Ibqaʼ ffokat fuq li tagħmel dixxipli

1. X’jeħtieġ li nagħmlu biex jiġu salvati n-​nies?

¹ Ir-​rapport tas-​sena taʼ servizz tal-​2014 jirrifletti ż-​żelu tan-​nies t’Alla u d-​determinazzjoni li għandhom biex jippritkaw l-​aħbar tajba tas-​Saltna. (Mt. 24:14) Aħna qed nilħqu iktar nies bil-​messaġġ tal-​Bibbja minn qatt qabel permezz tal-​ippritkar minn dar għal dar, kampanji speċjali biex jitqassmu fuljetti u inviti, u permezz tal-​ippritkar f’postijiet pubbliċi. Madankollu, jekk irridu li nsalvaw lin-​nies, jeħtieġ li ngħinuhom isiru dixxipli taʼ Ġesù billi nistudjaw il-​Bibbja magħhom.—1 Tim. 2:4.

2. Liema mistoqsijiet nistgħu nsaqsu lilna nfusna ħalli nkunu dejjem lesti biex noffru studju tal-​Bibbja?

² Dejjem kun lest biex toffri studju tal-​Bibbja: Meta individwu juri interess, tagħmel int sforz biex tikseb id-​dettalji tiegħu u mbagħad terġaʼ żżuru minnufih bil-​mira li tibda studju tal-​Bibbja? Meta kien l-​aħħar li pprovajt turi kif isir studju tal-​Bibbja fl-​ewwel żjara? Meta kien l-​aħħar li offrejt studju tal-​Bibbja lil dawk li ttihom ir-​rivisti regolarment? Urejt il-​vidjows Għala għandek tistudja l-​Bibbja? u X’jiġri matul studju tal-​Bibbja? lill-​kollegi tiegħek, lil dawk tal-​iskola, lill-​ġirien, lill-​qraba, u lil oħrajn li taf? Meta tuża mejda jew stand tal-​letteratura, tagħmel sforz biex tinforma lil dawk li jieħdu pubblikazzjoni għall-​istudju li jekk iridu jistaʼ jkollhom studju tal-​Bibbja bla ħlas?

3. Sabiex ngħallmu l-​verità b’suċċess, x’inhu mitlub minna?

³ Għajnuna mingħand Ġeħova u Ġesù: Billi Ġesù beda l-​kmand tiegħu biex ‘jagħmlu dixxipli’ bil-​kelma “morru,” hu tana x’nifhmu li jeħtieġ li nagħmlu sforz u nieħdu l-​inizjattiva. Madankollu, ma telaqniex għal riħna imma wiegħed li jkun magħna. (Mt. 28:19, 20) Barra minn hekk, Ġeħova tana l-​ispirtu qaddis tiegħu u l-​għodod u t-​taħriġ li għandna bżonn biex ngħallmu l-​verità lin-​nies. (Żak. 4:6; 2 Kor. 4:7) Aħna nistgħu nitolbu ‘kemm biex ikollna r-​rieda u kemm biex naġixxu’ ħalli nieħdu sehem f’dan ix-​xogħol importanti.—Flp. 2:13.

4. Għala għandna nibqgħu ffokati fuq li nagħmlu dixxipli?

⁴ L-​ippritkar tal-​aħbar tajba jġibilna ferħ kbir. Madankollu, il-​ferħ tagħna jiżdied meta ngħallmu l-​verità lil xi ħadd u ngħinuh biex jingħaqad magħna fit-​“triq li tieħu għall-​ħajja.” (Mt. 7:14; 1 Tess. 2:19, 20) Iktar importanti minn hekk, billi nibqgħu ffokati fuq li nagħmlu dixxipli, inkunu qed nogħġbu lil Ġeħova li “ma jixtieqx li xi ħadd jinqered imma jixtieq li kulħadd jasal għall-​indiema.”—2 Pt. 3:9.