Ix-​Xewqa t’Adryana

ADRYANA, tifla taʼ sitt snin minn Tulsa, Oklahoma, l-​Istati Uniti, kellha xewqa. Kienet simili għax-​xewqa tas-​salmista David, li għanna: “Ħaġa waħda tlabt lill-​Mulej, ħaġa waħda nfittex: li ngħammar f’dar il-​Mulej tul il-​jiem kollha taʼ ħajti; biex nitgħaxxaq bil-​ħlewwa tal-​Mulej jien u nħares lejn it-​tempju tiegħu.”​—Salm 27:4.

Meta Adryana kellha biss sitt xhur, minn dijanjosi skoprew li għandha n-​newroblastoma, tumur qalil li jikber f’partijiet tas-​sistema tan-​nervituri. Il-​marda li heddet il-​ħajja tagħha ħallietha paralizzata minn saqajha t-​tnejn. It-​tobba kkuraw il-​kundizzjoni tagħha b’għadd t’operazzjonijiet u permezz taʼ kimoterapija għal sena sħiħa.

Missier Adryana, li m’għandux l-​istess twemmin reliġjuż t’Adryana u ommha, ikkuntattja ċerta fondazzjoni biex jitlob li bintu żżur xi lunapark famuż mad-​dinja kollha. Qabel ma qatgħetlu xewqtu, il-​fondazzjoni intervistat lil Adryana. Hi wriet l-​apprezzament tagħha talli kkunsidrawha imma qaltilhom li kienet tippreferi żżur il-​Betel, iċ-​ċentru taʼ l-​attività globali tax-​Xhieda taʼ Ġeħova fi New York. Wara li saret taf bir-​rikjesta taʼ missierha, Adryana talbet lil Ġeħova biex jagħtiha l-​opportunità li żżur il-​Betel. Għalkemm għall-​ewwel kienu inkwetati li l-​Betel ma kinitx post interessanti biżżejjed għat-​tfal, dawk tal-​fondazzjoni qatgħu x-​xewqa t’Adryana meta missierha m’opponiex l-​għażla tagħha.

Flimkien m’ommha, oħtha, u ħabiba, Adryana vvjaġġat lejn New York biex iżżur il-​Betel għall-​ewwel darba. “Ġeħova wiġibni,” qalet Adryana. “Kont naf li kien se jilqagħna fil-​Betel. Rajt kif isiru l-​kotba, ir-​rivisti, u l-​Bibbji. Hu post isbaħ minn lunapark.”

Adryana ‘tgħaxxqet bil-​ħlewwa tal-​Mulej’ u ħarset b’apprezzament fuq kif jaħdem iċ-​ċentru taʼ l-​attivitajiet tan-​nies taʼ Ġeħova llum. Int ukoll mistieden biex iżżur il-​Betel. Minbarra l-​kwartieri ġenerali tax-​Xhieda taʼ Ġeħova fi New York, hemm uffiċċji tal-​fergħa f’diversi partijiet oħrajn tad-​dinja.