Mingħand il-​Qarrejja

Tama Din hija biss nota qasira biex nesprimu l-​apprezzament profond tagħna għas-​serje “It-​Tama​—Fejn Tistaʼ Ssibha?” (8 taʼ Mejju, 2004) Aħna qrajnieha flimkien bħala familja u, meta wasalna fl-​aħħar, għajnejna kienu mimlijin bid-​dmugħ. L-​istampi b’dik il-​fjura għamlu effett viżwali mill-​isbaħ.

H. H. & L. H., Stati Uniti

Ommi mietet ġimgħa qabel ma rċivejt din il-​ħarġa, u jien sibt faraġ kbir fil-​kliem “Il-​mejtin jinsabu fl-​iktar sitwazzjoni protetta li tistaʼ timmaġina, bħal tarbija fil-​kenn taʼ ġuf ommha.” Jien għadni mnikkta minħabba l-​mewt t’ommi, imma ferħana li hi protetta fil-​memorja taʼ Ġeħova.

V. L., Stati Uniti

Jien għandi marda li m’hemmx fejqan għaliha. Nipprova nibqaʼ pożittiva, imma llum qomt u ħassejtni ddisprata. Għalhekk qrajt l-​artikli għal darba wara l-​oħra. Dawn urew li tassew hemm min qed jifhem minn xiex inkun għaddejja, u jien ksibt faraġ kbir minnhom.

B. J., Britannja

Meta tiġrili xi ħaġa ħażina, għandi t-​tendenza li nippanikja. Dawn l-​artikli huma t-​tweġiba għat-​talb tiegħi! Il-​passi kif tingħeleb ħarsa pessimista tant kienu speċifiċi li meta jiġuni f’moħħi ħsibijiet pessimisti, nistaʼ napplika dawn il-​passi wieħed wieħed. Inżomm din ir-​rivista ħdejn is-​sodda tiegħi u nagħtiha daqqa t’għajn kuljum.

S. T., Ġappun

Diskoteki Grazzi taʼ l-​artiklu “Iż-​Żgħażagħ Jistaqsu . . . X’Għandha Tkun il-​Ħarsa Tiegħi Lejn id-​Diskoteki?” (8 taʼ Mejju, 2004) Jien naqbel li dawn id-​diskoteki m’humiex postijiet għall-​Kristjani. Jiddispjaċini li ma kontx naf lil Ġeħova qabel f’ħajti, meta kont immur f’dawn id-​diskoteki.

L., Indoneżja

Biex inkun onesta, jien mort f’postijiet li mhux suppost li mort fihom. Inħobb niżfen, u dejjem ipprovajt niġġustifika lili nnifsi. L-​għada dejjem kont inħossni ħatja. Mhux għax inkun għamilt xi ħaġa ħażina; imma minħabba l-​kondotta ħażina taʼ dawk taʼ madwari! L-​artiklu kixef il-​verità dwar id-​diskoteki​—li ħafna minnhom huma perikolużi u immorali.

D. K., Awstralja

Ħin Grazzi ħafna taʼ l-​artiklu “Kun fil-​Ħin!” (8 t’April, 2004) Il-​fatt li jien kap taʼ familja, għandi responsabbiltajiet fil-​kongregazzjoni u għandi xogħol sekulari, jiħodli ħafna mill-​ħin tiegħi. Ħadt vantaġġ minn xi suġġerimenti li dehru fir-​rivisti fil-​passat, imma ħadt gost nerġaʼ nara artiklu bħal dan. Għoġbitni speċjalment l-​istqarrija “Il-​Ħallieq tagħna kellu l-​ħsieb għalina li nkunu konxji tal-​ħin.” Dan verament jagħtina ħarsa xierqa. Jekk jogħġobkom komplu iktbu artikli prattiċi bħal dan.

J. S., Stati Uniti

Spiss inħalli l-​affarijiet għall-​aħħar minuta, u għalkemm m’iniex xi waħda li nħobb nasal tard, spiss nibqaʼ rieqda. Kelli ħafna esperjenzi koroh minħabba l-​għaġla. Dan l-​artiklu għenni biex nipprova nqassam il-​ħin tiegħi b’mod aħjar.

Y. W., Ġappun

Dejjem kont inkun tard għal-​laqgħat. Tlabt dwar dan, u jien ferħan li Ġeħova wieġeb it-​talb tiegħi. Ipprovajt is-​suġġerimenti fl-​artiklu, u sejjer tajjeb ħafna. Issa sirt nasal fil-​ħin. Irrealizzajt li hi l-​imħabba li tgħinna nkunu fil-​ħin.

J. A., Niġerja