Taħtaf Int Opportunitajiet biex Taqsam m’Oħrajn it-​Twemmin Tiegħek?

“TEŻISTI l-​verità assoluta?” Dan kien is-​suġġett li ntgħażel biex isir komponiment għal kompetizzjoni nazzjonali fil-​Polonja. L-​istruzzjonijiet għal dan il-​komponiment kienu jgħidu: “M’għandniex bżonn il-​verità assoluta. Ħadd m’għandu bżonnha. Wara kollox, m’hemmx verità assoluta.” Agata, studenta taʼ 15-il sena u li hi waħda mix-​Xhieda taʼ Ġeħova, iddeċidiet li tuża din l-​opportunità sabiex taqsam m’oħrajn it-​twemmin reliġjuż tagħha.

Biex tipprepara għal dan il-​komponiment, Agata l-​ewwel m’għamlet kien li talbet lil Ġeħova għall-​gwida, u mbagħad bdiet tiġbor il-​materjal dwar is-​suġġett. Hi sabet informazzjoni relatata fil-​Watchtower taʼ l-​1 taʼ Lulju, 1995. Hi kkwotat il-​mistoqsija li Ponzju Pilatu għamel lil Ġesù: “X’inhi l-​verità?” (Ġwanni 18:38) Hi qalet li dik il-​mistoqsija kienet tirrifletti attitudni xettika, bħallikieku: ‘Il-​verità? X’inhi din? M’hemmx verità!’ Agata kitbet: “Il-​mistoqsija li għamel Pilatu tfakkarni fl-​istruzzjonijiet tal-​komponiment.”

Wara hi ddiskutiet l-​iżvilupp tar-​relattiviżmu​—l-​idea li dik li hi verità għal persuna tistaʼ ma tkunx verità għal persuna oħra u li t-​tnejn jistgħu jkunu qed jgħidu “s-​sewwa.” Hi staqsiet xi mistoqsijiet bħal, “Min minna se jissogra jitlaʼ fuq ajruplan li kieku ma kienx jemmen li l-​liġijiet taʼ l-​ajrudinamika huma veritajiet assoluti?” Imbagħad hi rreferiet għall-​Bibbja u qalet: “Il-​fatt hu li l-​Bibbja fiha fatti li tistaʼ tivverifikahom li jagħtu bażi soda lil dak li jkun biex jistrieħ fuqha.” Hi esprimiet it-​tama tagħha li min b’mod sinċier ifittex il-​verità assoluta jkollu biżżejjed paċenzja biex isibha.

Agata rebħet diploma speċjali u kellha l-​opportunità biex tagħti preżentazzjoni quddiem il-​klassi kollha. Xi wħud minn sħabha tal-​klassi aċċettaw l-​offerta tagħha biex tistudja l-​Bibbja magħhom. Agata hija grata li hi użat din l-​opportunità biex taqsam maʼ ħafna oħrajn it-​twemmin tagħha. Iva, li nkunu attenti għall-​opportunitajiet biex nitkellmu dwar il-​fidi tagħna jistaʼ jipproduċi l-​frott. Liema opportunitajiet tistaʼ taħtaf int?