Kapitlu 37

Ġesù Jneħħi l-​Għali taʼ Armla

FTIT wara li jfejjaq lill-​qaddej tal-​uffiċjal tal-​armata, Ġesù jerħilha lejn Najin, belt li qiegħda iktar minn 20 mil lejn il-​Lbiċ taʼ Kapernahum. Id-​dixxipli tiegħu u folla kbira jakkumpanjawh. X’aktarx li hu tard wara nofs in-​nhar meta joqorbu lejn Najin. Hawn jiltaqgħu maʼ funeral għaddej. Il-​ġisem mejjet taʼ wieħed żagħżugħ qed jinġarr ’il barra mill-​belt għad-​difna.

Is-sitwazzjoni tal-​omm hija traġika b’mod speċjali, ladarba hi armla u dan hu l-​uniku iben tagħha. Meta miet żewġha, hi setgħet issib faraġ fil-​fatt li kellha lil binha. It-​tamiet, ix-​xewqat u l-​ambizzjonijiet tagħha ntrabtu flimkien mal-​futur tiegħu. Imma issa m’hemm ħadd f’min tikkonsla. Il-​għali tagħha hu kbir hekk kif in-​nies tal-​belt jakkumpanjawha lejn il-​post tad-​difna.

Meta Ġesù jilmaħ lill-​mara, qalbu tintmiss min-​niket kbir tagħha. Mela b’tenerezza, u madankollu b’sodizza li tagħti l-​fiduċja, hu jgħidilha: “Ieqaf mill-​biki.” Il-​manjiera u l-​azzjoni tiegħu jiġbdu l-​attenzjoni tal-​folla. Mela meta jersaq u jmiss il-​katalett li fuqu qed jinġarr il-​ġisem, ir-​reffiegħa jieqfu. Żgur li kollha qed jistennew ħa jaraw x’se jagħmel.

Huwa minnu li dawk li qed jakkumpanjaw lil Ġesù rawh ifejjaq b’mod mirakoluż lil ħafna nies mill-​mard. Imma mid-​dehra qatt ma rawh iqajjem lil xi ħadd mill-​mewt. Jistaʼ jagħmilha ħaġa bħal din? Waqt li jindirizza lill-​ġisem, Ġesù jikkmanda: “Żagħżugħ, jien ingħidlek, Qum!” U r-​raġel iqum bil-​qiegħda! Hu jibda jitkellem, u Ġesù jagħtih lil ommu.

Meta n-​nies jaraw li ż-​żagħżugħ verament hu ħaj, jibdew igħidu: “Profeta kbir ġie mqajjem fostna.” Oħrajn igħidu: “Alla dawwar l-​attenzjoni tiegħu lejn il-​poplu tiegħu.” Malajr l-​aħbar rigward dan l-​egħmil tal-​għaġeb tinxtered mal-​Ġudea kollha u mal-​pajjiż kollu taʼ mad-​dawra.

Ġwanni l-​Għammied għadu fil-​ħabs, u jrid ikun jaf iktar dwar xogħlijiet li Ġesù kapaċi jwettaq. Id-​dixxipli taʼ Ġwanni jgħidulu dwar dawn il-​mirakli. X’inhi r-​reazzjoni tiegħu? Luqa 7:​11-18.

▪ X’qed jiġri hekk kif Ġesù joqrob lejn Najin?

▪ Ġesù kif inhu effettwat b’dak li jara, u x’jagħmel?

▪ In-​nies kif iwieġbu għall-​miraklu taʼ Ġesù?