Iż-​Żgħażagħ Jistaqsu . . .

Għala Għandi Nagħmel Xogħol Manwali?

“Qatt ma immaġinajt li se nagħmel xi xogħol taʼ l-​idejn. Kont iktar nieħu pjaċir nuża l-​kompjuter.”​—Nathan.

“Xi tfal kienu jmaqdru lil dawk minna li konna nagħmlu xogħol fiżiku bħallikieku ma konniex intelliġenti biżżejjed biex nagħmlu xi ħaġa oħra.”​—Sarah.

IX-​XOGĦOL TAʼ L-​IDEJN​—ħafna jqisuh tedjanti, maħmuġ, u xejn mixtieq. Professur taʼ l-​ekonomija jgħid dwar il-​ħidma bl-​idejn: “Dan ix-​xogħol ma tantx jitqies prestiġjuż f’din id-​dinja li moħħha fil-​prestiġju.” Mela, mhux taʼ b’xejn li ħafna żgħażagħ ixammru mneħirhom x’ħin issemmilhom ħidma li tinvolvi sforz fiżiku.

Madankollu, il-​Bibbja tinkuraġġixxi ħarsa kemxejn differenti lejn ix-​xogħol iebes. Is-​Sultan Salamun qal: “M’hemmx aħjar għall-​bniedem milli jiekol u jixrob u li jgawdi l-​frott taʼ xogħlu.” (Koħèlet 2:24) Fi żminijiet Bibliċi, Iżrael kien soċjetà agrikola. Il-​ħrit, il-​ħsad, u d-​dris kienu kollha jinvolvu sforz fiżiku kbir. Però, Salamun qal li x-​xogħol iebes setaʼ jkun tassew premjanti.

Sekli wara, l-​appostlu Pawlu qal: “Min kien jisraq ħa ma jisraqx iktar, imma minflok ħa jaħdem iebes u jagħmel b’idejh xogħol tajjeb.” (Efesin 4:28) Pawlu stess kien jaf x’jiġifieri li tagħmel xogħol manwali. Għalkemm kien raġel t’edukazzjoni għolja, hu kultant mantna lilu nnifsu billi għamel it-​tined.—Atti 18:​1-3.

Kif tħossok dwar ix-​xogħol taʼ l-​idejn? Sew jekk tirrealizza u sew jekk le, ix-​xogħol fiżiku jistaʼ jibbenefikak b’ħafna modi.

Taħriġ għal Ħajtek

Il-​fatt li taħdem iebes b’mod fiżiku—sew billi tuża martell jew taqtaʼ l-​ħaxix ħażin—jistaʼ jkun tajjeb għal saħħtek. Il-​benefiċċji m’humiex biss li tibqaʼ f’saħħtek u jkollok figura tajba. Taf kif issewwi panċer jew tibdel iż-​żejt tal-​karozza? Taf tibdel ħġieġa mkissra jew tiftaħ katusa misduda? Taf issajjar? Taf tnaddaf kamra tal-​banju u ġġibha pinna? Dawn huma ftit mill-​abbiltajiet li kemm il-​ġuvintur u kemm it-​tfajliet tajjeb li jitgħallmuhom, abbiltajiet li jistgħu jgħinuk tirnexxi jekk xi darba tgħix waħdek.

Huwa interessanti li Ġesù Kristu nnifsu milli jidher tgħallem sew xi snajjaʼ waqt li kien fuq l-​art. Hu tgħallem is-​sengħa taʼ mastrudaxxa—bla dubju minn missieru adottiv, Ġużeppi—għax kienu jsejħulu l-​mastrudaxxa. (Mattew 13:55; Marku 6:3) Int ukoll tistaʼ titgħallem diversi abbiltajiet utli billi tuża idejk.

Tibni l-​Karattru

Ix-​xogħol iebes jistaʼ jeffettwa wkoll kif tħossok dwarek innifsek. Meta kien qed jikteb għaċ-​Ċentru Nazzjonali Amerikan għas-​Saħħa Mentali u l-​Edukazzjoni, Dr. Fred Provenzano jgħid li jekk titgħallem tagħmel affarijiet b’idejk tistaʼ ssir iktar indipendenti u kunfidenti b’mod ġenerali u tistaʼ titgħallem tiddixxiplina lilek innifsek u tkun organizzat, abbiltajiet li jgħinuk tirnexxi fix-​xogħol sekulari. Żagħżugħ li jismu John jgħid: “Ix-​xogħol fiżiku jgħinek titgħallem il-​paċenzja. Titgħallem kif għandek taħdem waqt li ssolvi l-​problemi.”

Sarah, li kkwotajnieha qabel, tispjega: “Minħabba li għamilt xogħol taʼ l-​idejn, tgħallimt inkun bieżla. Tgħallimt inkun dixxiplinata kemm mentalment u kemm fiżikament.” Ix-​xogħol iebes għandu għalfejn ikun tedjanti? Nathan jgħid: “Tgħallimt nieħu gost bix-​xogħol taʼ l-​idejn. Iktar ma tejjibt l-​abbiltajiet tiegħi iktar rajt il-​kwalità taʼ xogħli tmur għall-​aħjar. Dan żiedli r-​rispett lejja nnifsi.”

Il-ħidma bl-​idejn tistaʼ tgħallmek tifraħ u tkun sodisfatt b’dak li twettaq. Żagħżugħ jismu James jgħid hekk: “Jien nieħu pjaċir naħdem fl-​injam. Għalkemm kultant negħja fiżikament, dejjem inkun nistaʼ nħares lura lejn dak li nkun għamilt u nħossni sodisfatt. Tħossok tassew kuntent.” Brian iħossu l-​istess. “Nieħu pjaċir naħdem fuq il-​karozzi. Minħabba li naf li nistaʼ nsewwi xi ħaġa li tkun imkissra u nagħmilha daqslikieku ġdida, inħossni kunfidenti u sodisfatt.”

Servizz Sagru

Il-​fatt li ż-​żgħażagħ Kristjani jkunu kapaċi jaħdmu iebes se jgħinhom fis-​servizz tagħhom lil Alla. Meta s-​Sultan Salamun ngħata l-​inkarigu li jibni tempju meraviljuż għal Ġeħova, hu rrealizza li din il-​biċċa xogħol kienet teħtieġ ħafna u ħafna sforz u snajjaʼ. Il-​Bibbja tgħid: “Is-​sultan Salamun bagħat iġib lil Ħiram minn Tir. Dan kien bin mara armla, mit-​tribù taʼ Naftali, u missieru kien minn Tir, jaħdem il-​bronż. Kien mimli kollu għerf u dehen, u jaf jaħdem kull xogħol tal-​bronż. Ġie għand is-​sultan Salamun u ħadimlu x-​xogħol kollu li kellu.”—1 Slaten 7:​13, 14.

Xi privileġġ kellu Ħiram li juża l-​abbiltajiet tiegħu biex javanza l-​qima taʼ Ġeħova! L-​esperjenza taʼ Ħiram turi kemm hu minnu l-​kliem Bibliku fi Proverbji 22:29: “Qatt rajt wieħed imħarreġ fis-​sengħa tiegħu? Dan mas-​slaten issibu, u mhux maʼ nies bla isem taʼ xejn.”

Illum, anki ż-​żgħażagħ li jkunu jifhmu ftit fil-​bini jew anki dawk li ma jifhmux kellhom il-​privileġġ li jieħdu sehem fil-​bini tas-​Swali tas-​Saltna. Minħabba li jkunu involuti fi proġetti bħal dawn, xi wħud tgħallmu snajjaʼ utli bħal kif jgħaddu l-​elettriku, il-​kanen taʼ l-​ilma, jibnu, u jaħdmu l-​injam. Forsi tistaʼ tiddiskuti maʼ l-​anzjani lokali tiegħek dwar il-​possibbiltà li int stess tieħu sehem fil-​bini taʼ xi Sala tas-​Saltna.

James, li ħadem fuq diversi Swali tas-​Saltna, jgħid: “Ħafna fil-​kongregazzjonijiet forsi m’għandhomx il-​ħin jew l-​abbiltajiet biex jgħinu. Allura billi tagħti daqqa t’id, tkun qed tgħin lil kongregazzjoni sħiħa.” Nathan, li tgħallem kif jaħdem bil-​konkos, sab li din is-​sengħa fetħitlu opportunità oħra fis-​servizz lil Alla. Hu jiftakar: “Irnexxieli mmur iż-​Żimbabwe u nuża l-​abbiltajiet tiegħi biex ngħin fil-​bini taʼ wieħed mill-​uffiċċji tal-​fergħa tax-​Xhieda taʼ Ġeħova. Ħdimt hemm għal tliet xhur, u kienet waħda mill-​aqwa esperjenzi taʼ ħajti.” Fil-​każ taʼ żgħażagħ oħra, meta dawn daqu x-​xogħol iebes tqanqlu japplikaw biex jaqdu bħala volontieri fl-​uffiċċju tal-​fergħa lokali tax-​Xhieda taʼ Ġeħova.

Jekk titħarreġ f’xogħol fiżiku, sa ċertu punt tkun tistaʼ wkoll tmantni lilek innifsek, u b’hekk ‘tkun kuntent b’dak li għandek.’ (1 Timotju 6:6) Ħafna żgħażagħ fost ix-​Xhieda taʼ Ġeħova jaqdu bħala pijunieri, jew evanġelizzaturi full-time. Minħabba li tgħallmu xi sengħa, xi wħud irnexxielhom imantnu lilhom infushom finanzjarjament mingħajr ma kellhom jinvestu ħafna ħin u flus fl-​edukazzjoni sekulari.

Kif Titgħallem

Jidher ċar li sew jekk tixtieq taqlaʼ l-​għajxien tiegħek minn xi sengħa u sew jekk sempliċement trid tkun taf tagħmel xi biċċa xogħol fid-​dar, tistaʼ tibbenefika jekk titgħallem tagħmel xogħol manwali. Forsi l-​iskola tiegħek toffri xi korsijiet għal xi snajjaʼ. X’aktarx li tistaʼ tieħu wkoll xi taħriġ fid-​dar stess. Kif? Billi titgħallem tagħmel ix-​xogħol tad-​dar. Dr. Provenzano, li kkwotajnieh qabel, jikteb li x-​xogħol tad-​dar hu importanti b’mod speċjali għall-​adoloxxenti għax jgħallimhom l-​abbiltajiet bażiċi fid-​dar biex meta jasal il-​waqt, ikunu kapaċi jgħixu mingħajr il-​ġenituri tagħhom faċilment. Għalhekk, kun dejjem lest li tagħmel dak li jkun hemm bżonn fid-​dar. Hemm xi ħaxix ħażin li jrid jinqalaʼ jew xi xkaffa li għandha bżonn it-​tiswija?

Ix-xogħol fiżiku mhux talli m’huwiex taʼ mistħija jew ibaxxik, talli jistaʼ jkun taʼ ġid għalik b’ħafna modi. Taħrabx mix-​xogħol manwali! Minflok, stinka biex ‘idduq il-​frott’ tax-​xogħol iebes tiegħek, għax kif jgħid Koħèlet 3:​13, “dan ukoll hu don taʼ Alla.”

[Kumment f’paġna 21]

Minħabba li tgħallmu xi sengħa ħafna żgħażagħ irnexxielhom iżidu fis-​servizz tagħhom lil Alla

[Stampa f’paġna 22]

Spiss il-​ġenituri tiegħek jistgħu jgħallmuk tagħmel affarijiet bażiċi