Il-​Ħarsa tal-​Bibbja

Huma r-​Reliġjonijiet Kollha Toroq Differenti li Jwasslu Għand Alla?

“NAĦSEB li huwa letteralment inkredibbli li Alla taʼ l-​univers kollu għażel li jsir magħruf minn fidi reliġjuża waħda,” qal l-​awtur Marcus Borg. Ir-​rebbieħ tal-​Premju Nobel għall-​Paċi, Desmond Tutu qal: “L-​ebda reliġjon ma tistaʼ ssostni li għandha l-​verità kollha dwar il-​misteru” tal-​fidi. Ħarsa popolari tal-​Ħindu hi “Jotto moth, totto poth,” u meta tiġi tradotta s-​sugu tagħha huwa li r-​reliġjonijiet kollha m’huma xejn ħlief toroq differenti li jwasslu lejn l-​istess għan. Il-​Buddisti wkoll għandhom din l-​opinjoni. Tabilħaqq, miljuni taʼ nies jemmnu li r-​reliġjonijiet kollha huma toroq differenti li jwasslu għand Alla.

Il-kittieb taʼ l-​istorja Geoffrey Parrinder qal: “Xi kultant jintqal li r-​reliġjonijiet kollha għandhom l-​istess għan, jew huma toroq indaqs għall-​verità, jew saħansitra li kollha jgħallmu l-​istess duttrini.” It-​tagħlim, ir-​ritwali, u l-​allat tar-​reliġjonijiet huma tabilħaqq simili. Il-​biċċa l-​kbira tar-​reliġjonijiet jitkellmu dwar l-​imħabba u jgħallmu li l-​qtil, is-​serq, u l-​gideb huma ħżiena. Fil-​biċċa l-​kbira tal-​gruppi reliġjużi, ikun hemm min jagħmel sforzi sinċieri biex jgħin lil oħrajn. Għalhekk, mela, jekk xi ħadd ikun sinċier fit-​twemmin tiegħu u jipprova jgħix ħajja tajba, jimporta x’reliġjon ikollu? Jew ir-​reliġjonijiet huma biss toroq differenti li jwasslu għand Alla?

Is-​Sinċerità Waħedha—Din Biżżejjed?

Ikkunsidra l-​każ taʼ raġel Lhudi taʼ l-​ewwel seklu jismu Sawl, li sar l-​appostlu Kristjan magħruf bħala Pawlu. Hu kien segwaċi tal-​Ġudaiżmu żeluż ħafna, u dan wasslu biex jipprova jeqred għalkollox il-​qima tas-​segwaċi taʼ Kristu, li hu kien iħoss li kienet qima żbaljata. (Atti 8:​1-3; 9:​1, 2) Imma permezz tal-​ħniena t’Alla, Sawl irrealizza li nies reliġjużi ħafna bħalma kien hu setaʼ jkollhom żelu għal Alla, iżda, minħabba li ma jkollhomx il-​fatti kollha, setgħu jkunu żbaljati. (Rumani 10:2) Meta Sawl beda jitgħallem iktar dwar ir-​rieda t’Alla u dak li għamel, hu nbidel u beda jqim maʼ l-​istess nies li kien qed jippersegwita qabel​—is-​segwaċi taʼ Ġesù Kristu.—1 Timotju 1:​12-16.

Veru li l-​Bibbja tgħid li hemm mijiet taʼ reliġjonijiet minfejn nagħżlu u tkun liema tkun li nagħżlu Alla se jaċċettaha? L-​appostlu Pawlu rċieva istruzzjonijiet minn Ġesù Kristu rxoxtat li kienu jgħidu pjuttost il-​kontra. Ġesù bagħtu għand in-​nies tal-​ġnus ‘biex jiftħilhom għajnejhom ħalli jerġgħu lura mid-​dlam għad-​dawl u mis-​setgħa tax-​xitan u jduru lejn Alla.’ (Atti 26:​17, 18) Jidher ċar li l-​għażla tagħna tar-​reliġjon tagħmel differenza. Ħafna min-​nies li Pawlu ntbagħat għandhom diġà kellhom reliġjon. Imma kienu fid-​“dlam.” Iva, kieku r-​reliġjonijiet kollha kienu biss toroq differenti li jwasslu għall-​ħajja taʼ dejjem u għall-​approvazzjoni t’Alla, kieku ma kienx ikun hemm għalfejn li Ġesù jħarreġ lis-​segwaċi tiegħu għax-​xogħol li inkarigahom bih, jiġifieri li jagħmlu dixxipli.—Mattew 28:​19, 20.

Fil-Priedka tal-​Muntanja famuża, Ġesù qal: “Għaddu mill-​bieb id-​dejjaq. Għax wiesaʼ l-​bieb u spazjuża t-​triq li tieħu għat-​telfien, u ħafna huma li jgħaddu minnha. Imma kemm huwa dejjaq il-​bieb u dejqa t-​triq li tieħu għall-​ħajja, u ftit huma li jsibuha!” (Mattew 7:​13, 14) Il-​Bibbja tgħid ċar u tond li hemm “fidi waħda.” (Efesin 4:5) Jidher ċar li ħafna li jinsabu fit-​triq “spazjuża” għandhom reliġjon. Imma m’għandhomx il-​“fidi waħda.” Billi hemm għamla taʼ qima vera waħda, dawk li jixtiequ jsibu l-​fidi vera jridu jibqgħu jfittxuha.

It-​Tfittxija għal Dak Alla Veru

Mill-​bidunett taʼ l-​istorja tal-​bniedem, Alla qal lill-​bnedmin x’iridhom jagħmlu. (Ġenesi 1:28; 2:​15-17; 4:​3-5) Illum aħna nistgħu nsibu fil-​Bibbja spjegazzjoni ċara taʼ dak li jirrikjedi minna. Permezz t’hekk nistgħu niddistingwu bejn dik li hi qima aċċettata u dik li m’hijiex. (Mattew 15:​3-9) Xi nies wirtuha r-​reliġjon tagħhom, filwaqt li oħrajn sempliċement jimxu mal-​maġġuranza fil-​komunità. Ħafna nies għandhom ir-​reliġjon li għandhom sempliċement minħabba ż-​żmien u l-​post li twieldu fih. Madankollu, għandek int tħalli l-​għażla tiegħek tar-​reliġjon tkun b’kumbinazzjoni jew tħalli lil ħaddieħor jieħu d-​deċiżjoni għalik?

L-għażla li tagħmel rigward reliġjon għandha tkun waħda informata u bbażata fuq eżami bir-​reqqa taʼ l-​Iskrittura. Fl-​ewwel seklu, ċerti nies t’edukazzjoni m’aċċettawx il-​kliem taʼ l-​appostlu Pawlu kif ġieb u laħaq. Huma “kuljum bdew iqallbu l-​Iskrittura biex jaraw jekk dak li semgħu kienx minnu.” (Atti 17:11; 1 Ġwann 4:1) Għala ma tagħmilx l-​istess ħaġa int stess?

Il-Bibbja tiddeskrivi lil Alla taʼ l-​univers bħala li qed ifittex lil nies biex iqimuh bil-​verità. Bħalma hemm miktub fi Ġwann 4:​23, 24, Ġesù spjega: “Imma tiġi siegħa, anzi issa hi, meta dawk li tassew jaduraw jibdew jaduraw lill-​Missier fl-​ispirtu u l-​verità. Għax il-​missier ukoll, nies bħal dawn ifittex li jadurawh. Alla huwa spirtu, u dawk li jadurawh għandhom jadurawh fl-​ispirtu u l-​verità.” Qima biss li hi ‘safja u bla tebgħa quddiem Alla u Missierna’ hija aċċettabbli għalih. (Ġakbu 1:27) Alla bierek it-​tfittxija taʼ miljuni taʼ nies għat-​triq id-​dejqa li twassal għall-​ħajja. Hu mhux se jagħti l-​ħajja eterna lil nies indifferenti, imma minflok se jagħtiha lil dawk li tassew jagħmlu sforz biex isibu t-​triq id-​dejqa li ħejja u mbagħad isegwuha.—Malakija 3:18.