Il-Milied—Liema Xejra Qed Jieħu?
“IT-TFITTXIJA għall-Milied.” Dan ix-xahar għaxar snin ilu, ir-rivista U.S News & World Report kellha dan it-titlu fuq il-qoxra. L-artiklu ffoka fuq jekk il-Milied kienx qed isir “iktar safi, inqas kummerċjali.” Qegħdin l-affarijiet jieħdu din ix-xejra?
L-artiklu għenna nifhmu għala m’għandniex nistennew li dan iseħħ. Dan qal: “M’hemm ebda evidenza t’osservanza uffiċjali tat-twelid taʼ Kristu sar-rabaʼ seklu, meta Kostantinu . . . kien l-imperatur taʼ Ruma.” Dan juri “li parti mir-raġuni hi li ħadd ma kien jaf eżatt meta twieled Ġesù.” L-artiklu ammetta li “l-evanġelji ma jgħidu xejn dwar is-sena, aħseb u ara dwar ix-xahar jew il-ġurnata eżatta.” Skond kittieb taʼ l-istorja mill-Università taʼ Texas, “il-Kristjani tal-bidunett sempliċement ma kinux interessati f’li jiċċelebraw it-Twelid taʼ Ġesù.”
Taħt is-sottitlu “Kwistjoni taʼ Inċertezza,” l-artiklu kkunsidra “kif il-knisja waslet għad-data tal-25 taʼ Diċembru.” Dan irrikonoxxa: “Dak li hu l-iktar aċċettat hu li l-festa kienet intenzjonata biex il-festa taʼ Saturnalja u festi pagani oħrajn jiġu ‘Kristjanizzati.’” “Billi bdew jiċċelebraw il-Milied lejn l-aħħar taʼ Diċembru, meta n-nies kienu diġà mdorrijin jiċċelebraw, il-mexxejja tal-knisja assiguraw ruħhom li din l-osservanza tat-twelid tas-Salvatur tkun imxerrda maʼ kullimkien.” F’nofs is-seklu 19, l-enfasi nbidlet għal fuq ix-xiri u l-għoti taʼ rigali. “It-tradizzjoni l-ġdida taʼ l-għoti tar-rigali tal-Milied ħolqot sors taʼ ġid f’ħakka t’għajn, u n-negozjanti u dawk li jirreklamaw malajr bdew jippromwovu l-istaġun.”
Għaldaqstant, m’hemm ebda raġuni għala għandna nistennew li l-Milied se jieħu xi xejra oħra għajr li jitbiegħed mill-Kristjanità vera. Filwaqt li l-Milied modern qiegħed “ilellex bil-kummerċjaliżmu,” il-fatt hu li l-Kristjani veri qatt ma stennew li kienu se jiċċelebraw it-twelid taʼ Ġesù. Minflok, il-Bibbja tenfasizza l-fidwa li pprovda Kristu permezz tal-mewt tiegħu u l-irxoxt tiegħu fis-sema. (Mattew 20:28) Dan se jibqaʼ tassew importanti għall-eternità.