Żgħażagħ li Jitkellmu bil-​Qlubija dwar il-​Fidi Tagħhom

FOST ix-​Xhieda taʼ Jehovah hemm ħafna żgħażagħ. Huma jħobbu lil Alla u jitħabtu sabiex jgħixu fi qbil mal-​prinċipji li nsibu fil-​Bibbja. Dawn iż-​żgħażagħ huma kburin bil-​fidi tagħhom, u jitkellmu dwarha m’oħrajn fl-​iskola. Ikkunsidra ftit eżempji.

◼ Meta Holly kienet Form 1, hi u sħabha tal-​klassi kellhom jiktbu komponiment fuq il-​mistoqsija “Kieku int kif issolvi l-​problema tat-​terroriżmu mingħajr ma tuża l-​vjolenza?” Holly ħatfet din l-​opportunità biex tikteb dwar it-​tama li għandha bbażata fuq il-​Bibbja għall-​futur. Spjegat li tul l-​istorja, ‘bniedem ħakem fuq ieħor u għamillu l-​ħsara.’ (Koħèlet 8:9) Imbagħad ġibdet l-​attenzjoni fuq l-​unika tama għall-​bnedmin​—is-​Saltna t’Alla. Hi kitbet, “Ladarba Ġesù huwa s-​Sultan maħtur taʼ din is-​Saltna, il-​problemi kollha, inkluż it-​terroriżmu, se jispiċċaw darba għal dejjem.” Holly elaborat dwar kif Ġesù se jwettaq dak li ebda ħakkiem uman ma jistaʼ jwettaq. Hi kitbet, “Meta kien fuq l-​art, Ġesù wera x’tip taʼ ħakkiem se jkun. Kien jaf iħobb u kien jimpurtah min-​nies. Hu wera l-​qawwa li kellu billi fejjaq lill-​morda u rxoxta lill-​mejtin. L-​ebda gvern uman m’hu kapaċi jagħti l-​ħajja lil dawk li mietu. Iżda s-​Saltna t’Alla hekk se tagħmel.” Holly ikkonkludiet l-​komponiment tagħha b’din l-​istqarrija, “Alla biss jistaʼ jsolvi l-​problema tat-​terroriżmu, u mhux il-​bniedem.”

Fl-aħħar tar-​rapport tagħha, l-​għalliema kitbet: “Prosit! Impressjonanti ħafna, Holly. U maħsub tajjeb ħafna.” Lgħalliema kienet impressjonata wkoll bir-​referenzi Skritturali li pprovdiet Holly. Dan ta lil Holly l-​opportunità biex titkellem maʼ l-​għalliema tagħha dwar l-​Iskola tal-​Ministeru Teokratiku, programm taʼ diskussjonijiet u tagħlim li jsir mix-​Xhieda taʼ Jehovah kull ġimgħa. L-​għalliema tagħha aċċettat bil-​ferħ kopja tal-​ktieb li jintuża fl-​Iskola tal-​Ministeru.

◼ Jessica wkoll kellha l-​opportunità li titkellem dwar il-​fidi tagħha f’diversi komponimenti li kellha taʼ l-​iskola. “Fi tlieta minnhom irnexxieli nikteb tliet komponimenti dwar it-​twemmin tiegħi,” tgħid hi. “Wieħed kien dwar ix-​Xhieda taʼ Jehovah u d-​drittijiet reliġjużi. L-​għalliema għamlitu fil-​librerija biex b’hekk dawk li xtaqu jaqrawh setgħu jagħmlu dan. Ftit ilu ktibt dwar il-​magħmudija tiegħi u dwar kemm din kienet ġurnata importanti għalija. Peress li bejnietna l-​istudenti bdejna naqsmu xi punti dwar dak li konna ktibna, sħabi tal-​klassi kellhom ċans jaqraw dak li kont ktibt. Waħda tfajla qalet: ‘Prosit. Tajjeb tkun taf id-​dmirijiet taʼ persuna li hi Xhud taʼ Jehovah. Prosit li tgħammidt!’ Tfajla oħra qalet: ‘Dak li rrakkontajt kien sabiħ ħafna! Jien ferħana li l-​fidi tiegħek hi daqshekk soda!’ Wieħed minn sħabi tal-​klassi sempliċement kiteb: ‘Għandek rasek fuq għonqok. Prosit.’”

◼ Meta Melissa kellha 11-il sena kellha opportunità unika li titkellem dwar il-​fidi tagħha. “L-​infermiera taʼ l-​iskola ġiet waqt il-​lezzjoni tiegħi tax-​xjenza biex tkellimna dwar is-​sistema taʼ l-​immunità. Qam is-​suġġett tat-​trasfużjonijiet tad-​demm. Wara li spiċċat il-​lezzjoni, għedt lill-​għalliem tiegħi tax-​xjenza dwar wieħed mill-​vidjos li għandna dwar id-​demm. L-​għada ħadtu miegħi l-​iskola, u l-​għalliem tiegħi ħadu d-​dar u rah mal-​familja tiegħu. Il-​ġurnata taʼ wara, ġab il-​vidjo l-​iskola u wrieh lil żewġ klassijiet, inkluż tiegħi. Imbagħad għamel kummenti sbieħ dwar ix-​Xhieda taʼ Jehovah, u qal lill-​klassi li kieku ma kienx għalina, ix-​Xhieda, ma kienx ikun hawn alternattivi oħra għat-​trasfużjonijiet. Meta ġie biex jagħtini l-​vidjo lura staqsieni, ‘Kif nistaʼ nikseb kopja għal-​librerija taʼ l-​iskola?’ Jien tajtu kopja. Kien ferħan ħafna b’dan, u anki jien!”

Holly, Jessica, u Melissa huma fost ħafna Xhieda taʼ Jehovah żgħażagħ li jsegwu t-​twissija mill-​Bibbja biex jiftakru fil-​Ħallieq tagħhom. (Koħèlet 12:1) Qiegħed tagħmel hekk int ukoll? Jekk inhu hekk, tistaʼ tkun ċert li qed tferraħ qalb Jehovah.​—Proverbji 27:11; Lhud 6:10.

Meta intom iż-​żgħażagħ titkellmu dwar il-​fidi tagħkom maʼ sħabkom taʼ l-​iskola u maʼ l-​għalliema, tkunu qegħdin tagħtu xiehda qawwija dwar Alla Jehovah u l-​iskopijiet tiegħu. Dan isaħħilkom il-​fidi tagħkom ukoll, u jiżviluppa fikom kburija bnina bil-​privileġġ li għandkom li tkunu fost il-​qaddejja t’Alla. (Ġeremija 9:​23, [9:​24, NW]) Meta tagħtu xiehda l-​iskola dan se jkun ukoll taʼ protezzjoni għalikom. Jessica tiddeskrivih b’dan il-​mod: “Benefiċċju wieħed li hemm meta nitkellem dwar dak li nemmen hu li l-​istudenti ma jagħmlulix pressjoni biex nagħmel affarijiet li m’humiex fi qbil maʼ dak li tgħid il-​Bibbja.”

[Stampi f’paġna 12]

Holly

[Stampi f’paġna 12, 13]

Jessica

[Stampi f’paġna 13]

Melissa