Iż Żghażagħ Jistaqsu

Għandi Nistqarr Dnubi?

“X’mistħija, ma nafx x’se naqbad nagħmel. Irrid immur għand il-​ġenituri tiegħi, imma qiegħda nistħi wisq.”​—Lisa.a

HEKK kitbet żagħżugħa inkwetata. Kienet ġiet involuta b’mod romantiku għal perijodu taʼ ftit snin maʼ wieħed mhux taʼ l-​istess twemmin u darba, taħt l-​influwenza taʼ l-​alkoħol, kellha x’taqsam miegħu sesswalment.

B’sogħba, affarijiet bħal dawn jiġru minn żmien għal żmien, anki fost żgħażagħ Kristjani. Iktar ma nkunu żgħar u mingħajr esperjenza, iżjed hemm iċ-​ċans li nagħmlu żbalji. Imma fil-​waqt li hija ħaġa waħda li tagħmel żball żgħir, hija ħaġ’oħra li tkun involut fi żball serju, bħall-​immoralità sesswali. (1 Korintin 6:​9, 10) Meta jiġri hekk, żagħżugħ jeħtieġ li jitlob l-​għajnuna. Il-​problema hija li m’huwiex faċli li wieħed jistqarr l-​iżbalji tiegħu.

Tfajla Kristjana ħadet sehem f’sess qabel iż-​żwieġ. Iddeċidiet li tistqarr kollox lill-​anzjani tal-​kongregazzjoni tagħha, u saħansitra stabbiliet data li fiha kellha tagħmel hekk. Imma pposponiet id-​data. Iktar tard, reġgħet ipposponietha. Malajr għaddiet sena sħiħa!

“Xejn Moħbi”

Jekk waqajt fi dnub serju, int jeħtieġ tirrealizza illi li żżomm sieket m’hijiex idea għaqlija. Wara kollox, il-​verità ġeneralment xorta tinkixef. Meta kien żgħir, Mark kisser ornament taċ-​ċeramika li jeħel mal-​ħajt. “Ipprovajt ninkollah bil-​galbu lura flimkien,” hu jiftakar, “imma l-​ġenituri tiegħi ma damux ma lemħu x-​xquq.” Veru, int m’għadekx xi tifel żgħir. Imma l-​biċċa l-​kbira tal-​ġenituri ġeneralment jindunaw meta t-​tfal tagħhom jidħlu f’xi saram.

“Ipprovajt ngħatti l-​problemi tiegħi bil-​gideb,” tammetti Ann li għandha 15-il sena, “imma swieli agħar.” Iżjed iva milli le, il-​gideb jinkixef. U meta l-​ġenituri tiegħek isiru jafu li gdibt, x’aktarx li se jkunu diżappuntati, iżjed diżappuntati milli kienu jkunu li kieku għedtilhom mill-​ewwel.

Saħansitra iżjed importanti, il-​Bibbja tgħid: “Ma hemm xejn moħbi li ma għadx jidher, u xejn ma hemm mistur li ma għadx jingħaraf u jinġieb għad-​dawl.” (Luqa 8:​17) Jehovah jaf x’għamilna u x’qegħdin nagħmlu. Ma tistax tinħeba minnu iżjed milli setaʼ Adam. (Ġenesi 3:​8-​11) Maż-​żmien, dnubietek għandhom mnejn jiġu esposti lil oħrajn.​—1 Timotju 5:​24.

Li żżomm sieket jistaʼ jagħmillek il-​ħsara b’modi oħrajn ukoll. Is-​salmista David kiteb: “Jien bqajt sieket, u nfena ġismi, jiena u nokrob il-​jum kollu. Għax lejl u nhar it-​toqol taʼ idek fuqi.” (Salm 32:​3, 4) Iva, it-​tensjoni taʼ li żżomm sigriet tistaʼ tkun taʼ piż tqil emozzjonalment. L-​anzjetà u l-​ħtija, kif ukoll il-​biżaʼ li se tinkixef, jistgħu jġagħluk tagħmel f’qalbek. Għandu mnejn li tibda titbiegħed mill-​ħbieb u minn tal-​familja. Għandu mnejn saħansitra tħossok li ġejt maqtugħ minn Alla nnifsu! “Kont qiegħed ngħix b’kuxjenza ħatja talli nikkitt lil Jehovah,” kiteb żagħżugħ jismu Andrew. “Kont qiegħed nittiekel minn ġewwa.”

Ikser Is-​Silenzju

Hemm xi mod li tistaʼ tikseb serħan minn dan it-​taqlib emozzjonali? Iva, hemm! Is-​salmista qal: “Id-​dnub tiegħi jien stqarrejtlek, u l-​ħażen tiegħi ma ħbejtulekx. . . . U int ħfirtli l-​ħażen tad-​dnub tiegħi.” (Salm 32:5; qabbel 1 Ġwann 1:9.) Bl-​istess mod Andrew sab serħan veru meta stqarr dnubu. Hu jiftakar: “Avviċinajt lil Jehovah u tlabt bis-​serjetà għall-​maħfra tiegħu.”

Int tistaʼ tagħmel l-​istess. Itlob lil Jehovah. Hu jaf x’għamilt, imma b’umiltà ammetti dan miegħu fit-​talb. Itlob il-​maħfra billi ma żżommx lura minħabba li tħossok tant mill-​agħar li ma tistax tiġi mgħejjun. Ġesù miet sabiex aħna nkunu nistgħu ngawdu waqfa tajba m’Alla minkejja l-​imperfezzjoni tagħna. (1 Ġwann 2:​1, 2) Tistaʼ wkoll titlob għas-​saħħa biex tagħmel il-​bidliet meħtiġin. Li taqra Salm 51 għandu mnejn ikun partikolarment t’għajnuna għalik f’li tagħmel dan l-​avviċinar lejn Alla.

Għid Lill-​Ġenituri Tiegħek

Iżjed huwa meħtieġ, madankollu, milli sempliċement tistqarr dnubietek lil Alla. Int obbligat ukoll li tgħid lill-​ġenituri tiegħek. Huma ġew inkarigati minn Alla biex irabbuk “fid-​dixxiplina u t-​twiddib tal-​Mulej.” (Efesin 6:4) Jistgħu jagħmlu dan biss jekk ikunu jafu l-​problemi tiegħek. Ukoll, li tgħid lill-​ġenituri tiegħek għandu mnejn ma jkunx faċli jew pjaċevoli. Imma wara l-​ewwel reazzjoni tagħhom, x’aktarx li se jikkontrollaw l-​emozzjonijiet tagħhom. Għandhom mnejn saħansitra jkunu kuntenti li fdajthom biżżejjed biex tikxef il-​problema tiegħek magħhom. Il-​parabbola taʼ Ġesù taʼ l-​iben il-​ħali tirrakkonta dwar żagħżugħ li waqaʼ fl-​immoralità sesswali. Imma meta fl-​aħħar stqarr kollox, missieru laqgħu b’idejh miftuħin! (Luqa 15:​11-24) Bla dubju l-​ġenituri tiegħek bl-​istess mod se jagħtuk l-​għajnuna. Wara kollox, għadhom iħobbuk.

Veru, għandek mnejn tibżaʼ li se tweġġaʼ lill-​ġenituri tiegħek. Imma m’huwiex li tistqarr id-​dnub li jweġġaʼ lill-​ġenituri tiegħek; huwa l-​fatt li wettaqt id-​dnub li jweġġagħhom! Li tistqarr huwa l-​ewwel pass lejn li ttaffi dak l-​uġigħ. Ann, li ssemmiet qabel, qaltilhom lill-​ġenituri tagħha u wara dan ħassitha ferm aħjar.b

Jerġaʼ ostaklu ieħor għal li tistqarr dnubek huwa l-​mistħija u l-​imbarazzament. L-​iskrib leali Esdra ma wettaqx id-​dnubiet hu nnifsu, imma meta stqarr id-​dnubiet taʼ sħabu Lhud, hu qal: “Jien inħossni nistħi, u wiċċi ma jagħtinix li nerfaʼ ħarsti lejk, Alla tiegħi.” (Esdra 9:6) Verament, huwa xieraq li tħoss il-​mistħija meta tagħmel xi ħaġa ħażina. Dan jindika li l-​kuxjenza tiegħek għadha taħdem. U biż-​żmien dawk is-​sentimenti taʼ mistħija se jonqsu. Andrew poġġieha b’dan il-​mod: “Huwa estremament diffiċli u imbarazzanti li tistqarr kollox. Imma li taf li Jehovah se jaħfer bil-​kbir huwa taʼ serħan.”

Mur Għand L-​Anzjani

Jekk int Kristjan, il-​kwistjoni ma tiqafx meta tgħid lill-​ġenituri tiegħek. Jgħid Andrew: “Kont naf li kelli mmur bil-​problema tiegħi għand l-​anzjani. X’serħan kien għalija li nkun naf li huma kienu qegħdin hemm biex jgħinuni!” Iva, żgħażagħ fost ix-​Xhieda taʼ Jehovah jistgħu u għandhom imorru għand l-​anzjani tal-​kongregazzjoni għall-​għajnuna u l-​inkuraġġiment. Imma għala ma tistax sempliċement titlob lil Jehovah u tieqaf hemm? Għaliex Jehovah inkariga lill-​anzjani bir-​responsabbiltà li “jgħassu fuqkom.” (Lhud 13:17) Jistgħu jgħinuk tevita li terġaʼ taqaʼ fid-​dnub.​—Qabbel Ġakbu 5:​14-​16.

La tqarraqx bik innifsek billi tirraġuna li tistaʼ tgħin lilek innifsek. Li kieku kont verament b’saħħtek biżżejjed biex tagħmel hekk, kont int taqaʼ fid-​dnub fil-​bidu? B’mod ċar, għandek bżonn tfittex l-​għajnuna mingħand ħaddieħor. Andrew b’kuraġġ hekk għamel. Il-​parir tiegħu? “Ninkuraġġixxi lil kull min hu involut fi dnub serju, jew li kien involut, biex jiftaħ qalbu maʼ Jehovah u maʼ wieħed mir-​ragħajja tiegħu.”

Imma eżattament kif għandek tavviċina anzjan? Agħżel wieħed maʼ min tħossok komdu biżżejjed. Tistaʼ tibda billi tgħid: “Għandi bżonn inkellmek dwar xi ħaġa” jew “Għandi problema” jew saħansitra “Għandi problema u għandi bżonn l-​għajnuna tiegħek.” Li tkun onest u apert se juri b’mod ċar l-​indiema tiegħek u x-​xewqa li tinbidel.

‘Nibżaʼ Li Niġi Maqtugħ Mis-​Sħubija’

Xi ngħidu għal dik il-​possibiltà? Huwa veru illi li wieħed jikkommetti xi dnub serju jagħmel lil dak li jkun suġġett għal li jiġi maqtugħ mis-​sħubija, imma dan mhux awtomatikament. Il-​qtugħ mis-​sħubija qiegħed għal dawk li jirrifjutaw li jindmu​—dawk li b’rashom iebsa jirrifjutaw li jinbidlu. Jgħid Proverbji 28:13: “Min jaħbi ħtijietu ma jiksibx ġid, imma min jistqarrhom u jaqtagħhom jaqlaʼ l-​ħniena.” Il-​fatt li int avviċinajt lill-​anzjani għall-​għajnuna huwa evidenza tax-​xewqa tiegħek li tinbidel. L-​anzjani huma primarjament uħud li jfejqu u mhux uħud li jikkastigaw. Huma obbligati li jittrattaw lin-​nies t’Alla b’qalb tajba u b’dinjità. Iridu jgħinuk tagħmel ‘triq dritta għal riġlejk.’​—Lhud 12:13.

Irridu nammettu li, fejn hemm involuti l-​qerq jew il-​prattika taʼ dnub serju fuq perijodu twil, jistaʼ jkun hemm nuqqas taʼ “opri xierqa taʼ ndiema” li jikkonvinċu. (Atti 26:20) Xi kultant veru li jirriżulta qtugħ mis-​sħubija. U saħansitra meta wieħed li żbalja jindem, l-​anzjani huma obbligati li jimponu xi forma taʼ dixxiplina. Għandek tirrabja jew titqarras dwar id-​deċiżjoni tagħhom? F’Lhud 12:​5, 6, Pawlu jħeġġeġ: “Ibni, la twarrabx it-​twiddib tal-​Mulej, u la taqtax qalbek meta jċanfrek; għax il-​Mulej iwiddeb lil min iħobb, jolqot lil kull min jilqaʼ b’ibnu.” Tkun xi tkun id-​dixxiplina li tirċievi, ħares lejha bħala evidenza li Alla jħobbok. Ftakar, indiema ġenwina se terġaʼ tagħtik relazzjoni xierqa maʼ Missierna kollu ħniena, Alla Jehovah.

Irid ikollok il-​kuraġġ biex tammetti l-​iżbalji tiegħek. Imma billi tagħmel hekk, tistaʼ tikkorreġi l-​iżbalji mhux biss mal-​ġenituri tiegħek imma m’Alla Jehovah innifsu. Tħallix il-​biżaʼ, il-​kburija, jew l-​imbarazzament iżommuk milli titlob l-​għajnuna. Ftakar: Jehovah se “jaħfer ħafna.”​—Isaija 55:7.

[Noti taʼ taħt]

[Stampa fʼpaġna 11]

[Kumment fʼpaġna 12]

‘Ninkuraġġixxi lil dawk kollha li dinbu biex jiftħu qlubhom maʼ Jehovah.’—Andrew