Għala Nemmen il-​Bibbja—Xjenzat Nukleari Jirrakkonta l-​Istorja Tiegħu

KIF RAKKONTATA MINN ALTON WILLIAMS

FL-​1978 ġraw żewġ affarijiet importanti ħafna f’ħajti. F’Settembru ħadt il-​lawrja taʼ fiżiku nukleari, u f’Diċembru nħtart bħala ministru tax-​Xhieda taʼ Jehovah.

Meta n-​nies isiru jafu li jien xjenzat u kif ukoll Xhud, spiss jistaqsu kif jirnexxili naċċetta l-​għarfien xjentifiku li għandi kif ukoll inżomm mat-​twemmin tiegħi fil-​Bibbja. Biex ngħid is-​sewwa, jien ukoll għamilt snin sħaħ nistaqsi lili nnifsi jekk l-​għarfien xjentifiku u t-​twemmin fil-​Bibbja jistgħux jaqblu flimkien. Madankollu, maż-​żmien sirt konvint mija fil-​mija li l-​Bibbja taqbel mal-​fatti xjentifiċi. Kif wasalt għal din il-​konklużjoni? Jekk jogħġobkom, ħalli l-​ewwel nirrakkontalkom kif sirt xjenzat.

Proġett taʼ 19-il Sena

Jien twilidt fl-​1953 f’Jackson, Mississippi, l-​Istati Uniti, it-​tielet wieħed minn ħdax. Aħna konna familja fqira. Ħafna drabi kien ikollna nbiddlu d-​dar għax il-​ġenituri tagħna ma kienx ikollhom flus biex iħallsu l-​kera. Il-​biċċa l-​kbira taʼ l-​ikel konna nirċivuh permezz taʼ skema tal-​gvern li tipprovdi sussidju fuq l-​ikel, u l-​ħwejjeġ użati li konna nilbsu kienu jagħtuhomlna n-​nies meta ommi kienet tmur tnaddfilhom id-​djar u l-​uffiċċji.

Il-ġenituri tagħna spiss kienu jfakkru lilna t-​tfal li l-​uniku mod biex neħilsu mill-​faqar kien li niksbu edukazzjoni tajba. B’riżultat t’hekk, minn età żgħira ħafna daħħaltha f’rasi li mmur l-​università u nġib il-​lawrja. Bdejt l-​iskola meta kelli sitt snin, u komplejt nistudja bla waqfien għad-​19-il sena taʼ wara. Is-​suġġetti favoriti tiegħi kienu x-​xjenza u l-​matematika, u għalhekk, meta dħalt l-​università bdejt nistudja biex insir xjenzat.

Meta kont l-​università, iltqajt maʼ tfajla jisimha Del. Wieħed mill-​professuri tax-​xjenza kien qalilha biex tkellimni ħalli ngħinha f’xi kors tax-​xjenza li kienet qed tagħmel. Madankollu, wara ftit żmien ma bqajniex nitkellmu biss fuq ix-​xjenza, u sirna nħobbu lil xulxin. Iżżewwiġna fl-​10 taʼ Jannar, 1974​—waqt pawsa taʼ sagħtejn bejn lezzjoni u oħra! Erbaʼ snin wara, fl-​1978, fl-​aħħar ġibt id-​dottorat tiegħi.

Kont naħseb li issa sibt is-​sigriet tas-​suċċess. Kont sirt xjenzat​—u mhux xjenzat kwalunkwe imma fiżiku nukleari! Issa li kelli f’idi lawrja fil-​fiżika nukleari teoretika, stajt nibda ngawdi l-​frott taʼ l-​istudji twal tiegħi. Kont ħerqan li nsir magħruf fil-​qasam xjentifiku. Minbarra hekk, issa stajt nagħżel impjieg mill-​ħafna proposti tajbin taʼ xogħol li bdew jagħmluli kumpaniji privati u istituzzjonijiet tal-​gvern.

Madankollu, ftit xhur wara, fit-​30 taʼ Diċembru, 1978, għamilt xi ħaġa li malajr uriet li kellha ħafna iktar influwenza fuq ħajti u l-​futur tiegħi milli kellha l-​lawrja li kont għadni kemm ġibt. Dakinhar, jien issimbolizzajt id-​dedikazzjoni tiegħi lil Alla Jehovah permezz tal-​magħmudija fl-​ilma u b’hekk sirt wieħed mix-​Xhieda taʼ Jehovah. Kif kont wasalt għal dan il-​pass?

Ktieb Qanqalli l-​Interess

Lejn it-​tmiem taʼ l-​1977, waqt li kont qed nistudja fl-​Università taʼ Massachusetts f’Amherst, ġew żewġ Xhieda jħabbtu l-​bieb taʼ l-​appartament tiegħi. Jien ma kontx id-​dar imma kien hemm il-​mara bit-​tfal tagħna, tifel taʼ tliet snin u tarbija tat-​twelid. Del stiednet lix-​Xhieda biex jidħlu ġewwa. Wara konversazzjoni sabiħa, hi aċċettat li x-​Xhieda jiġu jżuruha darba fil-​ġimgħa biex jikkonduċu magħha studju tal-​Bibbja.

Malli l-​mara qaltli b’dan l-​arranġament, jien mill-​ewwel waqaftilha. Ma kontx se niddejjaq għax riedet tingħaqad maʼ xi reliġjon​—basta mhux max-​Xhieda taʼ Jehovah! Fil-​fatt, ma tantx kont naf dwar ix-​Xhieda, imma kelli l-​idea żbaljata li huma kienu xi grupp stramb li kien juża l-​Bibbja biex iqarraq bin-​nies. Għalhekk, biex mingħalija nipprova neħles lil marti minn taħt idejn ix-​Xhieda, ġieni f’moħħi li nuża l-​għarfien xjentifiku tiegħi biex inwaqqaʼ t-​tagħlim tagħhom.

Darba minnhom ħadt pawsa mix-​xogħol taʼ riċerka li kont nagħmel l-​università u mort id-​dar biex inkun preżenti għall-​istudju tal-​Bibbja taʼ marti. Madankollu, wasalt id-​dar iktar tard milli xtaqt, u l-​mara li kienet tikkonduċi l-​istudju tal-​Bibbja kienet lesta biex titlaq. Hi tatni ktieb jismu Did Man Get Here by Evolution or by Creation? (Il-Bniedem Ġie bl-​Evoluzzjoni jew bil-​Ħolqien?)a Hi qalet ukoll lil marti li fl-​istudju tal-​Bibbja tal-​ġimgħa taʼ wara, kienu se jikkunsidraw profezija Biblika li turi li l-​1914 kienet sena importanti ħafna. Issa kienet ġietni x-​xoqqa f’moxtha! Jien għedt lix-​Xhud li kont se nkun id-​dar għad-​diskussjoni Biblika li kien imiss. Ridt niċċekkja l-​eżattezza matematika taʼ dak li kienet se tiddiskuti dwar is-​sena 1914.

Dik il-​lejla stess bdejt naqra l-​ktieb li kienet ħallietli x-​Xhud. Biex inkun onest, bqajt impressjonat b’dak li kien fih. Kien miktub b’mod loġiku, u kien fih għadd taʼ referenzi xjentifiċi dwar is-​suġġett taʼ l-​evoluzzjoni. Bqajt sorpriż meta sibt li l-​Bibbja fiha ħafna iktar informazzjoni eżatta dwar il-​ħolqien milli kont naħseb qabel. Fi ftit ġranet eżaminajt il-​ktieb kollu u kelli nammetti li dak li l-​Bibbja kienet fil-​fatt tgħid dwar il-​ħolqien ma jikkontradixxix il-​fatti xjentifiċi magħrufin dwar il-​ħajja fuq l-​art.

Determinat li Nsib Kontradizzjonijiet

Minkejja dan, xorta kont għadni dubjuż dwar it-​tagħlim tax-​Xhieda u kont qed inħares ’il quddiem biex niċċekkja b’mod matematiku l-​profezija Biblika dwar is-​sena 1914. Ħsibt li x-​Xhud żgur kienet se tibżaʼ x’ħin niffaċċjaha b’dan il-​mod, u t-​tama tiegħi kienet li ngħin lil marti tara kemm kien żbaljat it-​twemmin li kienu jgħallmu x-​Xhieda.

Il-ġimgħa taʼ wara x-​Xhud ġiet maʼ raġel li kien wieħed mill-​anzjani fil-​kongregazzjoni lokali tax-​Xhieda taʼ Jehovah. L-​anzjan ikkonduċa l-​istudju tal-​Bibbja. Hu kkunsidra l-​profeziji minn kapitli 4 u 9 tal-​ktieb Bibliku taʼ Danjel, dwar kif kellu jidher Ġesù bħala Messija u Sultan. Jien kelli f’moħħi li nsib kontradizzjonijiet matematiċi fl-​ispjegazzjoni tiegħu, imma ma sibt xejn. Għall-​kuntrarju, erġajt bqajt impressjonat bl-​informazzjoni loġika li hemm fil-​Bibbja.

Sa dakinhar, jien kont naħseb li l-​fidi f’Alla kienet iktar ibbażata fuq l-​emozzjonijiet milli fuq ir-​raġuni. Kemm kont żbaljat! Irringrazzjajt lix-​Xhieda għad-​diskussjoni informattiva u għedtilhom li xtaqt nibqaʼ nipparteċipa fl-​istudju taʼ kull ġimgħa. Għalhekk, minn dakinhar ’il quddiem komplejt bl-​istudji tiegħi fl-​università u komplejt nistudja l-​Bibbja max-​Xhieda flimkien mal-​mara tiegħi. Barra minn hekk, jien u l-​mara bdejna nattendu l-​laqgħat tax-​Xhieda li jinżammu fis-​Sala tas-​Saltna.

Fi ftit xhur, tgħallimt ħafna veritajiet Bibliċi ġodda u ma domtx ma kkwalifikajt biex noħroġ max-​Xhieda fil-​ministeru minn bieb għal bieb. Dan ix-​xogħol kont nagħmlu avolja kont kważi wasalt biex inġib id-​dottorat mill-​università, xi ħaġa li kienet tiħodli ħafna mill-​ħin tiegħi. Fis-​sajf taʼ l-​1978 lestejt it-​teżi tiegħi u morna noqogħdu fl-​istat t’Alabama, fejn bdejt ngħallem il-​fiżika fl-​Università t’Alabama A. & M., f’Huntsville. Malajr ikkuntattjajna lix-​Xhieda f’dan il-​post ġdid u wieħed anzjan u l-​mara tiegħu komplew jistudjaw il-​Bibbja magħna. Ftit xhur wara, jien u marti tgħammidna t-​tnejn fl-​istess ġurnata.

Attiv Bħala Xjenzat u Ministru

Jien sibt li fil-​każ tiegħi stajt inkun xjenzat u fl-​istess ħin Xhud taʼ Jehovah. Fl-​1983, bdejt naħdem bħala astrofiżiku fiċ-​Ċentru George C. Marshall għat-​Titjir Spazjali tan-​NASA (National Aeronautics and Space Administration [Amministrazzjoni Nazzjonali Ajrunawtika u Spazjali]), f’Huntsville ukoll.b Hemmhekk kont naħdem fl-​oqsma taʼ l-​esperimenti u t-​teorija assoċjati maʼ teleskopju bl-​eksrejs. (Fl-1999 dan it-​teleskopju​—l-​Osservatorju Chandra bl-​Eksrejs—intbagħat fl-​orbita b’suċċess mill-​vettura spazjali Columbia.) Ħadt pjaċir naħdem fuq dan il-​proġett li kien jinvolvi l-​istudju taʼ l-​eksrejs li joħorġu minn diversi kwiekeb u galassji sabiex nipprovaw nifhmu l-​univers fiżiku b’mod aħjar.

Ix-xogħol tiegħi kont nieħu pjaċir nagħmlu d-​doppju, għax mhux biss kont qed naħdem fuq problema xjentifika diffiċli imma wkoll bdejt napprezza iktar fil-​fond il-​qawwa u l-​għerf tal-​Ħallieq. Fil-​fatt, il-​kliem li qal Jehovah permezz tal-​profeta tal-​qedem Isaija sar ifisser xi ħaġa speċjali għalija. Il-​Ħallieq jgħid: “Erfgħu għajnejkom ’il fuq u araw: min ħalaqhom dawn il-​ħlejjaq kollha? Imexxi u jgħodd l-​eżerċti tiegħu, u jsejjħilhom b’isimhom wieħed wieħed. Bis-​saħħa taʼ qawwietu, bil-​qawwa taʼ setgħetu, ħadd minnhom ma jonqos.” (Isaija 40:26) Iktar ma kont ‘nerfaʼ għajnejja ’l fuq’ u nara l-​univers immens, kumpless, u mill-​isbaħ, iktar bdejt napprezza x-​xogħol tad-​Disinjatur intelliġenti li ħalaq dan kollu u għamel liġijiet biex kollox jibqaʼ jaħdem tajjeb flimkien.

Matul dan iż-​żmien, kont imħabbat ħafna nippubblika materjal ġdid f’ġurnali xjentifiċi bbażat fuq ir-​riċerka tiegħi dwar l-​astrofiżika relatata maʼ l-​eksrejs. Madankollu, kont attiv ukoll fil-​kongregazzjoni Kristjana. Kont naqdi bħala anzjan u nqattaʼ madwar 20 siegħa fix-​xahar fix-​xogħol taʼ l-​ippridkar pubbliku. Sadanittant, marti kienet tieħu sehem fix-​xogħol edukattiv tal-​Bibbja fuq bażi full-time.

Wara li għamilt erbaʼ snin naħdem man-​NASA, bdejt inħoss iktar il-​bżonn li nagħti iktar mill-​ħin tiegħi biex ngħin lil oħrajn jitgħallmu l-​veritajiet taʼ l-​għaġeb li hemm fil-​Bibbja. Imma kif stajt nagħmlu dan? Wara li tkellimt maʼ marti dwar ix-​xewqa li kelli, u tlabt lil Jehovah dwarha, irrealizzajt li kien se jkolli nieħu xi deċiżjonijiet importanti.

Deċiżjonijiet Serji

Jien avviċinajt lill-​imgħallem tiegħi fin-​NASA u għedtlu li ridt innaqqas il-​ġimgħa tax-​xogħol tiegħi minn ħamest ijiem għal erbat ijiem. M’għandniex xi ngħidu, kont lest li naċċetta inqas paga. Spjegajtlu li xtaqt inqattaʼ t-​tlett ijiem l-​oħra tal-​ġimgħa f’konnessjoni mal-​ministeru tiegħi. L-​imgħallem tiegħi aċċetta, avolja dan l-​arranġament ma kontx tismaʼ bih fost ix-​xjenzati tan-​NASA. Madankollu, hu qalli li kien hemm bżonn li nkellem lill-​imgħallem taʼ fuqu, li kien f’pożizzjoni għolja. Hekk għamilt u b’sorpriża kbira dan ukoll qabel mat-​talba tiegħi. Għalhekk, f’Settembru taʼ l-​1987 bdejt il-​karriera tiegħi bħala ministru full-time, u bdejt inqattaʼ mad-​90 siegħa fix-​xahar fl-​ippridkar minn bieb għal bieb u f’oqsma oħra tal-​ministeru.

Xi żmien wara, ċempilli wieħed mill-​kapijiet fl-​Università t’Alabama A. & M. f’Huntsville. Hu offrieli xogħol bħala għalliem fid-​dipartiment tal-​fiżika. Jien weġibtu li kont lest naċċetta l-​impjieg basta nkun nistaʼ nqattaʼ l-​maġġuranza tal-​ħin tiegħi fil-​ministeru. Madankollu, serraħtlu moħħu li l-​attivitajiet tiegħi fil-​ministeru ma kinux se jnaqqsu l-​kwalità taʼ xogħli bħala għalliem fil-​klassi. Il-​kap aċċetta. Illum, jien għadni ngħallem f’din l-​università u naqdi wkoll bħala ministru full-time. Saħansitra sibt il-​ħin biex nitgħallem l-​Ispanjol. Bħalissa, jien u marti qed naqdu f’kongregazzjoni tax-​Xhieda taʼ Jehovah bil-​lingwa Spanjola f’Huntsville.

Ix-​Xjenza u l-​Fidi

Fis-​snin kollha li ilni nagħmel riċerka xjentifika, qatt ma ltqajt maʼ xi kontradizzjoni bejn fatt xjentifiku provat u xi tagħlim tal-​Bibbja. Ħafna drabi, jistaʼ jidher li hemm kontradizzjoni għar-​raġuni li dak li jkun jew ma jkollux biżżejjed għarfien​—jew xjentifiku jew dwar x’tgħid eżatt il-​Bibbja. Per eżempju, xi xjenzati u nies oħra b’mod żbaljat jaħsbu li l-​Bibbja tgħallem li l-​pjanti, l-​annimali, u l-​bnedmin żviluppaw ilkoll kemm huma fuq l-​art fi żmien sitt ijiem letterali t’24 siegħa kull wieħed. Dan ir-​raġunar ma jaqbilx mal-​fatti xjentifiċi stabbiliti. Imma l-​Bibbja ma tgħallimx hekk. Minflok, din turi li l-​“ġranet” kreattivi jinvolvu eluf taʼ snin.c

Konfużjoni oħra tqum mill-​idea żbaljata li l-​fidi f’Alla hija sempliċement xi esperjenza emozzjonali. Għall-​kuntrarju, il-​fidi f’Alla u fil-​Bibbja hija bbażata fuq fatti li jistgħu jiġu provati. Bħalma tispjega l-​Bibbja, “il-​fidi hija pedament tal-​ħwejjeġ li għandna nittamaw, hija l-​prova tal-​ħwejjeġ li ma narawx.” (Lhud 11:1) Iva, il-​fidi hija bbażata fuq il-​provi, l-​evidenza. Fil-​passat u fi żmienna twettqu mijiet taʼ profeziji. Għaldaqstant, anki jekk napplikaw il-​metodu xjentifiku li jużaw ix-​xjenzati kollha biex jistabbilixxu teorija xjentifika, jistaʼ jkollna fiduċja sħiħa li l-​profeziji Bibliċi dwar ġrajjiet futuri se jitwettqu żgur.

Waħda minn dawn il-​profeziji tinkludi l-​wegħda li fil-​futur qarib, aħna għad ingawdu din l-​art bħala Ġenna. L-​effetti qerrieda tax-​xjuħija, il-​mard, il-​mewt, il-​gwerer, u l-​inġustizzji mhux se jkunu iktar. (Apokalissi 21:​3, 4) Dakinhar se jkollna ċans nesploraw u nistudjaw bir-​reqqa l-​ħolqien meraviljuż t’Alla Jehovah u l-​ħafna liġijiet li stabbilixxa biex imexxi dan l-​univers fiżiku u taʼ l-​għaġeb.

Jien grat lejn Alla Jehovah li għenni nsib is-​sigriet tal-​ferħ veru—il-​veritajiet meraviljużi li hemm fil-​Kelma tiegħu, il-​Bibbja. It-​talba tiegħi hi li ħafna oħrajn, inkluż xjenzati, isibu dan is-​sigriet ukoll.

[Noti taʼ taħt]

[Kumment f’paġna 20]

Kont naħseb li l-​fidi f’Alla kienet iktar ibbażata fuq l-​emozzjonijiet milli fuq ir-​raġuni

[Kumment f’paġna 22]

Qatt ma ltqajt maʼ xi kontradizzjoni bejn fatt xjentifiku provat u xi tagħlim tal-​Bibbja

[Stampa f’paġna 21]

Jien immantni lill-​familja tiegħi billi ngħallem “part-time”

[Stampi f’paġna 23]

L-​Osservatorju Chandra bl-​Eksrejs tan-​NASA fl-​orbita u immaġni bl-​eksrejs taʼ toqba sewda b’sistema binarja tal-​kwiekeb

[Sorsi]

NASA Photo

NASA/CfA/J. McClintock et al.

[Stampa f’paġna 23]

Jien u l-​mara ngawdu l-​ministeru full-time