Imħabba Kristjana Kontra Vulkan
MINN KORRISPONDENT TAʼ STENBAĦ! FIL-KAMERUN
IS-SENA l-oħra vulkan kbir sploda b’kemm kellu saħħa fil-Kamerun, pajjiż fl-Afrika tal-Punent. Il-Muntanja Kamerun hija vulkan għoli 4,070 metru fuq wiċċ il-baħar. Fis-seklu 20 il-vulkan kien diġà żbroffa erbaʼ darbiet oħra. Skond ir-rapporti, din id-darba però kienet l-iktar darba li l-vulkan żbroffa b’mod vjolenti u kkaġuna ħsara.
L-effetti taʼ dan id-diżastru nħassu għall-ewwel darba fis-27 taʼ Marzu, 1999, is-Sibt wara nofsinhar. Xi nies li raw dan kollu b’għajnejhom stess fil-villaġġ taʼ Buea, li jinsab taħt muntanja, irrapportaw li l-ħitan, id-djar, u saħansitra s-siġar tregħdu kemm felħu. L-għada fil-għaxija, f’xi t-tmienja u nofs, l-art f’dawk l-inħawi theżżet bil-qawwi ferm. It-theżżiża nħasset 70 kilometru ’l bogħod fil-post taʼ Douala. It-titlu prinċipali fil-faċċata tal-gazzetta Le Messager taʼ nhar it-Tlieta, 30 taʼ Marzu, 1999, iddikjara: “L-Eruzzjoni tal-Muntanja Kamerun—250,000 Ruħ Jiffaċċjaw in-Nar.” L-artiklu kompla hekk: “L-art theżżet 50 darba f’jumejn; diġà dehru 4 ħofor; mijiet taʼ djar inqerdu; il-palazz presidenzjali f’Buea tfarrak.”
Hemm xi 80 Xhud taʼ Jehovah jgħixu f’Buea. Ħafna djar tant saritilhom ħsara li ma setgħux jitranġaw mill-ġdid. Waħda minnhom kienet tintuża bħala Sala tas-Saltna. Madankollu, ħadd ma miet.
Dak li Wettqet l-Imħabba Kristjana
L-imħabba Kristjana malajr intweriet biex tpatti għall-ħsara li għamel dan il-vulkan kbir. Inħatar kumitat biex jieħu ħsieb jagħti l-għajnuna. Il-Ġemgħa li Tiggverna tax-Xhieda taʼ Jehovah għamlet arranġamenti sabiex jiġu provduti fondi li tant kien hemm bżonnhom. Ukoll mijiet taʼ Xhieda kienu lesti li bl-imħabba kollha jissagrifikaw ftit mill-ħin, mill-enerġija, u mill-flus tagħhom.
Xi kongregazzjonijiet tax-Xhieda taʼ Jehovah bagħtu l-ikel. Xhud minnhom ta donazzjoni taʼ 1,000 briksa tal-konkos. Xhud ieħor ra kif setaʼ jinxtara l-aluminju għas-soqfa bl-irħis. Jerġaʼ ieħor mexa 16-il kilometru biex iġib l-injam. Wieħed żagħżugħ li kien faddal il-flus biex iħallas il-prezz taʼ l-għarusa lill-kunjati tiegħu mexxa d-data tat-tieġ għal iktar tard u uża l-flus biex isewwi s-serrieq. Imbagħad irħielha lejn il-foresta, u fi tliet ġimgħat qataʼ biżżejjed zkuk biex jibni dar sħiħa! Żgħażagħ Kristjani b’saħħithom ġarrew l-injam fuq rashom lejn post li kien ħames kilometri ’l bogħod, u hemmhekk għabbewh għal fuq trakk.
Nhar l-24 t’April beda x-xogħol tal-bini mill-ġdid meta 60 volontier iltaqgħu fil-post fejn kien sar id-diżastru. Fis-Sibtijiet u l-Ħdud taʼ wara, dak in-numru kiber u laħaq il-200 volontier. Tlieta mix-Xhieda taʼ Jehovah li kellhom impjieg full-time kienu jiġu wara ġurnata normali taʼ xogħol, u kienu jkomplu jibnu sa wara nofsillejl sew. Wieħed Xhud minn Douala kien iqattaʼ l-ħin taʼ fil-għodu jaħdem fl-impjieg sekulari tiegħu. Imbagħad kien jivvjaġġa 70 kilometru bil-mutur tiegħu u jmur jaħdem sa nofsillejl qabel ma jirritorna lura d-dar. F’inqas minn xahrejn tlestew sitt idjar. Sadattant, il-kongregazzjoni taʼ Buea kompliet tiltaqaʼ għal-laqgħat f’dar privata, għalkemm l-attendenza għal-laqgħat kienet kważi d-doppju tan-numru taʼ membri fil-kongregazzjoni.
Matul dan l-istess perijodu, il-kumitat li kien ġie organizzat biex jagħti l-għajnuna qassam iktar minn 40,000 pillola sabiex l-ilma mniġġes jiġi purifikat. Dan il-kumitat ipprovda wkoll kura fl-isptarijiet lil xi għaxar persuni li kienu qed ibatu minn problemi tan-nifs minħabba l-gassijiet velenużi u l-irmied li ħareġ mill-vulkan. Kif aġixxew dawk li daqu din l-imħabba Kristjana?
L-Imħabba Kristjana Tittrijonfa
Kien hemm raġel mid-Delegazzjoni Provinċjali taʼ l-Agrikultura, illi wara li ra lill-aħwa jibnu waħda mid-djar, qal hekk: “Id-dar infisha tagħti xiehda . . . , turi li hemm l-imħabba.” Waħda għalliema kkummentat: “Qatt ma rajt ħaġa bħal din f’ħajti. . . . Dan verament huwa sinjal tal-Kristjanità vera.”
Dawk li bbenefikaw personalment ukoll esprimew ruħhom bi kliem li jmiss il-qalb. Timothy, li għandu 65 sena u li ma tantx hu f’saħħtu, kiteb: “Kulmeta nħarsu lejn id-dar il-ġdida tagħna, jaqbżilna d-dmugħ minn għajnejna bil-ferħ. Il-ħin kollu nirringrazzjaw lil Jehovah taʼ dak kollu li għamel magħna.” Waħda armla li m’hijiex waħda mix-Xhieda taʼ Jehovah, flimkien maʼ l-erbat itfal tagħha, tilfu kollox meta d-dar tagħhom waqgħet. Imbagħad, il-ħaddiema li ġew imqabbdin biex jgħinuha serqulha l-materjal għall-bini tas-soqfa. Il-volontieri fost ix-Xhieda taʼ Jehovah ġew jgħinuha. Hi qalet hekk: “Ma nafx kif naqbad ngħid grazzi. Qalbi nħossha tfur bil-ferħ.” Elizabeth, il-mara t’anzjan Kristjan, osservat: “Jien ferħana li hemm l-imħabba fl-organizzazzjoni taʼ Jehovah. Dan juri li qed naqdu lil Alla l-ħaj.”
Il-vulkan li żbroffa kien qawwi ferm, imma bl-ebda mod ma setaʼ jitfi l-imħabba Kristjana taʼ dawn l-aħwa. Bħalma qal l-appostlu Pawlu bil-kliem li ġie ispirat jikteb, “l-imħabba qatt ma tintemm.”—1 Korintin 13:8.
[Stampa f’paġna 16]
Ix-xmajjar tal-lava li niżlu għamlu ħafna ħsara
[Stampa f’paġna 17]
Il-volontieri ħadmu iebes biex isewwu d-djar li ġratilhom il-ħsara
[Stampa f’paġna 17]
Il-Muntanja Kamerun