Soluzzjoni Għaqlija

TLIET żgħażagħ fl-​Afrika Ċentrali riedu jattendu konvenzjoni distrettwali fil-​lokalità tagħhom. Kif kienu se jaslu hemmhekk? Il-​konvenzjoni kienet kważi 90 kilometru ’l bogħod u t-​toroq kienu mħarbtin u kollhom trab, u ma kellhomx trasport. Huma ddeċidew li jissellfu tliet roti imma ma sabux roti adattati għall-​vjaġġ.

Anzjan fil-​kongregazzjoni lokali sar jaf bil-​problema tagħhom u offrielhom ir-​rota tiegħu, li għalkemm qadima kienet f’kundizzjoni tajba. Spjegalhom kif hu u oħrajn fil-​passat kienu organizzaw lilhom infushom biex jaslu għall-​konvenzjoni. L-​anzjan tahom parir biex jużaw rota waħda bejn it-​tlieta li huma. Soluzzjoni sempliċi, imma kienet tirrikjedi organizzazzjoni tajba. Dan kif setaʼ jirnexxi?

Biex jevitaw ix-​xemx tikwi, dawn l-​aħwa żgħażagħ iltaqgħu kmieni fil-​għodu u għabbew l-​affarijiet li kienu se jieħdu magħhom fuq ir-​rota. L-​ewwel wieħed li rikeb fuqha telaq jaqdef ’il quddiem, u t-​tnejn l-​oħra bdew mexjin b’pass mgħaġġel warajh. Wara madwar 500 metru, dak li kien fuq ir-​rota waqaf u serraħ ir-​rota mgħobbija maʼ siġra. M’għandniex xi ngħidu, hu qagħad attent biex ir-​rota jagħmilha f’post fejn setgħu jarawha t-​tnejn l-​oħra li ma jkunx hemm xi ħadd li jiħodha. L-​ewwel wieħed kompla l-​vjaġġ bil-​mixi.

Meta t-​tnejn l-​oħra waslu ħdejn ir-​rota, wieħed minnhom rikeb fuqha u l-​ieħor baqaʼ miexi xi 500 metru ieħor qabel ma kien imiss lilu biex jirkeb. Għalhekk, permezz taʼ ppjanar tajjeb u determinazzjoni, it-​tliet żgħażagħ setgħu jnaqqsu l-​mixi tagħhom minn 90 kilometru għal madwar 60 kilometru. L-​isforz li għamlu kien vallapena. Huma ltaqgħu maʼ ħuthom il-​Kristjani fil-​konvenzjoni u gawdew festa taʼ ikel spiritwali. (Dt. 31:12) Din is-​sena, se tagħmel int kulma tistaʼ biex tattendi l-​konvenzjoni distrettwali fil-​lokalità tiegħek?