X’SE JIĠRI MID-DINJA?
IL-FORESTI
XI XJENTISTI jqabblu l-foresti mal-pulmun li permezz tiegħu nistgħu nibqgħu ħajjin. Għala? Bħall-pulmun, is-siġar inaddfu l-arja. Huma jassorbu d-dijossidu karboniku li jagħmlilna l-ħsara. Barra minn hekk, jarmu l-ossiġnu li hu importanti ħafna għalina biex nieħdu n-nifs. Madwar 80 fil-mija tal-pjanti u l-annimali fuq l-art jgħixu fil-foresti. Mingħajr foresti aħna ma nistgħux ngħixu.
X’Qed Jiġrilhom il-Foresti?
Kull sena, biljuni taʼ siġar qed jinqatgħu biex l-art tintuża għar-rabaʼ ħalli jitkabbar il-frott u l-ħaxix. F’dawn l-aħħar 75 sena, nofs il-foresti tropikali ġew meqrudin.
Meta tinqered foresta, il-pjanti u l-annimali li jkunu jgħixu fiha jinqerdu wkoll.
Id-Dinja—Iddisinjata b’Mod li Ma Tinqeridx
Anki f’postijiet fejn il-biċċa l-kbira tas-siġar inqatgħu, il-foresti jistgħu jerġgħu jikbru. Dan l-aħħar, l-ekoloġisti nnotaw li postijiet fejn qabel kien hemm is-siġar jistgħu jerġgħu jsiru foresti fi żmien qasir. Aħseb dwar dawn l-eżempji:
Riċerkaturi qed jinnotaw x’jiġri f’postijiet fejn qabel kien hemm foresti li nqatgħu għar-rabaʼ, imma li mbagħad ma baqgħux jintużaw. Minn studju fuq 2,200 biċċa art fl-Amerika taʼ Fuq, fl-Amerika t’Isfel, u fl-Afrika tal-Punent sabu li l-foresti jistgħu jerġgħu jibdew jikbru f’inqas minn għaxar snin.
Skont studju li ħareġ fir-rivista Science, ir-riċerkaturi jikkalkulaw li f’madwar 100 sena, il-foresti jistgħu jerġgħu jsiru bħalma kienu qabel inqatgħu s-siġar.
Dan l-aħħar, xjentisti fil-Brażil għamlu studju biex jaraw jekk il-foresti jikbrux iktar malajr meta n-nies iħawlu s-siġar.
In-National Geographic qal hekk dwar dawn ir-riċerkaturi: “Huma kienu ferħanin meta sabu li ma kienx hemm għalfejn jitħawlu s-siġar.” F’ħames snin biss, l-artijiet li ttestjaw “kienu mimlijin bis-siġar tal-pajjiż” mingħajr ma tħawlet ebda siġra.
X’Qed Isir Biex Tissolva l-Problema
Mad-dinja kollha, xi nies qed jaħdmu biex jipproteġu l-foresti li baqaʼ u jerġgħu jagħtu l-ħajja lil dawk li ġew meqruda. B’hekk, skont il-Ġnus Magħquda, f’dawn l-aħħar 25 sena, madwar id-dinja kollha nqatgħu biss in-nofs taʼ kemm kienu qed jinqatgħu siġar qabel.
Imma dawn l-isforzi mhux biżżejjed biex insalvaw il-foresti li baqaʼ. L-organizzazzjoni Global Forest Watch ħarġet rapport fejn qalet: “L-ammont taʼ foresti tropikali li qed jiġu meqruda ma nbidilx ħafna f’dawn l-aħħar snin.”
Kumpaniji li jaqtgħu s-siġar għall-injam b’mod illegali qed jaqilgħu biljuni taʼ dollari. L-egoiżmu taʼ dawn in-nies hu r-raġuni għala ħafna foresti tropikali qed jinqerdu.
Grupp taʼ nies li jipproteġu l-foresti jaqtgħu xi siġar li jkunu kibru ħafna u jħawlu oħrajn minflokhom.
Raġunijiet li Jagħtuna Tama—Dak li Tgħid il-Bibbja
“Ġeħovaa nibbet mill-art kull siġra li tpaxxi l-għajn u tajba għall-ikel.” —Ġenesi 2:9.
Dak li ħalaq il-foresti kollha ddisinjahom b’mod li aħna nkunu nistgħu nkomplu nibbenefikaw minnhom. Hu jrid jipproteġi u jsaħħaħ il-foresti tagħna flimkien mal-pjanti u l-annimali li jgħixu fihom.
Il-Bibbja turina li Alla mhux se jħalli nies egoisti jkomplu jeqirdu l-art u l-affarijiet li fiha. Ara l-artiklu “Alla Jwiegħed li d-Dinja Mhux Se Tinqered” f’paġna 15.
a Ġeħova hu l-isem t’Alla.—Salm 83:18.