Sforz Biex il-​Vatikan Jitneħħa mill-​Ġnus Magħquda

L-​AĠENZIJA taʼ l-​aħbarijiet ibbażata f’Ruma, Inter Press Service (IPS), irrapportat li “koalizzjoni internazzjonali taʼ iktar minn 70 organizzazzjoni mhux governattivi (NGOs) bdew kampanja globali biex il-​Vatikan jitneħħa mill-​Ġnus Magħquda.” Fil-​preżent, il-​Vatikan huwa osservatur permanenti, jew stat mhux membru, fl-​organizzazzjoni tal-​Ġnus Magħquda. Il-​Vatikan ilu f’din il-​pożizzjoni mill-​1964.

Dan il-​grupp t’organizzazzjonijiet mhux governattivi, li s’April tas-​sena l-​oħra kien żdied għal 100 organizzazzjoni madwar id-​dinja, għala qiegħed joġġezzjona għall-​pożizzjoni li għandu l-​Vatikan fil-​Ġnus Magħquda? Dawn l-​organizzazzjonijiet qed isostnu li r-​raġuni hi li l-​Vatikan huwa awtorità reliġjuża u mhux stat politiku. Frances Kissling, il-​presidentessa tal-​Kattoliċi għal Għażla Ħielsa, qalet lill-​IPS li l-​koalizzjoni m’hijiex topponi għad-​dritt li għandu l-​Vatikan li jesprimi l-​ħarsa tiegħu, imma “l-​kwistjoni kollha hi d-​dritt li jokkupa pożizzjoni mal-​gvernijiet meta m’huwiex stat.”

Anika Rahman, direttriċi taʼ Programmi Internazzjonali fiċ-​Ċentru għal-​Liġi u Politika Riproduttivi, taqbel maʼ dan. L-​IPS ikkwotaha bħala li qalet li “jekk il-​Ġnus Magħquda tittratta lis-​Santa Sede bħala stat bi privileġġi t’osservatur permanenti minħabba l-​awtorità reliġjuża li għandha, il-​korporazzjoni dinjija qed toħloq preċedent għal talbiet simili minn reliġjonijiet oħra.” Hi żiedet: “Biex jiġi żgurat li l-​Ġnus Magħquda ma tippromwovi l-​ebda reliġjon partikulari, entitajiet reliġjużi bħalma hija l-​Knisja Kattolika Rumana m’għandhomx jitħallew jipparteċipaw f’dan il-​forum bħala stat mhux membru.”

Imma xi ngħidu għall-​argument li l-​Vatikan huwa stat u għalhekk huwa intitolat għall-​pożizzjoni li għandu fil-​preżent? “Dan huwa logħob bil-​kliem,” wieġbet is-​Sinjorina Kissling f’intervista. “Aħna nħossu li din hija bażikament definizzjoni taʼ stat tas-​seklu 15 u li fil-​fatt, is-​Santa Sede hija l-​istruttura governattiva tar-​reliġjon.” Hi kompliet tgħid li t-​termini “Vatikan” u “s-​Santa Sede” huma t-​tnejn “sinonimi għall-​Knisja Kattolika Rumana.”

Ir-raġuni prinċipali għala dawn l-​organizzazzjonijiet mhux governattivi huma kontra l-​pożizzjoni li għandu bħalissa l-​Vatikan fil-​Ġnus Magħquda hija minħabba l-​ħarsa tal-​Vatikan rigward kwistjonijiet tal-​popolazzjoni. Per eżempju, il-​Vatikan inqeda b’diversi konferenzi tal-​Ġnus Magħquda biex jesprimi d-​diżapprovazzjoni tiegħu rigward l-​ippjanar tal-​familja. Dawn l-​okkażjonijiet kienu waqt il-​Konferenza Internazzjonali dwar il-​Popolazzjoni u l-​Iżvilupp taʼ l-​1994 fil-​Kajr, u waqt il-​Konferenza tan-​Nisa taʼ l-​1995 f’Beijing. L-​IPS jinnota li peress li l-​Ġnus Magħquda tasal għall-​maġġuranza tad-​deċiżjonijiet li tieħu permezz taʼ ftehim ġenerali, l-​opinjonijiet differenti li jesprimi l-​Vatikan fixklu n-​negozjati fuq kwistjonijiet relatati mal-​popolazzjoni, il-​kontraċezzjoni, id-​drittijiet tan-​nisa u l-​kura tas-​saħħa riproduttiva.

Skond is-​Sinjorina Kissling, “l-​irwol addattat għall-​Vatikan huwa dak taʼ NGO [organizzazzjoni mhux governattiva]—l-​istess bħall-​NGOs l-​oħra li jirrappreżentaw lill-​Musulmani, ’il-Ħindu, ’il-Buddisti, ’il-Baħaj u organizzazzjonijiet reliġjużi oħra.” Il-​koalizzjoni trid li s-​segretarju ġenerali tal-​Ġnus Magħquda, Kofi Annan u fl-​aħħar mill-​aħħar l-​Assemblea Ġenerali tal-​Ġnus Magħquda, jikkonduċu reviżjoni uffiċjali tal-​pożizzjoni li jokkupa l-​Vatikan fl-​akbar korp politiku fid-​dinja.

[Stampi f’paġna 31]

Uffiċjal tal-​Vatikan jindirizza lill-​Ġnus Magħquda

[Sorsi]

UN/DPI Photo by Sophie Paris

UN photo 143-​936/J. Isaac