Kapitlu 78

Ibqaʼ Dejjem Għal-​Lest

WARA li jwiddeb lill-​folol dwar ir-​regħba, u jwissi lid-​dixxipli tiegħu dwar li jagħtu attenzjoni żejda lejn affarijiet materjali, Ġesù jinkuraġġixxi: “Tibżgħux, merħla ċkejkna, għaliex Missierkom approva li jagħtikom is-​saltna.” Hu b’hekk jirrivela li numru relattivament żgħir biss (iktar tard identifikati bħala 144,000) se jkunu fis-​Saltna tas-​sema. Il-​maġġoranza taʼ dawk li jirċievu ħajja taʼ dejjem se jkunu sudditi fuq l-​art tas-​Saltna.

X’rigal meraviljuż, “is-​saltna”! Billi jiddeskrivi l-​mod xieraq li bih id-​dixxipli għandhom iwieġbu malli jirċevuh, Ġesù jħeġġiġhom: “Bigħu l-​affarijiet li huma tagħkom u agħtu għotjiet taʼ ħniena.” Iva, huma għandhom jużaw l-​assi tagħhom biex jibbenefikaw lil oħrajn spiritwalment u b’hekk jibnu “teżor li qatt ma jfalli fis-​smewwiet.”

Ġesù mbagħad iwissi lid-​dixxipli tiegħu biex jibqgħu dejjem għal-​lest għall-​miġja lura tiegħu. Hu jgħid: “Ħa jkunu ġenbejkom imħażżmin u l-​lampi tagħkom mixgħulin, u intom infuskom kunu bħal irġiel li qed jistennew lil sidhom meta jiġi lura miż-​żwieġ, biex malli jasal u jħabbat ikunu jistgħu jiftħulu minnufih. Henjin huma dawk l-​irsiera li s-​sid malli jasal isibhom igħassu! Verament ingħidilkom, Hu se jitħażżem u jagħmilhom jintefgħu mal-​mejda u se jiġi ħdejhom u jimministralhom.”

F’din it-​tixbieha, li l-​qaddejja jridu jkunu għal-​lest fil-​miġja lura taʼ sidhom huwa muri mill-​fatt li huma jxammru l-​ilbies twil tagħhom u jorbtuhom taħt ħżiemhom u li jibqgħu jieħdu ħsieb id-​dmirijiet tagħhom saħansitra matul il-​lejl bid-​dawl taʼ lampi mimlijin sewwa biż-​żejt. Ġesù jispjega: ‘Jekk is-​sid jasal fit-​tieni għassa [minn madwar id-​disgħa taʼ fil-​għaxija sa nofs il-​lejl], saħansitra jekk fit-​tielet [min-nofs il-​lejl sa madwar it-​tlieta taʼ fil-​għodu], u jsibhom għal-​lest, henjin huma!’

Is-sid jippremja lill-​qaddejja tiegħu b’mod mhux tas-​soltu. Hu jagħmilhom jinxteħtu mal-​mejda u jibda jaqdihom. Hu jittrattahom, mhux bħala rsiera, imma bħala ħbieb lejali. Xi premju mill-​aħjar għal li huma baqgħu jaħdmu għal sidhom matul il-​lejl waqt li stennew għall-​miġja lura tiegħu! Ġesù jikkonkludi: “Intom ukoll, ibqgħu dejjem għal-​lest, għaliex Bin il-​bniedem ġej f’siegħa li ma taħsbux li hi probabbli.”

Pietru issa jistaqsi: “Mulej, qiegħed int tgħid din it-​tixbieha lilna jew ukoll lil kulħadd?”

Minflok ma jwieġeb b’mod dirett, Ġesù jagħti tixbieha oħra. “Min tassew hu l-​prokuratur fidil,” hu jistaqsi, “li lilu sidu se jaħtar fuq il-​ġemgħa taʼ qaddejja tiegħu biex jibqaʼ jagħtihom il-​kejl tagħhom taʼ provisti tal-​ikel fiż-​żmien xieraq? Hieni hu dak l-​irsir, jekk sidu malli jasal isibu jagħmel hekk! Ingħidilkom il-​verità kollha, Hu se jaħtru fuq dak kollu li għandu.”

Is-“sid” ovvjament huwa Ġesù Kristu. Il-​“prokuratur” jagħti stampa tal-​“merħla ċkejkna” taʼ dixxipli bħala ġemgħa kollettiva, u l-​“ġemgħa taʼ qaddejja” tirreferi għal dan l-​istess grupp taʼ 144,000 li jirċievu s-​Saltna tas-​sema, imma din l-​espressjoni tenfasizza x-​xogħol tagħhom bħala individwi. “Dak kollu li għandu” li l-​prokuratur lejali huwa maħtur biex jieħu ħsiebu huma l-​interessi rjali tas-​sid fuq l-​art, li jinkludu s-​sudditi fuq l-​art tas-​Saltna.

Billi jkompli t-​tixbieha, Ġesù jiġbed l-​attenzjoni lejn il-​possibiltà li mhux il-​membri kollha taʼ dik il-​klassi taʼ prokuratur, jew irsir, se jkunu lejali, billi jispjega: “Jekk qatt dak l-​irsir igħid f’qalbu, ‘Sidi se jdum ma jiġi,’ u jibda jsawwat lill-​qaddejja rġiel u lill-​qaddejja nisa, u jiekol u jixrob u jisker, is-​sid taʼ dak l-​irsir se jiġi f’jum li hu ma jkunx qed jistennieh . . . , u se jikkastigah bl-​akbar ħruxija.”

Ġesù jinnota li l-​miġja tiegħu ġabet żmien taʼ nar għal-​Lhud, billi xi wħud aċċettaw u oħrajn irrifjutaw it-​tagħlim tiegħu. Iktar minn tliet snin qabel, hu kien imgħammed fl-​ilma, imma issa l-​magħmudija tiegħu ġol-​mewt qed toqrob dejjem iktar lejn l-​egħluq, u bħalma jgħid hu: “Qed inkun imnikket sakemm tkun intemmet!”

Wara li jindirizza dawn ir-​rimarki lejn id-​dixxipli tiegħu, Ġesù jerġaʼ jkellem lill-​folol. Hu jilmenta dwar il-​fatt li huma b’ras iebsa ma jaċċettawx l-​evidenza ċara tal-​identità tiegħu u s-​sinjifikat tagħha. “Meta taraw sħaba tielgħa fil-​partijiet tal-​Punent,” hu josserva, “mill-​ewwel tgħidu, ‘Ġejja maltempata,’ u hekk jiġri. U meta taraw li riħ isfel qed jonfoħ, tgħidu, ‘Se jkun hemm mewġa taʼ sħana,’ u hekk jiġri. Ipokriti, tafu kif teżaminaw id-​dehra minn barra tal-​art u tas-​sema, imma kif inhu li ma tafux kif teżaminaw dan iż-​żmien partikulari?” Luqa 12:​32-59.

▪ Kemm nies jiffurmaw il-​“merħla ċkejkna,” u x’jirċievu huma?

▪ Ġesù kif jenfasizza l-​ħtieġa għall-​qaddejja tiegħu li jkunu għal-​lest?

▪ Fit-​tixbieha taʼ Ġesù, min huma s-​“sid,” il-​“prokuratur,” il-​“ġemgħa taʼ qaddejja,” u “dak kollu li għandu”?