Bijokimiku Jispjega t-​Twemmin Tiegħu

Kif involvejt ruħek fir-​riċerka xjentifika?

Meta dħalt l-​università, għażilt li nistudja l-​kimika. Kienu partikularment jaffaxxinawni l-​proteini u l-​aċidi nuklejċi, li huma bil-​wisq l-​iktar molekuli kumplessi fuq il-​pjaneta tagħna. Maż-​żmien, interessajt ruħi bil-​kbir dwar kif ċerti molekuli jirrispondu għad-​dawl tax-​xemx.

Kont temmen f’Alla?

Iva, meta kont għadni żgħir. Imma iktar tard, waqt li kont qed nistudja fl-​Università Kattolika taʼ Leuven, ġejt mgħallem li l-​affarijiet ħajjin ġew minn proċessi naturali. Il-​professuri għamlu wħud minn dawn il-​proċessi jidhru kkomplikati mhux ħażin. Huma kienu xjentisti tal-​esperjenza, u għalhekk emmint dak li qalu. Eventwalment, sibtha diffiċli naċċetta l-​eżistenza t’Alla.

X’ġiegħlek terġaʼ tikkunsidra l-​oriġini tal-​ħajja?

Fl-​1999, iltqajt maʼ ħabib li kien l-​iskola miegħi u li kien sar wieħed mix-​Xhieda taʼ Ġeħova, u attendejt waħda mil-​laqgħat tagħhom. Ukoll, dik il-​ħabta, ġie għandna wieħed mix-​Xhieda taʼ Ġeħova u ħalla kopja tal-​ktieb Is There a Creator Who Cares About You?a

X’deherlek minnu l-​ktieb?

Bqajt impressjonat bil-​kwalità tar-​riċerka li kien fih. Bdejt naħseb jekk l-​evoluzzjoni kinitx tispjega verament kif inhuma magħmulin l-​affarijiet li jidhru fin-​natura.

X’impressjonak l-​iktar fin-​natura?

Bħala bijokimiku, xogħli kien jinvolvi li nistudja kif inhuma magħmulin ċerti molekuli li jinsabu fiċ-​ċjanobatterji, mikroorganiżmi li jgħixu fl-​oċeani u li ma jiddependux minn affarijiet ħajjin oħra għall-​ikel. Xi riċerkaturi jaħsbu li dawn l-​organiżmi kienu l-​ewwel affarijiet ħajjin fil-​pjaneta tagħna. Billi jużaw l-​enerġija mid-​dawl tax-​xemx, dawn il-​mikrobi jużaw proċess kimiku kkomplikat immens—li għadu ma ġiex mifhum għalkollox—biex jikkonvertu l-​ilma u d-​dijossidu karboniku f’ikel. Bqajt mistagħġeb ukoll bl-​effiċjenza inkredibbli li biha ċ-​ċjanobatterji jistgħu jassorbu d-​dawl.

Anki l-​weraq jużaw id-​dawl tax-​xemx biex jagħmlu l-​ikel. Allura, x’hemm notevoli dwar il-​batterji li semmejt?

Iktar ma tinżel fil-​fond tal-​baħar, inqas issib dawl. Allura ċ-​ċjanobatterji li jgħixu hemm iridu jużaw kull nitfa taʼ enerġija taʼ dawl li jsibu, u dan jagħmluh permezz taʼ antenni sofistikati ferm. L-​enerġija li jiġbru tiġi trasmessa lejn fejn jiġi prodott l-​ikel bi kważi effiċjenza assoluta. Il-​mod kif inhu magħmul dan il-​makkinarju li jassorbi d-​dawl ġibed ukoll l-​attenzjoni tal-​manifatturi tal-​pannelli solari. Bla dubju, l-​effiċjenza taċ-​ċelluli solari magħmulin mill-​bniedem m’għandhom xejn x’jaqsmu maʼ dik tas-​sistemi li jinsabu fil-​batterji.

Dan wasslek għal liema konklużjoni?

Ħsibt dwar l-​inġiniera li jipprovaw jimitaw il-​mekkaniżmi meraviljużi li jinsabu fi ħlejjaq ħajjin, u wasalt għall-​konklużjoni li l-​ħajja bilfors li kienet iddisinjata minn Alla. Imma l-​fidi tiegħi ma kinitx ibbażata biss fuq dak li tgħallimt fix-​xjenza. Kienet ibbażata wkoll fuq studju bir-​reqqa tal-​Bibbja.

Xi kkonvinċiek li l-​Bibbja hi minn Alla?

Waħda mill-​ħafna affarijiet li kkonvinċewni kienet it-​twettiq iddettaljat taʼ profeziji Bibliċi. Pereżempju, Isaija ddeskriva fid-​dettall il-​mewt u d-​dfin taʼ Ġesù minn sekli qabel. Nafu li din il-​profezija nkitbet qabel il-​mewt taʼ Ġesù għax ir-​Romblu taʼ Isaija, li nstab f’Qumran, ġie kkopjat xi mitt sena qabel ma twieled Ġesù.

Dik il-​profezija tgħid: “Il-​post għad-​dfin tiegħu jkun mal-​ħżiena, u f’mewtu jkun mal-​klassi taʼ l-​għonja.” (Isaija 53:9, 12) Taʼ min jinnota li Ġesù ġie maqtul mal-​kriminali imma ġie midfun f’qabar taʼ familja tat-​tajjeb. Dan hu biss eżempju wieħed mill-​profeziji mwettqin li kkonvinċewni li l-​Bibbja hi ispirata minn Alla. (2 Timotju 3:16) Maż-​żmien, sirt wieħed mix-​Xhieda taʼ Ġeħova.

Għala int ferħan li int Xhud taʼ Ġeħova?

Il-​fidi tagħna mhijiex fidi għamja li tinjora l-​fatti tax-​xjenza. Barra minn hekk, il-​prinċipji li jiggwidawna huma bbażati fis-​sod fuq il-​Bibbja. Bħala Xhud taʼ Ġeħova nieħu gost naqsam m’oħrajn il-​messaġġ taʼ faraġ mill-​Bibbja u ngħinhom isibu t-​tweġibiet għall-​mistoqsijiet tagħhom.