Ix-Xhieda taʼ Ġeħova nisa jgħallmu?

Iva. Madwar id-​dinja hemm miljuni taʼ Xhieda taʼ Ġeħova nisa li jippritkaw l-​aħbar tajba tas-​Saltna t’Alla. Salm 68:11 jgħid: ‘Ġeħova jagħti l-​kmand; in-​nisa li qed ixandru l-​aħbar tajba huma armata kbira.’

Imma dak li jagħmlu dawn in-​nisa hu differenti minn dak li jagħmlu mexxejja reliġjużi nisa oħra. Kif?

Mexxejja reliġjużi nisa normalment jgħallmu fil-​knisja tagħhom biss. Imma x-​Xhieda taʼ Ġeħova nisa jippritkaw lil dawk li mhumiex fil-​kongregazzjoni tagħhom, jiġifieri lil dawk li jiltaqgħu magħhom minn dar għal dar u f’postijiet oħra.

Xi ħaġa differenti oħra hi li fil-​kongregazzjoni tax-​Xhieda taʼ Ġeħova rġiel biss jintgħażlu biex jgħallmu. Allura n-​nisa ma jgħallmux fil-​laqgħat meta jkun hemm irġiel mgħammdin.—1 Timotju 3:2; Ġakbu 3:1.

Il-​Bibbja tgħid li rġiel biss jistgħu jaqdu bħala anzjani biex jieħdu ħsieb il-​kongregazzjoni. Pereżempju, Pawlu saqsa lil Titu biex ‘jaħtar anzjani f’belt wara l-​oħra.’ Hu qallu wkoll li kull raġel “m’għandux ikollu fuqiex jiġi akkużat” u “jkun raġel taʼ mara waħda.” (Titu 1:5, 6) Pawlu qal xi ħaġa simili lil Timotju: “Jekk raġel qed jirsisti għal kariga taʼ indokratur, ikun jixtieq xogħol tajjeb. Għalhekk, l-​indokratur għandu jkun bniedem li ma ssibx xi tgħid fih, raġel taʼ mara waħda, . . . kwalifikat biex jgħallem.”—1 Timotju 3:1, 2.

Għala l-​irġiel biss għandhom ikunu anzjani? Pawlu qal: “Ma nippermettix li mara tgħallem, jew li teżerċita awtorità fuq raġel, imma li toqgħod siekta. Għax Adam intgħamel l-​ewwel, imbagħad Eva.” (1 Timotju 2:12, 13) Dan juri li Alla ried li l-​irġiel imexxu u jgħallmu fil-​kongregazzjoni.

Ix-​Xhieda taʼ Ġeħova kollha jimitaw l-​eżempju tal-​Mexxej tagħhom, Ġesù Kristu. Luqa kiteb hekk dwar Ġesù: “Beda jivvjaġġa minn belt għal belt u minn raħal għal raħal, jippriedka u jxandar l-​aħbar tajba tas-​saltna t’Alla.” Ġesù qal lid-​dixxipli tiegħu biex huma wkoll imorru jippritkaw. Għalhekk huma “daru t-​territorju, minn raħal għal raħal, ixandru l-​aħbar tajba.”—Luqa 8:1; 9:2-​6.

Illum il-​ġurnata, ix-​Xhieda taʼ Ġeħova kollha, irġiel u nisa, jagħmlu dak kollu li jistgħu biex jobdu lil Ġesù: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.”—Mattew 24:14.