Kapitlu 53
Ħakkiem Superuman li Nixtiquh
META Ġesù jitmaʼ lill-eluf b’mod mirakoluż, in-nies jibqgħu mgħaġġbin. “Dan ċertament li hu l-profeta li kellu jiġi fid-dinja,” jgħidu huma. Huma jikkonkludu mhux biss li Ġesù bil-fors li hu dak il-profeta akbar minn Mosè imma wkoll li hu kieku jkun ħakkiem taʼ min jixtiequ ferm. Mela huma jippjanaw biex jaħtfuh u jagħmluh sultan.
Ġesù, madankollu, jaf x’inhuma jippjanaw in-nies. Mela hu jitlaq malajr biex jevita li jiġi magħżul minnhom bil-forza. Hu jibgħat lill-folol u jġiegħel lid-dixxipli tiegħu jitilgħu fid-dgħajsa tagħhom u jmorru lura lejn Kapernahum. Hu mbagħad jirtira fuq il-muntanja biex jitlob. Dak il-lejl Ġesù qiegħed hemm waħdu għalkollox.
Ftit qabel ma jisbaħ Ġesù jittawwal mill-post fil-għoli u vantaġġuż tiegħu u josserva l-mewġ imbuttat fuq il-baħar minn riħ qawwi. Fid-dawl taʼ kważi qamar kwinta, peress li qegħdin viċin il-festa tal-Qbiż, Ġesù jara d-dgħajsa bid-dixxipli tiegħu jitqabdu biex ifendu kontra l-mewġ. L-irġiel qed jaqdfu bil-qawwa kollha tagħhom.
Meta jara dan, Ġesù jinżel minn fuq il-muntanja u jibda jimxi lejn id-dgħajsa billi jgħaddi minn fuq il-mewġ. Id-dgħajsa tkun ħarġet ’il barra madwar tliet mili jew erbgħa meta Ġesù jasal ħdejha. Madankollu, hu jibqaʼ sejjer bħal li kieku se jibqaʼ għaddej. Meta d-dixxipli jarawh, huma jgħajtu: “Din xi dehra!”
Ġesù jwieġeb b’mod taʼ faraġ: “Huwa jien; tibżgħux.”
Imma Pietru jgħid: “Mulej, jekk inhu int, ikkmandani biex niġi għandek fuq l-ilmijiet.”
“Ejja!” jwieġeb Ġesù.
Minnufih, Pietru jinżel minn fuq id-dgħajsa u jimxi fuq l-ilmijiet lejn Ġesù. Imma meta jħares lejn it-tempesta, Pietru jsir beżgħan, u waqt li jibda jegħreq, hu jgħajjat: “Mulej salvani!”
Billi jmidd idu minnufih, Ġesù jaqbdu u jgħid: “Int taʼ fidi żgħira, għala bdejt tiddubita?”
Wara li Pietru u Ġesù jitilgħu lura fid-dgħajsa, ir-riħ jieqaf, u d-dixxipli jibqgħu mbellhin. Imma għandhom jibqgħu mbellhin? Jekk kienu fehmu “it-tifsira tal-ħobżiet” billi apprezzaw il-miraklu kbir li Ġesù wettaq ftit sigħat qabel meta tamaʼ eluf b’ħames ħobżiet u żewġ ħutiet żgħar biss, allura ma kellhomx għalfejn jibqgħu daqshekk imbellhin li hu setaʼ jimxi fuq l-ilma u jġiegħel lir-riħ ibatti. Issa, madankollu, id-dixxipli jagħmlu sinjal taʼ qima lejn Ġesù u jgħidu: “Int tabilħaqq l-Iben t’Alla.”
Fi żmien qasir, huma jaslu Ġenneżaret, pjanura sabiħa mimlija frott li tinsab ħdejn Kapernahum. Hemmhekk huma jankraw id-dgħajsa. Imma meta jinżlu l-art, xi nies jagħrfu lil Ġesù u jmorru ġewwa l-kampanja taʼ madwar dawk l-inħawi, isibu lil dawk li huma morda. Meta dawn jinġiebu fuq is-sodod tagħhom u sempliċement imissu t-tarf tal-libsa taʼ fuq taʼ Ġesù, huma jiġu mfejqin għalkollox.
Sadanittant, il-folla li raw b’għajnejhom it-tmigħ mirakoluż tal-eluf jiskopru li Ġesù telaq. Mela meta jaslu xi dgħajjes żgħar minn Tiberjas, huma jitilgħu fuq dawn u jbaħħru lejn Kapernahum biex ifittxu lil Ġesù. Meta jsibuh, jistaqsu: “Rabbi, meta ġejt hawnhekk?” Ġesù jċanfarhom kif se naraw dalwaqt. Ġwann 6:14-25; Mattew 14:22-36; Mark 6:45-56.
▪ Wara li Ġesù jitmaʼ b’mod mirakoluż lill-eluf, in-nies x’iridu jagħmlulu?
▪ Ġesù x’jara minn fuq il-muntanja li fuqha rtira, u mbagħad x’jagħmel?
▪ Id-dixxipli għala m’għandhomx għalfejn ikunu daqshekk imbellhin?
▪ X’jiġri wara li huma jinżlu l-art?