Ittra Mingħand il-​Ġemgħa li Tiggverna

Għeżież Ħutna:

“GRAZZJA u sliem mingħand Alla Missierna u l-​Mulej Ġesù Kristu.” (1 Kor. 1:3) Kemm nixxennqu għaż-​żmien meta kulma jieħu n-​nifs se jagħti lil Jehovah il-​glorja li ħaqqu! (Salm 150:6) Aħna u nistennew dak iż-​żmien taʼ l-​għaġeb, qed inkomplu nxandru l-​aħbar tajba tas-​Saltna t’Alla u nagħmlu dixxipli.

Ix-xogħlijiet taʼ Jehovah fuq l-​art bħalissa huma ffokati fuq il-​ministeru taʼ l-​evanġelizzar. (Mk. 13:10) Peress li nafu sew kemm Jehovah jinteressah minn dan ix-​xogħol, aħna nitolbuh biex jgħinna nagħmluh, u nirrealizzaw li kull bniedem għandu l-​opportunità li jibbenefika mill-​provvediment tal-​fidwa. (Apk. 14:​6, 7, 14, 15) Veru li niffaċċjaw sfidi, imma kemm aħna grati li ‘mlibbsin bil-​qawwa t’Alla’ biex inwettqu dan il-​ministeru!​—Lq. 24:49.

Inħossuna sodisfatti meta nħarsu lura lejn is-​sena taʼ servizz li għaddiet u nirriflettu fuq dak li Jehovah wettaq permezz tal-​qaddejja leali tiegħu. Bil-​qawwa li ngħataw permezz taʼ l-​ispirtu qaddis, in-​nies t’Alla wrew imħabba bħal taʼ Kristu, u għelbu l-​mibegħda f’kull post fid-​dinja fejn jinsabu. Imħabba bħal din dehret ċar fil-​konvenzjonijiet tagħna. Minn Ġunju sa Diċembru 2003, delegati minn iktar minn mitt pajjiż ivvjaġġaw lejn 32 konvenzjoni internazzjonali li saru f’sitt kontinenti. Missjunarji, qaddejja internazzjonali, u Beteliti f’servizz barrani ġew intervistati fil-​konvenzjonijiet distrettwali u internazzjonali.

F’dawn il-​konvenzjonijiet, irċivejna l-​pubblikazzjonijiet “See the Good Land” (“Ara l-​Art Tajba”) u Learn From the Great Teacher (Tgħallem mill-​Għalliem il-​Kbir). Iktar minn hekk, tħabbar li lejn l-​aħħar tas-​sena tas-​servizz 2004 se joħroġ il-​ktieb rivedut taʼ l-​Iskola tas-​Servizz taʼ Pijunier. Ftit ftit, dawk li ilhom ħafna jaqdu bħala pijunieri u li marru l-​iskola se jattendu l-​klassijiet maʼ dawk li m’ilhomx wisq pijunieri.

Permezz taʼ l-​appoġġ t’Alla u l-​ġenerożità umana setgħu jinbnew ħafna iktar Swali tas-​Saltna, speċjalment f’pajjiżi b’riżorsi limitati. Minħabba li l-​bżonn għall-​ikel spiritwali qed jiżdied madwar id-​dinja kollha, bħalissa għaddejjin ħafna proġetti taʼ tkabbir tal-​fergħat f’ħafna pajjiżi. Il-​browxer Gawdi l-​Ħajja fuq l-​Art Għal Dejjem! issa tistaʼ ssibu b’299 lingwa, b’total taʼ 139 miljun kopja stampata; Għarfien Li Jwassal Għall-​Ħajja Taʼ Dejjem qabeż it-​93 miljun kopja b’161 lingwa; u iktar minn 200 miljun kopja tal-​browxer Alla X’Jirrikjedi Minna? ġew stampati b’267 lingwa.

Nilqgħu minn qalbna l-​258,845 li ssimbolizzaw id-​dedikazzjoni tagħhom bil-​magħmudija taʼ l-​ilma matul is-​sena taʼ servizz li għaddiet! Għalkemm sirtu mira speċjali tal-​mibegħda taʼ Satana minħabba l-​appoġġ tagħkom lis-​Saltna t’Alla, sirtu wkoll mira speċjali tal-​barka u l-​protezzjoni spiritwali taʼ Jehovah hekk kif tiġru t-​triq li għandkom quddiemkom. (Lhud 12:​1, 2; Apk. 12:17) Iva, kunu żguri li ‘ma jongħosx dak li jħariskom.’​—Salm 121:3.

L-iskrittura tas-​sena 2004, “Ishru . . . Kunu lesti,” hija verament f’waqtha. (Mt. 24:​42, 44) Il-​Kristjani huma deskritti fil-​Kelma t’Alla bħala għorba, jew residenti temporanji, f’din is-​sistema li qed tmut. (1 Pt. 2:11; 4:7) Għaldaqstant, hemm bżonn li nibqgħu ffokati, inżommu ħajjitna sempliċi, u neżaminaw qlubna bir-​reqqa. “Id-​Dragun il-​kbir” irid jiblagħna, billi jagħmilna parti mis-​sistema tiegħu.​—Apk. 12:9.

Biex nibqgħu għassa huwa essenzjali li naqraw il-​Bibbja kuljum. Dan il-​qari jistaʼ jgħinna ‘nħallu l-​“iva” tagħna tkun “iva”’ fejn tidħol id-​dedikazzjoni tagħna u “nżommu sħiħa sa l-​aħħar it-​tama li kellna fil-​bidu.” (Ġak. 5:12; Lhud 3:14) Il-​qari tal-​Bibbja kuljum jistaʼ jgħinna niftakru kemm id-​dinja tbiegħdet mil-​livelli t’Alla li ma jinbidlux. (Mal. 3:6; 2 Tim. 3:​1, 13) L-​għarfien mill-​Bibbja jistaʼ jgħinna nwarrbu ‘ħrejjef maħluqin minn moħħ’ xi ħadd u nibqgħu leali lejn Jehovah.​—2 Pt. 1:​16; 3:​11.

Ġenituri, intom u trabbu lil uliedkom fid-​dixxiplina u t-​twiddib taʼ Jehovah, qegħdin tgħinuhom jagħmlu miri spiritwali u ‘jishru’? (Efes. 6:4) Qegħdin tħarrġuhom biex iqisu l-​futur bħalma kien iqis il-​futur tiegħu Ġesù, l-​iktar bniedem għaref li qatt mexa fuq l-​art? Hu setaʼ sar l-​akbar mastrudaxxa, inventur, jew tabib li qatt għex, imma minflok għażel il-​ministeru full-time. Jalla l-​eżempju tiegħu jqanqalkom tgħinu lil uliedkom ipoġġu l-​interessi tas-​Saltna l-​ewwel f’ħajjithom.

Il-klassi tal-​qaddej leali, rappreżentata mill-​Ġemgħa li Tiggverna, hija grata minn qalbha li l-​folla kbira qed tgħinna nwettqu r-​responsabbiltà tagħna biex “l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda.” (Apk. 7:9; Mt. 24:​14, 45) Lilkom għeżież, Jehovah jiżgurakom li jiftakar “dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.” (Lhud 6:10) Hekk kif taqraw l-​esperjenzi eċċitanti u tinnotaw ir-​riżultati taʼ l-​isforzi li għamiltu flimkien, fil-​paġni tat-​2004 Yearbook, kunu afu li kellkom sehem vitali fl-​għoti taʼ din ix-​xiehda mad-​dinja kollha.

Jalla tiffaċċjaw il-​futur bil-​kuraġġ hekk kif tkomplu ‘tħarsu ’l quddiem lejn il-​ħlas,’ u ma tħallu lil ebda bniedem jew demonju jċaħħadkom minnu. (Lhud 11:26; Kol. 2:18) Iva, afdaw f’Jehovah, waqt li tkunu fiduċjużi li hu se jgħin lil dawk kollha li jħobbuh biex jaslu għall-​milja tal-​ħajja.​—Ġw. 6:​48-​54.

Niżgurawkom li ninsabu ferħanin naqdu flimkien magħkom għat-​tifħir tal-​glorja taʼ Jehovah.

Ħutkom,

Il-​Ġemgħa li Tiggverna tax-​Xhieda taʼ Jehovah