Tarbija kif Għandha Torqod?

ĦAFNA trabi madwar id-​dinja mietu bħala riżultat tas-​Sudden Infant Death Syndrome (meta tarbija tmut f’daqqa) (SIDS). Fl-​istati Uniti, din hi l-​iktar ħaġa li tikkaġuna mwiet fost it-​trabi taʼ bejn ix-​xahar u t-​tnax-il xahar. Hemm xi mod li bih jistaʼ jitnaqqas ir-​riskju? Skond The Journal of the American Medical Association (JAMA), ir-​riċerka taʼ dawn l-​aħħar snin tindika li r-​riskju tas-​SIDS jidher li jonqos b’mod sinjifikanti meta t-​trabi jorqdu wiċċhom ’il fuq minflok ma jorqdu wiċċhom ’l isfel. Diversi pajjiżi ħolqu programmi biex bihom jagħmlu lill-​ġenituri konxji tal-​konnessjoni li hemm bejn il-​pożizzjoni taʼ l-​irqad u s-​SIDS. Fl-​Awstralja, fl-​Ingilterra, fid-​Danimarka, fi New Zealand, u fin-​Norveġja, is-​SIDS naqset minn taʼ l-​inqas b’50 fil-​mija wara li saru kampanji pubbliċi għal madwar sena jew sentejn biex jippromwovu li t-​trabi jraqqduhom wiċċhom ’il fuq.

Eżattament kif il-​fatt li tarbija torqod wiċċha ’l isfel huwa konness mas-​SIDS m’huwiex magħruf, imma xi riċerkaturi jissuġġerixxu li din il-​pożizzjoni taʼ li jorqdu b’wiċċhom ’l isfel tistaʼ tirriżulta f’li t-​tarbija terġaʼ ddaħħal l-​arja li hi stess tkun ħarġet ’il barra, u b’hekk tkun qed iżżid il-​livell tal-​carbon dioxide fid-​demm tagħha. Ġisem it-​tarbija jistaʼ wkoll jisħon iżżejjed minħabba li meta tkun wiċċha ’l isfel is-​sħana ma tinfirixx. Hu x’inhu l-​każ, it-​trabi li jorqdu b’wiċċhom ’il fuq jew ’l isfel għandhom it-​tendenza li jibqgħu fl-​istess pożizzjoni. L-​istudji jissuġġerixxu wkoll li jekk tpoġġi tarbija normali u b’saħħitha wiċċha ’l fuq hu aħjar milli tpoġġiha la ġenba.

L-ommijiet għala jippreferu ċertu pożizzjoni taʼ l-​irqad iktar minn oħra? JAMA jinnota li l-​ommijiet taʼ spiss jagħmlu dan sempliċement skond kif ikunu mdorrijin​— lit-​tarbija tagħhom iqegħduha bil-​mod kif kienet tqegħedha ommhom stess jew oħrajn fil-​komunità tagħhom. Jew għandhom mnejn jadottaw il-​mod kif jagħmluhom fl-​isptar. Xi ommijiet iħossu wkoll li t-​trabi tagħhom jippreferu jew jorqdu aħjar f’pożizzjoni partikulari. Ħafna ommijiet b’mod konsistenti jpoġġu lit-​trabi wiċċhom ’il fuq għall-​ewwel xahar imma mbagħad ibiddlu u jagħmluhom wiċċhom ’l isfel. “Din it-​tendenza hija inkwetanti,” jistqarr JAMA, “għaliex ir-​riskju tas-​SIDS huwa l-​ogħla fost it-​trabi taʼ bejn ix-​xahrejn u t-​tliet xhur.” It-​tobba qed jagħmlu ħilithom kollha biex jinformaw lill-​ġenituri li għandhom trabi żgħar dwar dak li jgħidu huma li hija miżura sempliċi u effettiva biex tnaqqas ir-​riskju tas-​SIDS​—li t-​trabi b’saħħithom jitpoġġew wiċċhom ’il fuq.a

[Nota taʼ taħt]