Kaxxa għall-​Mistoqsija

◼ Kif għandna nieħdu ħsieb l-​inkarigi fil-​kongregazzjoni?

Il-kongregazzjoni tal-​poplu taʼ Ġeħova timxi bl-​ordni bħala riżultat taʼ sforz min-​naħa taʼ kull membru. (1 Kor. 14:​33, 40) Aħseb ftit x’inhu involut sempliċement f’laqgħa waħda tal-​kongregazzjoni. Minbarra l-​programm innifsu, ikun hemm ħafna attività għaddejja qabel u wara l-​laqgħa hekk kif aħwa rġiel u nisa jieħdu ħsieb diversi inkarigi. Dmirijiet oħra li jsiru minn wara l-​kwinti wkoll huma importanti. Kif jistaʼ kull wieħed minna jgħin f’dan l-​arranġament?

Kun disponibbli. Min juri spirtu li jixtieq jgħin se jsib ħafna x’jagħmel. (Salm 110:​3, Saydon) Aħseb fil-​morda u fl-​anzjani. Għin fit-​tindif tas-​Sala tas-​Saltna. Nistgħu nagħmlu ħafna affarijiet taʼ ġid mingħajr ma joqogħdu jiġu jgħidulna. Kulma rridu huwa xewqa li ngħinu.

Aqdi bil-​modestja. Nies modesti jieħdu pjaċir jaqdu lil oħrajn. (Lq. 9:​48) Il-​modestja se żżommna lura milli naċċettaw iktar responsabbiltajiet minn dawk li nifilħu nġorru b’mod realistiku. Barra minn hekk, il-​modestja se tgħinna biex ma naqbżux il-​limiti taʼ l-​awtorità li jkollna.​—Prov. 11:2.

Kun taʼ min jafdak. Mosè ġie inkuraġġit jagħżel “nies taʼ fiduċja” sabiex jieħdu pożizzjonijiet taʼ responsabbiltà f’Iżrael tal-​qedem. (Eżo. 18:21) Din l-​istess kwalità hija meħtieġa llum. Agħmel kull inkarigu li tirċievi b’mod responsabbli. (Lq. 16:10) Jekk ma tistax tieħu ħsieb xi inkarigu, kun ċert li jsiru arranġamenti xierqa sabiex xi ħadd ieħor jieħu ħsiebu minflokok.

Agħti l-​aħjar tiegħek. Il-​Kristjani huma mħeġġin biex jaħdmu b’ruħhom kollha saħansitra f’affarijiet sekulari. (Kol. 3:​22-​24) Għandna raġuni akbar għalxiex nagħmlu dan meta nkunu qed naħdmu biex navanzaw il-​qima vera. Anki jekk xi biċċa xogħol tidher żgħira jew insinifikanti, il-​kongregazzjoni tibbenefika meta din issir sew.

Kull inkarigu jagħtina opportunità biex nuru mħabbitna lejn Ġeħova u lejn ħutna. (Mt. 22:​37-​39) Jalla nieħdu ħsieb bil-​lealtà kwalunkwe inkarigu li jiġi fdat lilna.