F’DINJA TAL-BIŻAʼ

1 | Ipproteġi lil Saħħtek

GĦALA HU IMPORTANTI?

Il-kriżi jew id-diżastri jistgħu jeffettwaw is-saħħa tagħna b’modi differenti.

Meta jiġru affarijiet koroh, in-nies iħossuhom stressati. Imma meta n-nies jibqgħu stressati, ħafna drabi jispiċċaw jimirdu.
F’sitwazzjonijiet bħal diżastri u pandemiji, jistaʼ jkun diffiċli għall-isptarijiet biex ilaħħqu u biex ikun hemm biżżejjed mediċina.
F’dawn iż-żminijiet, in-nies jistaʼ ma jkollhomx biżżejjed flus biex jixtru li jkollhom bżonn, bħall-ikel u l-mediċina.

X’Għandek Tkun Taf?

Il-mard serju u l-istress iġegħluk tagħmel deċiżjonijiet ħżiena. Minħabba f’hekk, jaf tieqaf tagħmel affarijiet tajbin għal saħħtek u timrad iżjed.
Jekk ma tiħux ħsieb il-problemi taʼ saħħa, jistgħu tant jiggravaw li jwasslu għall-mewt.
Iktar ma tkun b’saħħtek iktar se tkun tistaʼ tieħu deċiżjonijiet tajbin fi żminijiet diffiċli.
Ma jagħmilx differenza kemm għandek flus, int tistaʼ tipproteġi lil saħħtek.

X’Tistaʼ Tagħmel minn Issa?

Meta jkun possibbli, xi ħadd bil-għaqal jara l-periklu minn qabel u jara x’jistaʼ jagħmel biex jevitah. Dan jgħodd ukoll għas-saħħa tagħna. Ħafna drabi jekk iżżomm lilek innifsek u d-dar nodfa se tnaqqas ir-riskju tal-mard. Li toqgħod attent minn qabel dejjem aħjar.

“Jien u l-mara nonfqu inqas flus fil-mediċina u t-tobba, għax nagħmlu ċert li nkunu nodfa u nżommu d-dar nadifa.”—Andreas.a

a Xi ismijiet f’din ir-rivista ġew mibdulin.

X’SE JGĦINEK TKAMPA?—Pariri Tajbin

Biex tipproteġi lil saħħtek, imxi ma’ dawn il-pariri fi żminijiet diffiċli

ŻOMM LILEK INNIFSEK U D-DAR NODFA

Żomm lilek innifsek u d-dar nodfa

Il-Bibbja tgħid: “Min hu prudenti jara l-gwaj u jinħeba.” (Proverbji 22:3) Ipprova aħseb bil-quddiem u evita affarijiet li jistgħu jkunu taʼ ħsara għal saħħtek.

Aħsel idejk taʼ spiss bis-sapun u l-ilma, speċjalment qabel tmiss l-ikel u wara li tuża t-tojlit.
B’mod regulari, naddaf u ddiżinfetta d-dar tiegħek, speċjalment postijiet u affarijiet li tmiss taʼ spiss.
Ipprova kemm tistaʼ biex ma toqgħodx viċin nies li għandhom mard li jittieħed.

KUL HEALTHY

Kul healthy

Il-Bibbja tgħid: “Ebda bniedem qatt ma bagħad lil ġismu stess; imma jitimgħu u jgħożżu.” (Efesin 5:29) Aħna nuru li nħobbu lil ġisimna billi noqogħdu attenti x’nieħdu.

Ixrob ħafna ilma.
Kul frott u ħaxix differenti.
Tikolx ħafna xaħam, melħ, u zokkor.
Tpejjipx, tixrobx ħafna alkoħol, u tiħux drogi.

“Biex ma nimirdux, aħna nipprovaw nieklu healthy. Jekk ma nagħmlux hekk, nispiċċaw nonfqu l-flus li naqilgħu fuq tobba u mediċini. Nippreferu nużaw il-flus biex nixtru ikel healthy.”—Carlos.

AGĦMEL L-EXERCISE U STRIEĦ BIŻŻEJJED

Agħmel l-exercise

Il-Bibbja tgħid: “Aħjar id mimlija bil-mistrieħ milli tnejn mimlijin bix-xogħol iebes u l-ġiri wara r-riħ.” (Ekkleżjasti 4:6) Għalkemm hemm bżonn naħdmu, irridu nistrieħu wkoll.

Ibqaʼ attiv. Tistaʼ tibda billi tmur timxi taʼ spiss. Li tibqaʼ attiv ħa jgħin is-saħħa tiegħek jekk inti avvanzat fl-età, għandek xi diżabbiltà, jew għandek xi mard li jkollok tgħix bih.
Strieħ biżżejjed

Agħmel ċert li tistrieħ biżżejjed. Meta ma torqodx biżżejjed, se jiżdiedlek l-istress u ssibha diffiċli biex tikkonċentra. Maż-żmien, dan se jwassal għal problemi serji taʼ saħħa.
Agħżel xħin ħa tmur torqod u mbagħad żomm miegħu. Kuljum ipprova mur orqod u qum fl-istess ħin.
Evita li tara t-televixin jew tuża l-mowbajl jew it-tablet fis-sodda.
Evita ikla kbira, kafeina, u alkoħol qabel torqod.

“Insib li l-irqad jeffettwali saħħti. Jekk ma norqodx biżżejjed, ġieli juġgħuni rasi u ġismi. Meta norqod biżżejjed, inħossni tajjeb u lest li nagħmel kollox! Ikolli ħafna enerġija u ma tantx nimrad.”—Justin.