Il-​Ħarsa tal-​Bibbja

Ħażin li Titnikket Minħabba l-​Mewt taʼ Xi Ħadd?

“MA RRIDUX LI MA TKUNUX TAFU, ĦUTI, FUQ IL-​MEJTIN BIEX MA SSEWDUX QALBKOM BĦALL-​OĦRAJN LI MA GĦANDHOMX TAMA.” —1 TESSALONIKIN 4:13.

IL-​BIBBJA toffri tama għal dawk li mietu. Il-​mirakli taʼ l-​irxoxt li wettaq Ġesù, kif ukoll it-​tagħlim tiegħu, jiġbdu l-​attenzjoni lejn żmien meta l-​mejtin se jerġgħu jingħataw il-​ħajja. (Mattew 22:23-33; Mark 5:35, 36, 41, 42; Luqa 7:12-16) Din it-​tama kif għandha teffettwana? Il-​kliem taʼ l-​appostlu Pawlu li huwa kwotat hawn fuq jindika li din it-​tama tistaʼ tkun taʼ faraġ meta xi ħadd maħbub imut.

Jekk mietlek xi ħadd li kont tħobb, int żgur li ġarrabt l-​uġigħ emozzjonali li jinħass meta jkun hemm traġedja bħal din. Theresa, li r-​raġel tagħha miet taʼ 42 sena ftit wara li kien għamel operazzjoni f’qalbu, tgħid: “Kien xokk kbir għalija! Għall-​ewwel qabadni biżaʼ kbir. Imbagħad bdejt inħoss uġigħ kbir ferm li baqaʼ jikber hekk kif kompla għaddej iż-​żmien. Bkejt ħafna.” Jekk wieħed jirreaġixxi hekk, ikun dan ifisser li naqsitlu l-​fidi fil-​wegħda taʼ Jehovah li jirxoxta lill-​mejtin? Il-​kliem taʼ Pawlu jfisser li huwa ħażin li wieħed jitnikket?

Eżempji mill-​Bibbja taʼ Wħud li Tnikktu

It-​tweġiba għal dawk il-​mistoqsijiet se nsibuha billi neżaminaw l-​eżempji mill-​Bibbja taʼ wħud li tnikktu. F’ħafna mir-​rakkonti, meta miet xi ħadd minn tal-​familja stess kien hemm ukoll perijodu taʼ vistu. (Ġenesi 27:41; 50:7-10; Salm 35:14) Is-​sentimenti marbutin maʼ dan iż-​żmien taʼ niket taʼ spiss kienu qawwijin ferm.

Ikkunsidra kif xi rġiel taʼ fidi tnikktu minħabba l-​mewt taʼ xi ħadd li kienu jħobbu. Per eżempju, Abraham kellu fidi qawwija li Alla setaʼ jirxoxta lill-​mejtin. (Lhud 11:19) Avolja kien daqstant konvint minn dan, meta mietet martu, hu “daħal jagħmel il-​vistu għal Sara u jibkiha.” (Ġenesi 23:1, 2) Meta wlied Ġakobb gidbu u qalulu li ibnu l-​maħbub Ġużeppi kien miet, Ġakobb “ċarrat ilbiesu u . . . bkieh.” (Ġenesi 37:34, 35) Fil-​fatt, ħafna snin wara, il-​ħsieb tal-​mewt taʼ ibnu l-​maħbub kien għadu jsewwidlu qalbu ħafna lil Ġakobb! (Ġenesi 42:36-38) Is-​sultan David ukoll wera b’mod qawwi u fil-​beraħ in-​niket tiegħu meta mietu wliedu Amnon u Absalom. Għalkemm it-​tnejn li huma ġabu l-​inkwiet lil David u lill-​familja tiegħu, xorta kienu wliedu, u l-​mewt tagħhom ġabitlu diqa kbira.—2 Samwel 13:28-39; 19:1 [18:33, NW].

Xi kultant, il-​ġens sħiħ taʼ Iżrael kien ikun imnikket bil-​mewt taʼ xi ħadd, bħalma ġara meta miet Mosè. Dewteronomju 34:8 jgħidilna li l-​Iżraelin damu 30 jum jibkuh.

Fl-​aħħarnett, għandna l-​eżempju taʼ Ġesù Kristu. Il-​ħabib kbir tiegħu Lazzru miet. U meta Ġesù ra kemm ħut Lazzru, Marta u Marija, u ħbiebhom bdew jibku, hu “ħass ruħu mqanqal u tħawwad ħafna.” Għalkemm kien jaf li ftit wara kien se jerġaʼ jġib lura għall-​ħajja lill-​ħabib tiegħu, hu xorta waħda “beka.” Ġesù kien iħobbhom lil ħbiebu l-​għeżież, Marta u Marija. Għalhekk tqanqal profondament meta ra d-​diqa kbira tagħhom għall-​mewt taʼ ħuhom.—Ġwann 11:33-36.

Abraham, Ġakobb, David, u Ġesù lkoll eżerċitaw fidi kbira f’Jehovah u fil-​wegħdi tiegħu, imma xorta sewdu qalbhom. Kien il-​fatt li tnikktu sinjal taʼ dgħjufija spiritwali? Id-​diqa tagħhom kienet tindika nuqqas taʼ fidi fl-​irxoxt? Xejn affattu! In-​niket huwa reazzjoni normali għall-​mewt taʼ xi ħadd maħbub.

Għala Nitnikktu

Qatt ma kien l-​iskop t’Alla li l-​bnedmin imutu. L-​iskop oriġinali taʼ Jehovah, bħalma ntqal lil Adam u Eva, kien li l-​art issir ġenna sabiħa mimlija b’familja ferħana fejn kulħadd iħobb lil xulxin. Il-​mewt kienet se tiġi biss jekk dik l-​ewwel koppja tagħżel li ma tobdix lil Jehovah. (Ġenesi 1:28; 2:17) B’dispjaċir, Adam u Eva veru m’obdewx, u minħabba d-​diżubbidjenza, “il-​mewt laħqet il-​bnedmin kollha.” (Rumani 5:12; 6:23) B’hekk, il-​mewt hija għadu kattiv li qatt ma suppost kellu jeżisti.—1 Korintin 15:26.

Mela, huwa raġunevoli li meta individwu jgħaddi minn ġrajja li m’hi naturali xejn, bħalma hija l-​mewt taʼ xi ħadd għal qalbu, se jħoss uġigħ emozzjonali kbir. Il-​mewt toħloq vojt enormi fil-​ħajja tagħhom. Theresa, l-​armla li semmejna iktar kmieni, qalet rigward żewġha: “Jien ċerta li se nerġaʼ narah fl-​irxoxt, imma issa nimmissjah wisq. Għalhekk inħossni mweġġgħa ħafna.” Il-​mewt taʼ xi ħadd mill-​ġenituri tistaʼ tfakkarna dwar li aħna stess immutu. Il-​mewt taʼ żagħżugħ jew żagħżugħa tkiddna b’mod partikulari minħabba li hija traġedja li wieħed ma jkunx għex ħajtu bis-​sħiħ.—Isaija 38:10.

Iva, il-​mewt mhix naturali. L-​uġigħ li tikkaġuna huwa mistenni, u Jehovah ma jqisx lil wieħed li jitnikket bħala li tkun naqsitlu l-​fidi fl-​irxoxt. Bħalma rajna mill-​eżempji t’Abraham, Ġakobb, David, il-​ġens taʼ Iżrael, u Ġesù, billi nesprimu bil-​miftuħ l-​uġigħ taʼ qalbna ma jfissirx li aħna dgħajfin spiritwalment.a

Madankollu, filwaqt li aħna bħala Kristjani żgur li nitnikktu minħabba l-​mewt, ma nsewdux qalbna “bħall-​oħrajn li ma għandhomx tama.” (1 Tessalonikin 4:13) Aħna ma nixhrux bin-​niket kemm nifilħu bla ebda kontroll għax m’aħniex imħawdin dwar il-​kundizzjoni tal-​mejtin. Aħna nafu li m’humiex qed iħossu wġigħ jew dwejjaq imma jinsabu bħallikieku f’raqda fonda, u fil-​paċi. (Koħèlet 9:5; Mark 5:39; Ġwann 11:11-14) Aħna wkoll fiduċjużi għalkollox li Ġesù, “il-​qawmien u l-​ħajja,” se jaġixxi rigward il-​wegħda tiegħu biex iġib lura lil “dawk kollha li jkunu fl-​oqbra.”—Ġwann 5:28, 29; 11:24, 25.

Għalhekk, jekk tinsab imnikket f’dan iż-​żmien, sib faraġ billi tkun konxju li Jehovah jifhem l-​uġigħ li qed tħoss. Jalla l-​fatt li tkun taf dan u t-​tama tiegħek fl-​irxoxt itaffulek in-​niket u jgħinuk tkampa mat-​telfa tiegħek.

[Nota taʼ taħt]