Kapitlu 23

Iktar Mirakli f’Kapernahum

F’JUM is-​Sibt wara li Ġesù sejjaħ lill-​ewwel erbaʼ dixxipli tiegħu​—Pietru, Indrì, Ġakbu, u Ġwanni​—ilkoll kemm huma jmorru sas-​sinagoga lokali f’Kapernahum. Hemmhekk Ġesù jibda jgħallem, u n-​nies jinsabu mgħaġġbin għaliex hu jgħallimhom bħal wieħed li għandu awtorità u mhux bħall-​iskribi.

F’dan il-​jum tas-​Sibt hemm preżenti raġel imxajtan. Wara xi ftit, dan igħajjat b’leħen għoli: “X’għandna x’naqsmu miegħek, Ġesù n-​Nazzarenu? Ġejt biex teqridna? Jien naf eżatt min inti, il-​Wieħed Qaddis t’Alla.”

Id-demonju li qed jikkontrolla lil dan ir-​raġel huwa fil-​fatt wieħed mill-​anġli taʼ Satana. Fil-​waqt li jċanfar lid-​demonju, Ġesù jgħid: “Iskot, u oħroġ minn ġo fih!”

Sewwa, id-​demonju jixħet lir-​raġel f’dagħdiegħa u jibda jwerżaq kemm jiflaħ. Imma joħroġ mir-​raġel mingħajr ma jweġġgħu. Kulħadd jibqaʼ ċċassat! “Dan x’inhu?” kulħadd jistaqsi. “Hu b’awtorità jordna saħansitra lill-​ispirti mhux nodfa, u huma jobduh.” L-​aħbar dwar dan tinxtered maʼ dawk l-​inħawi kollha.

Wara li jitilqu mis-​sinagoga, Ġesù u d-​dixxipli tiegħu jmorru d-​dar taʼ Xmun, jew Pietru. Hemmhekk il-​kunjata taʼ Pietru tinsab marida ferm b’deni qawwi. ‘Jekk jogħġbok għinha,’ jitolbuh. Mela Ġesù jmur ħdejha, jaqbdilha idha, u jqajjimha. Minnufih hi tfiq u tibda tħejji ikla għalihom!

Iktar tard, wara nżul ix-​xemx, nies minn kullimkien jibdew ġejjin lejn id-​dar taʼ Pietru bil-​morda tagħhom. Malajr il-​belt kollha tinġabar wara l-​bieb! U Ġesù jfejjaq lill-​morda kollha, hi x’inhi l-​marda tagħhom. Hu saħansitra jeħles lil dawk maħkuma minn demonju. Hekk kif ikunu ħerġin, id-​demonji li jkeċċi jgħajtu: “Inti l-​Iben t’Alla.” Imma Ġesù jċanfarhom u ma jħallihomx jitkellmu għaliex jafu li hu l-​Kristu. Mark 1:​21-34; Luqa 4:​31-41; Mattew 8:​14-17.

▪ X’jiġri fis-​sinagoga f’jum is-​Sibt wara li Ġesù jsejjaħ lill-​erbaʼ dixxipli tiegħu?

▪ Ġesù fejn imur meta jħalli s-​sinagoga, u liema miraklu jwettaq hemm?

▪ X’jiġri iktar tard f’dik l-​istess lejla?