“Għala, Mulej, Bqajt Sieket?”
DAN kien il-kliem tal-Papa Benedettu XVI, li fit-28 taʼ Mejju, 2006 żar dak li qabel kien kamp tal-konċentrament f’Auschwitz, il-Polonja. Fil-post fejn in-Nazi qatlu mijiet t’eluf taʼ Lhud u oħrajn, hu stqarr: “Kemm iqumu mistoqsijiet f’dan il-post! Darba wara l-oħra tqum il-mistoqsija: Alla fejn kien f’dawk il-jiem? Għala baqaʼ sieket? Kif setaʼ jippermetti dan il-qtil kollu, din ir-rebħa tal-ħażen? . . . Għandna nkomplu nsejħu lil Alla bl-umiltà imma fl-istess ħin b’persistenza: Ħu azzjoni! Tinsiex lill-bnedmin, il-ħolqien tiegħek!”
Id-diskors tal-papa qanqal ħafna reazzjonijiet. Xi wħud innotaw li l-papa bi skop evita li jitkellem dwar ċerti suġġetti, bħal per eżempju dwar l-anti-Semitiżmu li kien marbut maʼ l-atroċitajiet li seħħew f’Auschwitz. Oħrajn interpretaw il-kliem tiegħu bħala attentat biex jimminimizza t-talba tal-Papa Ġwanni Pawlu II għall-maħfra tad-dnubiet li kkommettiet il-knisja. Filippo Gentiloni, ġurnalist Kattoliku, osserva: “Madankollu, kien jagħmel sens li meta ħafna kummentaturi ġew iffaċċjati bil-mistoqsija diffiċli rigward fejn kien Alla—mistoqsija mingħajr tweġiba—minflok, riedu tweġiba għall-mistoqsija iktar faċli: Fejn kien Piju XII?” Il-kummentaturi kienu qed jirreferu għall-Papa Piju XII, li baqaʼ sieket matul l-Olokawst.
L-Olokawst u l-atti l-oħrajn kollha taʼ ġenoċidju li saru matul l-istorja tal-bniedem taw prova li “bniedem jaħkem fuq ieħor u jagħmillu l-ħsara.” (Koħèlet 8:9) Barra minn hekk, il-Ħallieq tal-bnedmin ma qagħadx fis-skiet matul dawn l-atti terribbli kollha. Permezz tal-paġna tal-Bibbja, hu kixef ir-raġunijiet tiegħu għala jippermetti l-ħażen. Alla assigurana wkoll li ma nesiex lill-bnedmin. Fil-fatt, il-perijodu taʼ żmien li fih Alla ppermetta lill-bniedem jaħkem lilu nnifsu daqt se jiġi fi tmiem. (Ġeremija 10:23) Tixtieq tkun taf iktar dwar l-iskop t’Alla għalina? Ix-Xhieda taʼ Ġeħova jieħdu pjaċir jgħinuk tara t-tweġiba tal-Bibbja għall-mistoqsijiet li ħawdu lill-Papa Benedettu XVI.
[Sors tal-Istampa f’paġna 32]
Oświęcim Museum