Kapitlu 12
Il-Magħmudija taʼ Ġesù
MADWAR sitt xhur wara li Ġwanni jibda jippriedka, Ġesù, li issa għandu 30 sena, jiġi s’għandu fil-Ġordan. Għal liema raġuni? Ġie jagħmel żjara soċjali? Huwa Ġesù sempliċement interessat f’li jara kif inhu sejjer ix-xogħol taʼ Ġwanni? Le, Ġesù jitlob lil Ġwanni biex igħammdu.
Minnufih Ġwanni joġġezzjona: “Jien hu dak li jeħtieġli li nkun imgħammed minnek, u ġej int għandi?” Ġwanni jaf li kuġinuh Ġesù hu l-Iben speċjali t’Alla. Fil-fatt, Ġwanni kien qabeż bil-ferħ f’ġuf ommu meta Marija, tqila b’Ġesù, żarithom! Żgur li iktar tard omm Ġwanni, Eliżabetta, qaltlu dwar dan. U żgur li qaltlu wkoll dwar kif l-anġlu kien ħabbar it-twelid taʼ Ġesù u dwar id-dehra tal-anġli lir-ragħajja fil-lejl taʼ meta twieled Ġesù.
Mela Ġesù mhux xi stranġier għal Ġwanni. U Ġwanni jaf li l-magħmudija tiegħu ma kinetx għal Ġesù. Hi għal dawk li jindmu minn dnubiethom, imma Ġesù hu mingħajr dnub. Iżda, minkejja l-oġġezzjoni taʼ Ġwanni, Ġesù jinsisti: “Ħalli jkun, din id-darba, għax b’dak il-mod hu xieraq għalina li nwettqu dak kollu li hu twajjeb.”
Għala hu sewwa li Ġesù jitgħammed? Għaliex il-magħmudija taʼ Ġesù hija simbolu, mhux tal-indiema mid-dnubiet, imma taʼ li hu qiegħed jippreżenta ruħu biex jagħmel ir-rieda taʼ Missieru. Ġesù kien mastrudaxxa, imma issa wasal iż-żmien għalih biex jibda l-ministeru li Alla Jehovah kien bagħtu lejn l-art biex iwettaq. Taħseb li Ġwanni jistenna li tiġri xi ħaġa mhix tas-soltu malli hu jgħammed lil Ġesù?
Sewwa, Ġwanni iktar tard jirrapporta: “Dak stess li bagħatni biex ingħammed fl-ilma qalli, ‘Hu min hu li fuqu tara l-ispirtu nieżel u jibqaʼ, dan hu dak li jgħammed bl-ispirtu qaddis.’” Mela Ġwanni qed jistenna li l-ispirtu t’Alla jinżel fuq xi ħadd imgħammed minnu. Forsi, għalhekk, ma tantx jinħasad meta, hekk kif Ġesù jitlaʼ mill-ilma, Ġwanni jara “bħal ħamiema l-ispirtu t’Alla ġej fuqu.”
Imma jiġri iktar minn hekk waqt li Ġesù jitgħammed. ‘Is-smewwiet jinfetħu’ għalih. Dan x’ifisser? Milli jidher dan ifisser li waqt li qiegħed jitgħammed, il-memorja mill-ħajja tiegħu fis-sema qabel sar bniedem terġaʼ lura għandu. B’hekk, Ġesù issa jiftakar għalkollox il-ħajja tiegħu bħala iben spirtu taʼ Alla Jehovah, inklużi l-affarijiet kollha li qallu Alla fis-sema matul l-eżistenza tiegħu qabel sar bniedem.
Biex iżid maʼ dan, fil-ħin tal-magħmudija tiegħu, leħen mis-sema jipproklama: “Dan hu ibni, il-maħbub, li lilu jien approvajt.” Dak hu leħen min? Leħen Ġesù? Dażgur li le! Hu leħen Alla. Jidher ċar li Ġesù hu l-Iben t’Alla, mhux Alla nnifsu, kif isostnu xi wħud.
Madankollu, Ġesù huwa iben uman t’Alla, saħansitra bħalma kien l-ewwel bniedem, Adam. Id-dixxiplu Luqa, wara li jiddeskrivi l-magħmudija taʼ Ġesù, jikteb: “Ġesù nnifsu, meta beda x-xogħol tiegħu, kellu madwar tletin sena, billi kien l-iben, bħalma kienet l-opinjoni, taʼ Ġużeppi, bin Għeli, . . . bin David, . . . bin Abraham, . . . bin Noè, . . . bin Adam, bin Alla.”
Bħalma Adam kien “bin Alla” uman, hekk hu Ġesù. Ġesù huwa l-aqwa bniedem li qatt għex, u dan jidher ċar meta neżaminaw il-ħajja taʼ Ġesù. Madankollu, mal-magħmudija tiegħu, Ġesù jidħol f’relazzjoni ġdida maʼ Alla, billi jsir ukoll iben spiritwali t’Alla. Alla issa jsejjaħlu lura lejn is-sema, bħal li kieku, billi jibdieh fuq korsa li se twasslu biex jagħti l-ħajja umana tiegħu għal dejjem f’sagrifiċċju għall-bnedmin ikkundannati. Mattew 3:13-17; Luqa 3:21-38; 1:34-36, 44; 2:10-14; Ġwann 1:32-34; Ebrej 10:5-9.
▪ Ġesù għala mhux xi stranġier għal Ġwanni?
▪ Ladarba qatt ma għamel dnubiet, Ġesù għala jitgħammed?
▪ Meta nqisu dak li Ġwanni jaf dwar Ġesù, għala forsi ma jinħasadx meta l-ispirtu t’Alla jinżel fuq Ġesù?