha l-liġi tiegħek! Il-jum kollu ħsiebi fiha.”—Korsiv tagħna; Salm 119:11, 16, 20, 24, 40, 47, 48, 97.
X’apprezzament profond kellu s-salmista għall-kelma rivelata t’Alla! Tħossok int bl-istess mod għall-messaġġ tal-Kelma t’Alla, il-Bibbja? Tixtieq li tikkultiva għaxqa hekk kbira għaliha? Jekk tixtieq, l-ewwel li għandek tagħmel hu li tifforma xenqa biex taqra l-Bibbja regolarment, kuljum jekk possibbli. Ġesù Kristu qal: “Il-bniedem mhux bil-ħobż biss jgħix, imma b’kull kelma li toħroġ minn fomm Ġeħova.” (Mattew 4:4) It-tieni, għandek bżonn timmedita dwar dak li tkun qed taqra. Jekk tirrifletti fuq il-verità dwar Alla, il-kwalitajiet tiegħu, ir-rieda tiegħu, u l-iskopijiet tiegħu l-apprezzament tiegħek għall-Bibbja se jikber. (Salm 143:5) U l-iktar importanti hu li tqiegħed fil-prattika l-pariri siewja tagħha fil-ħajja taʼ kuljum.—Luqa 11:28; Ġwanni 13:17.
Kif se tibbenefika talli tikkultiva għaxqa lejn il-Bibbja? “Henjin dawk li jħarsu [“it-tfakkiriet,” NW] tiegħu [t’Alla],” jgħid Salm 119:2. It-tfakkiriet li nsibu fil-Bibbja se jgħinuk tkampa b’suċċess mal-problemi tal-ħajja. (Salm 1:1-3) Int se tikseb għerf, dehen, u fehma, u dan se jgħinek biex ‘twarrab minn kull triq ħażina.’ (Salm 119:98-101) L-għarfien tal-verità dwar Alla u l-iskop tiegħu għal fuq l-art se jagħmel il-ħajja tiegħek iktar siewja u se jġagħlek tħares lejn il-futur b’tama eċċitanti.—Isaija 45:18; Ġwanni 17:3; Rivelazzjoni 21:3, 4.
Ix-Xhieda taʼ Ġeħova huma tassew interessati biex jgħinu lil oħrajn jitgħallmu iktar dwar il-Bibbja u jiżviluppaw imħabba għall-messaġġ tagħha. Aħna nistidnuk mill-qalb biex taċċetta l-offerta t’hawn taħt.