Kapitlu 24

Għala Ġesù Ġie Fuq l-​Art

IL-​JUM li Ġesù qattaʼ f’Kapernahum mal-​erbaʼ dixxipli tiegħu kien wieħed taʼ taħbit, li kkonkluda billi n-​nies taʼ Kapernahum ġabulu l-​morda tagħhom biex ifejjaqhom matul fil-​għaxija. Ma kien hemm ebda ħin għal privazija.

Issa ninsabu kmieni l-​għada fil-​għodu. Waqt li għadu d-​dlam, Ġesù jqum u joħroġ barra waħdu. Hu jivvjaġġa lejn post imwarrab fejn jistaʼ jitlob lil Missieru fil-​privat. Imma l-​privazija taʼ Ġesù għomorha qasir għaliex meta Pietru u l-​oħrajn jintebħu li Ġesù mhux hemm, imorru jfittxuh.

Meta jsibuh, Pietru jgħid: “Kollha qed ifittxuk.” In-​nies taʼ Kapernahum iridu lil Ġesù jibqaʼ magħhom. Huma japprezzaw verament x’għamel hu għalihom! Imma ġie Ġesù fuq l-​art primarjament biex iwettaq fejqan mirakoluż bħal dan? Hu x’igħid dwar dan?

Skond wieħed mir-​rakkonti Bibliċi, Ġesù jwieġeb lid-​dixxipli tiegħu: “Ejjew immorru x’imkien ieħor, fl-​ibliet fil-​qrib, biex inkun nistaʼ nippriedka hemm ukoll, għax huwa għal dan il-​għan li jien ħriġt.” Għalkemm in-​nies iħeġġu lil Ġesù biex jibqaʼ hemm, hu jgħidilhom: “Ukoll lil bliet oħra rrid inxandar l-​aħbar tajba tas-​saltna t’Alla, għaliex għal dan jien kont mibgħut.”

Iva, Ġesù ġie fuq l-​art partikolarment biex jippriedka dwar is-​Saltna t’Alla, li se tivvindika l-​isem taʼ Missieru u ssolvi darba għal dejjem l-​inkwiet kollu tal-​bnedmin. Madankollu, biex jagħti prova li hu mibgħut minn Alla, Ġesù jwettaq fejqan mirakoluż. Bl-​istess mod Mosè, sekli qabel, kien wettaq xi mirakli biex jistabbilixxi l-​kredenzjali tiegħu bħala l-​qaddej t’Alla.

Issa, meta Ġesù jitlaq minn Kapernahum biex jippriedka fi bliet oħra, l-​erbaʼ dixxipli tiegħu jmorru miegħu. Dawn l-​erbgħa huma Pietru u ħuh Indri̇̀, u Ġwanni u ħuh Ġakbu. Int tiftakar li kien biss ġimgħa ilu li dawn ġew mistednin biex ikunu l-​ewwel ħaddiema li jivvjaġġaw flimkien maʼ Ġesù.

Il-mawra taʼ ppridkar taʼ Ġesù fil-​Galilija mal-​erbaʼ dixxipli tiegħu hija suċċess tal-​għaġeb! Fil-​fatt, ir-​rapport dwar l-​attività tiegħu jinfirex saħansitra ġewwa s-​Sirja kollha. Folol kbar mill-​Galilija, mill-​Ġudea, u min-​naħa l-​oħra tax-​Xmara Ġordan isegwu lil Ġesù u lid-​dixxipli tiegħu. Mark 1:​35-39; Luqa 4:​42, 43; Mattew 4:​23-25; Eżodu 4:​1-9, 30, 31.

▪ X’jiġri l-​għada fil-​għodu wara l-​jum ħabrieki taʼ Ġesù f’Kapernahum?

▪ Ġesù għala ntbagħat lejn l-​art, u liema għan jaqdu l-​mirakli tiegħu?

▪ Min mar maʼ Ġesù fuq il-​mawra tiegħu taʼ ppridkar fil-​Galilija, u x’inhi r-​reazzjoni għall-​attivitajiet taʼ Ġesù?