Kapitlu 72
Ġesù Jibgħat lis-70
HIJA l-Ħarifa tas-sena 32 E.K., tliet snin sħaħ wara l-magħmudija taʼ Ġesù. Hu u d-dixxipli tiegħu dan l-aħħar attendew għall-Festa tal-Egħrejjex f’Ġerusalemm, u mid-dehra għadhom xi mkien fil-qrib. Fil-fatt, Ġesù jqattaʼ l-biċċa l-kbira mis-sitt xhur li baqaʼ tal-ministeru tiegħu jew fil-Ġudea jew in-naħa l-oħra tax-Xmara Ġordan fid-distrett tal-Perea. Dan it-territorju jrid jinħadem ukoll.
Veru, wara l-Qbiż tas-sena 30 E.K., Ġesù qattaʼ madwar tmien xhur jippriedka fil-Ġudea. Imma wara li l-Lhud ippruvaw joqtluh hemmhekk nhar il-Qbiż tas-sena 31 E.K., hu qattaʼ s-sena u nofs taʼ wara jgħallem kważi esklussivament fil-Galilija. Matul dak iż-żmien, hu żviluppa organizzazzjoni kbira u mħarrġa tajjeb taʼ predikaturi, xi ħaġa li hu ma kellux qabel. Għalhekk hu issa jagħti bidu għal kampanja finali u intensiva taʼ għoti taʼ xiehda fil-Ġudea.
Ġesù jagħti bidu għal din il-kampanja billi jagħżel 70 dixxiplu u jibgħathom tnejn tnejn. B’hekk, hemm b’kollox 35 par taʼ predikaturi tas-Saltna biex jaħdmu t-territorju. Dawn imorru bil-quddiem f’kull belt u post li fih Ġesù, b’mod evidenti akkumpanjat mill-appostli tiegħu, qed jippjana li jmur.
Minflok ma jidderieġi lis-70 lejn is-sinagogi, Ġesù jgħidilhom biex jidħlu fi djar privati, billi jispjega: “Kull fejn tidħlu ġo dar għidu l-ewwel, ‘Jalla din id-dar ikollha l-paċi.’ U jekk ikun hemm ħabib tal-paċi, il-paċi tagħkom se tibqaʼ fuqu.” X’għandu jkun il-messaġġ tagħhom? “Issoktaw għidulhom,” igħid Ġesù, “is-saltna t’Alla qorbot lejkom.” Rigward l-attività tas-70, Matthew Henry’s Commentary jirrapporta: “Bħall-Imgħallem tagħhom, kull fejn żaru, huma ppridkaw minn dar għal dar.”
L-istruzzjonijiet li Ġesù jagħti lis-70 huma bħal dawk li hu ta lit-12 meta bagħat lil dawn fuq kampanja taʼ ppridkar fil-Galilija madwar sena qabel. Hu mhux biss iwissi lis-70 dwar l-oppożizzjoni li se jiffaċċjaw, hu u jippreparahom biex jippreżentaw il-messaġġ lin-nies fid-djar, imma wkoll jagħtihom is-setgħa biex ifejqu lill-morda. B’hekk, meta jasal Ġesù ftit wara, ħafna se jkunu ħerqana biex jiltaqgħu maʼ dak l-Imgħallem li għandu dixxipli li huma kapaċi jagħmlu affarijiet tal-għaġeb bħal dawn.
L-ippridkar mis-70 u x-xogħol taʼ wara minn Ġesù jdumu relattivament żmien qasir. Malajr il-35 par taʼ predikaturi tas-Saltna jibdew ġejjin lura lejn Ġesù. “Mulej,” huma jgħidu bil-ferħ, “saħansitra d-demonji jintgħamlu sudditi għalina bl-użu taʼ ismek.” Rapport taʼ servizz mill-aħjar bħal dan żgur li jqanqal lil Ġesù, għax hu jwieġeb: “Bdejt nilmaħ lil Satana diġà mwaqqaʼ bħal sajjetta mis-sema. Ħares! Tajtkom l-awtorità biex tgħaffġu taħt saqajkom is-serpenti u l-iskorpjuni.”
Ġesù jaf li wara t-twelid tas-Saltna t’Alla fiż-żmien tat-tmiem, Satana u d-demonji tiegħu jridu jiġu mkeċċijin mis-sema. Imma issa din it-tkeċċija taʼ demonji li ma jidhrux minn sempliċi bnedmin isservi bħala assigurazzjoni miżjuda taʼ dik il-ġrajja li ġejja. Għalhekk, Ġesù jitkellem dwar il-waqgħa futura taʼ Satana mis-sema bħala ħaġa assolutament ċerta. B’hekk, huwa f’sens simboliku li s-70 huma mogħtijin l-awtorità li jgħaffġu s-serpenti u l-iskorpjuni. Iżda, Ġesù jgħid: “Tifirħux b’dan, li l-ispirti jintgħamlu sudditi għalikom, imma ifirħu għaliex l-ismijiet tagħkom ġew imnaqqxin fis-smewwiet.”
Ġesù se jtir bil-ferħ u hu jfaħħar pubblikament lil Missieru talli uża lil dawn il-qaddejja umlin minn tiegħu b’mod daqshekk taʼ qawwa. Waqt li jdur lejn id-dixxipli tiegħu, hu jgħid: “Henjin huma l-għajnejn li jilmħu l-affarijiet li qegħdin tilmħu intom. Għax ingħidilkom, Ħafna profeti u slaten xtaqu jaraw l-affarijiet li qegħdin tilmħu intom imma ma rawhomx, u jisimgħu l-affarijiet li qegħdin tisimgħu intom imma ma semgħuhomx.” Luqa 10:1-24; Mattew 10:1-42; Rivelazzjoni 12:7-12.
▪ Ġesù fejn ippriedka matul l-ewwel tliet snin tal-ministeru tiegħu, u liema territorju jkopri hu fl-aħħar sitt xhur tiegħu?
▪ Ġesù fejn jibgħathom lis-70 biex isibu n-nies?
▪ Ġesù għala qal li lemaħ lil Satana diġà mwaqqaʼ mis-sema?
▪ Is-70 f’liema sens jistgħu jgħaffġu s-serpenti u l-iskorpjuni?