Żomm is-Saltna l-Ewwel
1 Li npoġġu s-Saltna t’Alla l-ewwel f’ħajjitna u nżommuha fl-ewwel post m’huwiex faċli meta nkunu qed niffaċċjaw pressjonijiet ekonomiċi jew problemi oħrajn. Kif nistgħu nżommu s-Saltna l-ewwel meta jinqalgħu d-diffikultajiet? Xi ngħidu jekk xi ħadd joffrilna xogħol li minħabba fih ikollna nitilfu xi laqgħat jew li jkun t’ostaklu għas-servizz taʼ l-għalqa? F’dak il-każ, għandha s-Saltna tieħu t-tieni post f’ħajjitna?
2 Fidi Soda Hija Neċessarja: Meta l-fidi tagħna tkun imġarrba b’ċirkustanzi bħal dawn, m’għandniex ninsew il-wegħda taʼ Jehovah u l-assiguranza li tana Ġesù li jekk aħna nfittxu s-Saltna l-ewwel se jkollna l-appoġġ divin. (Salm 37:25; Mt. 6:31-34) L-influwenzi u l-pressjonijiet tad-dinja jistgħu jċajprulna l-vista tagħna u ma jħalluniex inżommu s-Saltna fuq quddiemnett. Xi wħud ħallew il-prospetti taʼ li jkollhom pożizzjoni iktar għolja f’xogħolhom jew dħul finanzjarju aħjar isiru l-affarijiet prinċipali f’ħajjithom. Madankollu, bħal Pawlu, għandna bżonn naħsbu sew u fil-fond dwar x’inhu verament taʼ valur fil-ħajja.—Flp. 3:7, 8.
3 Hemm Bżonn Xi Bidliet?: Waħda pubblikatriċi qalet: “Kont moħħni biss fin-negozju tiegħi—kien l-iktar ħaġa li kont ngħożż. Ħassejt li xorta stajt inkun waħda mix-Xhieda billi fl-istess waqt niddedika l-biċċa l-kbira mill-ħin tiegħi fl-affarijiet tan-negozju.” Iżda ripetutament kienet tħoss il-kuxjenza tniggiżha għax setgħet tagħmel iktar biex taqdi lil Jehovah. Maż-żmien, telqet in-negozju li kien qed ikun t’ostaklu għall-progress spiritwali tagħha. Meta ddedikat ruħha kompletament għax-xogħol tas-Saltna, hi setgħet tgħid: “Issa nħoss li ħajti hija taʼ suċċess f’għajnejn Jehovah, u fuq kollox dan hu li jiswa verament.”
4 B’mod taʼ min ifaħħru, ħafna ħallew warajhom karrieri sekulari u prospetti taʼ li jaqilgħu iktar finanzjarjament, issimplifikaw ħajjithom, u daħlu fis-servizz full-time. Żgħażagħ mhux miżżewġin li jaqdu bħala qaddejja ministerjali u anzjani u li attendew l-Iskola tat-Taħriġ Ministerjali, għamlu dan u qed igawdu privileġġi sbieħ taʼ servizz. Huma jimitaw l-eżempju mill-aqwa taʼ Pawlu, u jinsabu kuntenti ġenwinament bi bżonnijiet materjali bażiċi.—1 Kor. 11:1; 1 Tim. 6:6-8; Lhud 13:5.
5 Filwaqt li d-dinja tistaʼ twaqqaʼ għaċ-ċajt il-mod kif aħna nħarsu lejn il-ħajja, aħna għandna l-barka taʼ Jehovah. (1 Kor. 1:26-31) M’huwiex inkuraġġanti l-fatt li nafu li Jehovah se jużana bl-iktar mod sħiħ possibbli u se jgħinna nwettqu x-xogħol tiegħu? L-opportunità li għandna bħalissa biex nipproklamaw is-Saltna stabbilità t’Alla qatt ma se terġaʼ tiġi. Mela issa huwa ż-żmien li nżommu s-Saltna l-ewwel f’ħajjitna.