Il-​Ħarsa Tal-​Bibbja

Huwa ċ-​Ċelibat Ħtieġa Għal Ministri Kristjani?

IĊ-​ĊELIBAT huwa, eżatt eżatt, l-​istat taʼ li ma tkunx miżżewweġ. Madankollu, skond The New Encyclopædia Britannica, it-​terminu “huwa wżat ġeneralment f’konnessjoni maʼ l-​irwol taʼ individwu ċelibi bħala uffiċjal reliġjuż, speċjalista, jew devot.” It-​terminu “ċelibat” jirreferi l-​iktar għal “dawk li għalihom l-​istat taʼ mhux miżżewweġ huwa r-​riżultat taʼ wegħda sagra jew att taʼ rinunzja jew taʼ twemmin li dan huwa preferibbli għal individwu minħabba l-​pożizzjoni reliġjuża tiegħu jew il-​grad tiegħu taʼ serjetà reliġjuża.”

F’xi żmien jew ieħor, ċerti reliġjonijiet prominenti adottaw iċ-​ċelibat bħala ħtieġa għall-​ministri tagħhom. Madankollu, iċ-​ċelibat fl-​ebda reliġjon oħra tal-​Kristjaneżmu ma sar daqshekk taʼ karatteristika li tingħaraf daqs kemm hu fil-​Kattoliċiżmu. Illum, hemm kontroversja ġmielha dwar iċ-​ċelibat Kattoliku. The Wilson Quarterly nnota li “studju wara l-​ieħor fi snin reċenti kkonkluda li ċ-​ċelibat obbligatorju, ħtieġa għall-​qassisin Kattoliċi sa mis-​seklu 12, qiegħed jikkaġuna l-​problemi li għandha l-​knisja biex tirrekluta u żżomm il-​qassisin.” Skond is-​soċjologu Richard A. Schoenherr, “il-​piż kollu taʼ l-​istorja u tal-​bidla soċjali qiegħed idur kontra l-​esklussività taċ-​ċelibat maskil fis-​saċerdozju Kattoliku.” X’inhi l-​ħarsa tal-​Bibbja lejn iċ-​ċelibat?

Iż-​Żwieġ jew l-​Istat taʼ mhux Miżżewweġ?

Matul l-​istorja numru bla għadd taʼ rġiel u nisa devoti, f’ħafna reliġjonijiet differenti, għażlu li jkunu ċelibi. Għala? F’ħafna każi kien għaliex huma emmnu li affarijiet materjali tal-​ġisem kienu “l-​magħqad tal-​ħażen.” Dan ħoloq il-​filosofija li purità spiritwali kienet possibbli biss permezz taʼ li wieħed jastjeni minn kull attività sesswali. Din, madankollu, m’hijiex il-​ħarsa tal-​Bibbja. Fil-​Bibbja, iż-​żwieġ huwa meqjus bħala għotja nadifa u qaddisa mingħand Alla. Ir-​rakkont tal-​ħolqien f’Ġenesi jagħti stampa ċara taż-​żwieġ bħala li hu “tajjeb” f’għajnejn Alla u ovvjament mhux bħala ostaklu għal relazzjoni pura spiritwalment m’Alla.​—Ġenesi 1:​26-​28, 31; 2:​18, 22-​24; ara wkoll Proverbji 5:​15-​19.

L-appostlu Pietru u qaddejja approvati oħrajn t’Alla li kellhom pożizzjonijiet t’awtorità fil-​kongregazzjoni Kristjana bikrija kienu rġiel miżżewġin. (Mattew 8:​14; Atti 18:2; 21:​8, 9; 1 Korintin 9:5) Dan jintgħamel ċar mid-​direzzjonijiet taʼ l-​appostlu Pawlu lil Timotju dwar il-​ħatra taʼ indokraturi, jew ‘isqfijiet,’ tal-​kongregazzjoni. Hu jikteb: “L-​isqof ikun bniedem li ma ssibx xi tgħid fih; li jkun raġel taʼ mara waħda.” (Korsiv tagħna; 1 Timotju 3:​2) Innota li assolutament m’hemm l-​ebda suġġeriment li b’xi mod ma kienx floku li “isqof” ikun miżżewweġ. Pawlu indika sempliċement li “isqof” m’għandux ikun poligamu; jekk ikun miżżewweġ, irid ikollu mara waħda biss. Fil-​fatt, is-​Cyclopedia of Biblical, Theological, and Ecclesiastical Literature, minn McClintock u Strong, tikkonkludi: “L-​ebda silta fit-​T[estment il-​]Ġ[did] ma tistaʼ tiġi interpretata fi projbizzjoni kontra ż-​żwieġ tal-​kleru taħt id-​dispensa tal-​Vanġelu.”

Fil-waqt li tistma ħafna liż-​żwieġ, il-​Bibbja ċertament li ma tikkundannax l-​istat taʼ mhux miżżewweġ jekk dan jintgħażel liberament. Il-​Bibbja tirrikkmandah dan bħala korsa mixtieqa għal xi wħud. (1 Korintin 7:​7, 8) Ġesù Kristu qal li xi rġiel u nisa jagħżlu deliberatament il-​korsa taʼ l-​istat taʼ mhux miżżewweġ. (Mattew 19:12) Għala? Mhux għaliex hemm xi ħaġa impura b’mod inerenti dwar iż-​żwieġ li tistaʼ tfixkel l-​iżvilupp spiritwali tagħhom. Huma jagħżlu din il-​korsa sempliċement biex jiffokaw l-​isforzi tagħhom fuq li jagħmlu r-​rieda t’Alla f’dawk li ħassew li huma żminijiet urġenti.

It-​Triq lejn iċ-​Ċelibat Obbligatorju

Madankollu, l-​affarijiet inbidlu fis-​sekli li segwew żmien Kristu. Matul l-​ewwel tliet sekli taʼ l-​Era Komuni tagħna, “kien hemm ministri kemm miżżewġin u kemm mhux miżżewġin,” jispjega David Rice, Dumnikan li telaq mis-​saċerdozju biex jiżżewweġ. Imbagħad, l-​hekk imsejħin Kristjani bdew jiġu influwenzati minn dak li wieħed kittieb reliġjuż iddeskrivieh bħala “amalgama taʼ ideat Griegi u bibliċi” li pproduċa ħarsa mgħawġa dwar is-​sess u ż-​żwieġ.

Xi wħud, m’għandniex xi ngħidu, baqgħu jsusu wara l-​istat taʼ mhux miżżewweġ sempliċement “biex jiksbu ħelsien komplet ħalli jiddedikaw [ruħhom] għax-​xogħol tas-​saltna t’Alla.” Madankollu, oħrajn kienu iktar immotivati mill-​filosofiji pagani li kienu assorbew. The New Encyclopædia Britannica tgħid: “Twemmin li att sesswali kien iħammeġ u kien inkompatibbli mal-​qdusija tfaċċa [fl-hekk imsejħa knisja Kristjana] bħala l-​motivazzjoni dominanti biex jiġi pprattikat iċ-​ċelibat.”

Rice jgħid li, fir-​rabaʼ seklu, il-​knisja “pprojbiet lil qassis miżżewweġ milli jkollu x’jaqsam sesswalment maʼ martu l-​lejl taʼ qabel ma tiġi ċċelebrata l-​Ewkaristija.” Meta l-​knisja introduċiet l-​Ewkaristija taʼ kuljum, dan kien ifisser li l-​qassisin kellhom jastjenu mill-​att sesswali permanentement. Maż-​żmien, iż-​żwiġijiet tal-​qassisin ġew ipprojbiti kompletament. B’hekk, iċ-​ċelibat sar obbligatorju għal kulmin kien se jsir ministru fil-​knisja.

L-appostlu Pawlu wissa dwar żvilupp eżattament bħal dan. Hu kiteb: “L-​Ispirtu jgħidha ċar li fl-​aħħar taż-​żminijiet xi wħud jitbiegħdu mill-​fidi u jagħtu widen għal spirti qarrieqa u għal tagħlim tax-​xjaten . . . li jikkundannaw iż-​żwieġ.”​—1 Timotju 4:​1, 3.

“L-​Għerf taʼ Alla tawh raġun l-​opri tiegħu stess,” qal Ġesù Kristu. (Mattew 11:19) Il-​bluha taʼ li wieħed jiżvija mil-​livelli t’Alla ġiet ipprovata mix-​xogħlijiet jew mill-​konsegwenzi tagħha. L-​awtur David Rice intervista lil ħafna qassisin madwar id-​dinja fuq is-​suġġett taċ-​ċelibat obbligatorju. Xi wħud li tkellem magħhom qalu: “Tibqaʼ fis-​saċerdozju, tagħmel kemm ġid tistaʼ, u b’mod diskret tiddisponi ruħek mill-​prontezza taʼ nisa ammiraturi devoti, li jagħmlu lilhom infushom disponibbli sesswalment.”

Waqt li jikkwota Mattew 7:​20, Rice jgħid: “‘Mill-​frott tagħhom se tagħrfuhom,’ qal Ġesù.” Hu mbagħad jikkummenta fuq it-​traġedja li rriżultat miċ-​ċelibat sforzat: “Il-​frott taċ-​ċelibat obbligatorju huma dawk l-​eluf taʼ rġiel li jgħixu ħajja doppja, l-​eluf taʼ nisa li jgħixu ħajja meqruda, l-​eluf taʼ tfal irrifjutati mill-​missirijiet saċerdotali tagħhom, biex ma nsemmux il-​qassisin li jsofru emozzjonalment.”

Żwieġ onorabbli huwa barka mingħand Alla. Iċ-​ċelibat sforzat irriżulta li hu taʼ ħsara spiritwalment. L-​istat taʼ mhux miżżewweġ magħżul liberament, mill-​banda l-​oħra, għalkemm m’huwiex ħtieġa essenzjali għall-​qdusija jew għas-​salvazzjoni, ta prova li kien mod taʼ ħajja premjanti u sodisfaċenti spiritwalment għal xi wħud.​—Mattew 19:​12.

[Sors tal-Istampa fʼpaġna 21]

Life